Zakarie 4 - O Debleskro Lab 2024 (Sinte-Manouche)

O pančto dikepen: i momelengri oun douy djeteskre rouka

¹ Oun o bolepaskro, kay mantsa rakras, vas pale oun djangras man pre har dran o sopen,

² oun penas ap mande: “Hoy dikeh?” Me penom: “Me dikau i momelengri kerdi dran sonakay. Ap late hi i čaro. Koy pre hi efta momlia, hakeni i mouyeha.

³ Oun douy djeteskre rouka hi koy tardo, yek ap lakri čači rig oun yek ap lakri servi rig.”

⁴ Oun me penom ap o bolepaskro, kay mantsa rakrell: “Miro ray, hoy hi kova?”

⁵ “Djineh gar, hoy kova hi”, poučas lo mandar. “Na-a, miro ray”, penom me.

⁶ “Kol efta momlia hi o baro Debleskre yaka, hoy lauter dikenn, hoy ap i phoub djala.”

^7-8 “Oun hoy hi kol douy djeteskre rouka”, penom me, “hoy čačes oun serves pash i momelengri tardo hi, oun hoy hi lengre douy kashta, kolengro djet an kol douy sonakangre koola nashell?”

⁹ Oun yob poučas: “Djineh gar, hoy kolla hi?” Me penom: “Na-a, miro ray.”

¹⁰ Yob penas: “Kolla hi kol douy vi-rodede morsha, kolen o ray pral i tseli phoub o djeteha dren makas, te krenn le leskri boudi.”

Lače laba o morsheske Zorobabel

¹¹ Oun o bolepaskro rakras pale ap mande oun penas: O baro Devel penell ap o Zorobabel: Kova, hoy kameh te krell, nay kreh gar lourdentsa, vitar gar dran tiri zoor. Kova krell miro dourho. Kova penell o baro Devel, ko ray pral o bolepen oun i phoub.

¹² Hadell pes čomone bares har i berga glan toute, Zorobabel? Kova hounte perella an peste khetne. Tou čiveh miro kheer pale pre. Oun ap ko tsiro, kay čiveh o pralstouno bar pre, denn i menshe gole: Shoukar, kova hi shoukar!

¹³ Oun o baro Devel penas mange: O Zorobabel čivas i telstoune barra miro kherestar yek ap o vavar. Oun leskre vastentsa čivell lo i pralstoune barra pre, te vell o kheer kerdo. Ap ko tsiro, kay vell kava lab čačo, dikenn t'mer: Kova hi o baro Devel, ko ray pral o bolepen oun i phoub, kay bičras man pash t'mende.

¹⁴ Koon dikas o ropah tele ap o tikno koova, kova dikell barhteles ap o pralstouno bar, har hidjrell les o Zorobabel an peskro vast.