Tito 3 - O Debleskro Lab 2024 (Sinte-Manouche)

O Debleskro baro lačepen krell men neves

¹ Pen i patslenge, te shounenn le ap i rayende pral i themma oun pral i forya! Pen lenge ninna, te krenn le hako lačo koova,

² te rakrenn le gar djoungeles pral vavarende, oun te rodenn le kek čingepen! Na-a! Yon hounte venn o djiyestar lačo oun kamlo ap i tsele menshende.

³ Glan ko tsiro, kay hams gar patslo, hams ninna save menshe, kay prindjran o čačepen gar. Mer shounam gar ap o Debleste, oun djam gar ap leskro drom. Hams pandlo ap djoungelo koova, hams čilačo oun dikam čilače yakentsa ap kova, hoy i vavaren his. Hams čilačo oun rhoyemen ap i vavarende, oun yon ap mende.

⁴ Kova lauter vas vavarčandes, har o Devel mende sikras, har lačo oun kamlo yob ap i menshende hi. Yob las men dran o čilačepen vin

⁵ oun anas men pash peste. Hams gar moldo, te kras yob kova. Ninna te kram gar lačo oun čačo koova, his o Debles i baro dji menge. Doleske thovas lo mari doosh mendar tele, oun mer vam leskre čave. Kava nevo djipen das men o Debleskro Dourho.

⁶ Koles bičras o Yezous Kristo pash mende, oun mer lam lestar boud.

⁷ Yaake čivas men o Yezous Kristo an o čačepen dran lauter lačepen, te dell lo men ko djipen, hoy gar pre-herella. Oun mer djinah, kay lah ko djipen an ko tsiro, hoy vella.

⁸ Kava lab hi čačo. Doleske rake kova i patslenge an o dji, te rodenn le koy pal, har nay krenn le lačo koova. Kova hi mishto oun boud moldo hakeneske.

⁹ Ma shoun ap ko dinelo rakepen, hoy či molella! Ma činge lentsa pral kol lila, kay hi i phourengre laba dren činlo, vitar gar pral kova, hoy an o Moseskre lila činlo hi. Savo čingepen hi gar mishto i menshenge, oun hi či moldo.

¹⁰ Te dell yek mensho, kay anell čingepen mashkral i patslende, pen koleske, te moukell lo kova! Yob te moukell gar tele, pen kova leske i douyto kopo! Yob te shounell gar ap toute, palle rake bouder gar leha!

¹¹ Tou djiness, savo mensho djas o čačo dromestar tele, oun kamell gar pale ap o čačo drom te vell. Yaake sikrell lo, kay yob moukas o Debles.

¹² Me kamau te bičrap i phrales pash toute: nay vell o Artemas, nay vell o Tichiko. Te vell yek lendar pash toute, palle hounte vess tou sik pash mande kate an o foro Nikopolis. Me kamau te ačap kate pral o vend.

¹³ O Zenas, ko čačepaskro, oun o Apollo, kolen de lauter djipaske, te djan le ap o drom doureder!

¹⁴ Mouk ninna i patslen lačo koova te krell oun i vavarende te dell, hoy kolen hounte vell djipaske! Yaake djivenn i patsle pengro djipen gar čičeske.

¹⁵ Lauter kolla, kay pash mande hi, moukenn touke lače laba te penell. Pen lače laba mendar lauterenge, kay kamenn men an o patsepen! O Debleskro lačepen djal t'mentsa lauterentsa!