Zakarie 12 - O Debleskro Lab 2024 (Sinte-Manouche)

O Devel rikrell peskre vasta pral Yerusalem

¹ Kava hi o lab, hoy penas o baro Devel pral o Israel: Kova penell o baro Devel, kay kras o bolepen bourhlo oun čivas i phoub zoreles tardo, oun das o menshes o dourho.

² “Shounenn, me krau, te vell o foro Yerusalem har i čaro, kay i zorelo pipen dren hi. I menshe dran i themma trouyel, kay venn, te kourenn le pen o foreha, piyenn lestar oun venn har mate, kay nay ačenn bouder gar ap i pire tardo. Ninna pral i menshende an o them Youda vell kova ap ko tsiro, kay hi o foro Yerusalem dren pandlo.

³ Ap ko tsiro krau, te vell o foro Yerusalem har i pharo bar i menshenge an hake themma. Kolla, kay kamenn les krik te hadell, doukrenn pengre vasta. Lourde dran i tsele themma ap i phoub venna, te kourenn le pen o foreha.”

⁴ “An ko tsiro”, penell o baro Devel, “krau me i grayenge bari traash, oun i klissepangre venn narvelo i daryatar. Ava, i tsele grayen kol menshendar krau korelo. Pral o kheer Youda rikrau mire yaka pre, te djal lenge kek čilačepen.

⁵ Oun kol pralstoune an o them Youda penenn an pengre djia: I menshe an Yerusalem hi zorelo. Yon rikrenn pen zoreles ap pengro baro Debleste, ko rayeste pral o bolepen oun i phoub.

⁶ An ko tsiro krau, te venn i pralstoune an Youda har i yagakro čaro mashkral an o veesh, oun har i yag mank o phouss, hoy rhačell ap haki rig. Oun yon rhan kol tsele natsyone trouyel pre. O foro Yerusalem ačell kay lo hi.”

⁷ O baro Devel krell, te venn glanstounes i lourde dran o them Youda i zorleder pral kolende, kay kourenn pen lentsa. Kova krell lo yaake, te sharenn pen gar o Davideskre menshe oun i vavar menshe an o foro Yerusalem, oun dikenn tele ap i menshende an o them Youda.

⁸ An ko tsiro rikrell o baro Devel peskre vasta pral i menshende an o foro Yerusalem. Oun i menshe kote sikrenn pen yaake zorelo, te hi i bango yaake zorelo har o David his. Oun i menshe dran o Davideskro kheer djan glan lende, har te djals o Debleskro bolepaskro glan lende.

⁹ “An ko tsiro”, penell o baro Devel, “rodau te marap kol tsele natsyonen, kay djan an o kourepen o foreha Yerusalem.

¹⁰ O Davideskre menshenge oun i menshenge an Yerusalem krau lengre djia pre, te venn le kamles yek ap o vavareste oun mangenn mandar lačepen. Oun yon dikenn ap koleste, kay dan le an i rig čourye. Oun yon denn gole i ropah pral leste, har yek pral peskro moulo čaveste gole dell, koles kek vavar čave hi, oun har rovenn i menshe pral pengro phoureder čavo, kay meras.

¹¹ O ropen troul leste an o foro Yerusalem vell yaake baro har o ropen an Hadad-Rimmon an o telstouno them Megiddo.

^12-13 I menshe an o tselo them rovenna, haki bari familya peske, oun lengre djouvya ninna penge: o kheer David, o kheer Natan, o kheer Levi, o kheer Shimi,

¹⁴ ninna kol vavar bare familye an o them, hakeni peske oun lengre djouvya ninna penge.”