Zakarie 11 - O Debleskro Lab 2024 (Sinte-Manouche)

I vavar themma oun lengre raya nashrenn pengri zoor

¹ Tou Libanon, kre tire voudya pre, te rhačrell i yag tire cedertikre rouka.

² Rovenn, t'mer vavar zenele rouka! Kol rayle cedertikre rouka peran, hi bouder gar koy. Rovenn, t'mer aichtikre rouka an o them Bashan! O pesso veesh hi tele dino.

³ I pralstoune pral i themma denn gole i doukatar, lengro raylepen hi bouder gar. Shounenn i gole i levendar! O veesh, kay le khere his, pash o pani Yordan, hi khetne stakedo.

O lačo bakrengro

⁴ Miro baro Devel penas ap mande: “Ab o bakrengro kol bakrenge, kay djan koy, te venn le maredo!

⁵ Lengre raya marenn len, oun kova djal lenge gar an o dji. Yon bikrenn len oun penenn: Sharedo vell o baro Devel! Mer ham bravelo. Ninna kol morshen, kay ap i bakre yak denn, hi kek dji lenge.”

⁶ O baro Devel penell: “Kanna khaytenn man bouder gar i menshe an kava them. Me moukau i menshen te perell yek an o vast o vavarestar, oun dau len ninna lengre pralstunenge an i vasta. Kolla denn o them paash, oun me lau len gar vin dran lengre vasta.”

⁷ Oun kol parepangre, kay ginan oun bikran i bakre, dan man koy boudi, te dap yak ap kol bakre, kay maredo venn. Oun me lom douy kashta: Ko yekes kharom lačepen oun ko vavar harmenatsyona. Oun me dom garda ap kol bakre.

⁸ Oun an yek čon krom me, te hounte djan penge kol triin vavar bakrengre. Me nay dikom len bouder gar glan i yaka. Oun yon his rhoyedo ap mande.

⁹ Doleske penom: “Kamau bouder gar te ačap i bakrengro t'menge. Kol bakre, kay merenna, mou merenn! Kolla, kay nashrenn pen, mou nashrenn le pen! Oun kolla, kay djido ačenn, mou rhan le yek o vavares!”

¹⁰ Me lom miro kasht, hoy kharom lačepen oun phagom les. Yaake sikrom, kay phagom koy sovel, hoy o baro Devel dren djas i tsele menshentsa Israel,

¹¹ Oun koy sovel vas phagedo ap kava dives. Kol parepangre, kay i bakre bikran oun ginan, dikan, hoy krom, oun hayvan, o baro Devel rakras dran kova, hoy krom.

¹² Oun me penom ap lende: “Hi t'menge mishto, te denn man love miri boudjake, palle denn man miro playsepen. Hi kova t'menge gar mishto, moukenn les!” Oun yon dan man triyanda roupene beme, te playsrenn le man.

¹³ Oun o baro Devel penas mange: “Havo shoukar playsepen! Lenge hom gar boudeder moldo har kava! Čip ko roup an o kheer, kay o bravlepen garedo vell.” Oun me lom kol triyanda roupene beme, oun hidjrom len an o baro Debleskro kheer, oun čivom len kote an o kheer, kay o bravlepen garedo vell.

¹⁴ Palle phagom miro kasht, hoy kharom harmenatsyona. Yaake sikrom, kay i menshe an o them Youda oun an o them Israel bouder gar phrala hi.

¹⁵ O baro Devel penas mange palle: “Le touke pale o bakrengro koova, te vess kanna i bakrengro, kay či moldo hi!

¹⁶ Čačepah, me bičrau i bakrengro an o them, kay dikell gar pal i bakre, kay hi nashedo. Vitar gar rodell lo kolen, kay nashran pen. Kolenge, kay doukran pen, vell lo gar ap i rig. Oun leske hi yek, te vell i sasten doha te rhal oun te piyell. I thoulle bakren marell lo peske, oun tserdell lenge ninna i pire vin.

¹⁷ Djungeles djal koleske, kay hi i či-moldo bakrengro oun moukell i bakren kokres! Mou činell o rharo leskri moussi tele, oun leskro čačo yak vin! Leskri moussyatar te ačell či har i tikno kotar, oun leskro čačo yakeha dikell lo bouder či!”