Zakarie 14 - O Debleskro Lab 2024 (Sinte-Manouche)

O Debleskro baro dives vella

¹ I dives o baro Debleske vella: Kolla, kay kouran pen touha, Yerusalem, čorenn ap ko dives tiro bravlepen. Oun glan t'mare yaka denn le hakenes pendar peskro kotar.

² Me lau i lourden dran i tsele themma khetne, te kourenn le pen o foreha Yerusalem. Yon lenn o fores dren, čorenn i khera vin, oun taprenn zoryah i djouvyenge an. Kol menshendar an o foro vell i paash pandles krik anlo. Kolla, kay pral ačan, ačenn nay an o foro.

³ Palle djal o baro Devel vin, te kourell yob pes yaake kol lourdentsa dran i vavar themma, har kouras lo pes peskre menshenge an i phoure tsirya.

⁴ Yob hi tardo ap o djeteskri berga, hoy glan o foro Yerusalem čiddo hi, kote kay o kham pre djala. Oun koy berga phagell mashkral an douy kotya, foun kotar kay o kham pre djal bis kote, kay o kham tele djal. Yek kotar djal ap i servi rig, o vavar kotar ap i čači rig. Oun mank kol douy berge hi i bourhli tala.

⁵ Koy tala djal yaake dour har Azel. An koy tala mank o baro Debleskre berge nashenn t'mer t'menge yaake, har t'mare phoure nashan penge, har i berge trissan an ko tsiro, kay o Usiya o baro ray pral o them Youda his. Oun palle vell miro baro Devel. Oun leskre tsele bolepangre venn khetne leha.

⁶ Ap ko dives dell bouder kek shilapen oun kek djayepen.

⁷ Hi yek dives, – o baro Devel prindjrell les. Pal o dives vell kek rat. An ko tsiro, kay rati hounte vals, vell gar tamlo.

⁸ An ko tsiro nashenn djide panya dran o foro Yerusalem vin. Ko yek paash nashell an o baro pani, hoy kote hi, kay o kham pre djal. Ko vavar paash nashell an o baro pani, hoy kote hi, kay o kham tele djal. Ko pani nashell an i niyal har an o vend.

⁹ Palle hi o baro Devel o ray pral i tsele themma ap i phoub. An ko tsiro hi yob kokres o Devel. Les kokres mangenn le an.

¹⁰ O tselo them Youda vell i bourhlo telstouno them mank o foro Geba oun o foro Rimmon, hoy hi čačes o forestar Yerusalem čiddo. O foro Yerusalem ačell pralstounes čiddo, oun djal o voudarestar Benyamin bis kote, kay o ersto voudar his, oun kotar doureder bis pash o voudar, kay i rigya khetne venna, oun foun o turmo Hananel bis kote, kay i mool dran i drake o baro rayeske kerdo vas.

¹¹ Kote, an o foro Yerusalem djivenn boud menshe. Kek vella, te dell lo o foro paash. I menshe kote nay djivenn kek daryah.

¹² Oun kova hi ko pharo nasslepen, hoy o baro Devel ap kolende čivell, kay djan an o kourepen o foreha Yerusalem: Lengro mass merell tele, har le gomme ap lengre pire tardo hi, lengre yaka an o shero oun lengri čip an o mouy merenn tele oun perenn vin.

¹³ An ko dives krell len o baro Devel yaake daar, te djinenn le bouder gar, hoy le krenn. Hakeno taprell o vavares. Oun yon djan yek ap o vavareste pre.

¹⁴ Ninna i menshe dran Youda djan ap kolende an Yerusalem pre. Palle lenn i menshe dran Yerusalem ko kouč koova khetne, hoy kol vavar menshen dran i themma troul lende trouyel pash pende hi: Kova hi boud sonakay, roup oun kouč ripya.

¹⁵ Oun kava pharo nasslepen, hoy vas ap i menshende, vell ninna ap i graya, i maultikre bourike, khamele, bourike oun pral i tsele firhende, kay pash i lourdende hi.

¹⁶ Oun kolla, kay djides ačan kol menshendar dran i themma, kay his an o kourepen o foreha Yerusalem, kolla venna hako bersh an Yerusalem, te sharenn le o baro rayes an Yerusalem. Yob hi o baro Devel, ko ray pral o bolepen oun i phoub. Kote an Yerusalem kamenn le ninna kol bare divessa te rikrell, kay i menshe an patyengre khera djivenn.

¹⁷ Te hi yek them ap kay phoub, dran koleste venn le gar an Yerusalem, te sharenn le o baro Debles, ko rayes pral o bolepen oun i phoub, palle dell kek brishin ap ko them.

¹⁸ Ninna te hi kolla i Egiptarya, kay djan gar pre an Yerusalem glan o baro Debleste, lenn le koy phagi, hoy dell o baro Devel i menshenge an i tsele themma, kay venn gar pre an Yerusalem, te rikrenn le kol bare divessa, kay i menshe an patyengre khera djivenna.

¹⁹ Te rikrenn le gar kal divessa, kol Egiptarya oun kol tsele vavar menshe, lenn le pengri phagi.

²⁰ An ko tsiro hi činlo ap i tikne bashepangre, hoy hi pandlo troul i grayengre menya: o baro Debleske! I pirya an o Debleskro kheer hi o Debleske yaake boud moldo har i bare čare glan o Debleskri rhačepaskri.

²¹ I tsele pirya an Yerusalem oun an o them Youda hi o Debleste dino; i menshe, kay an o Debleskro baro kheer venna, nay lenn len oun nay kerenn o mass koy dren. Oun an ko tsiro dell bouder kek parepaskro an o kheer o baro Deblestar, ko rayestar pral o bolepen oun i phoub.