Sikepaskro 8 - O Debleskro Lab 2024 (Sinte-Manouche)

¹ Kay hi ko mensho, kay hi čačepah gosevo? Kay hi kova, kay hayvell te penell, hoske čomone yaake hi har kova hi? Dik i menshes an i yaka, palle nay peneh, hi lo gosevo oder gar. Te hi lo gosevo, palle dikell lo lačes ap i vavareste. Leskro gosvepen lell leskri rholi krik.

Shoun ap o baro rayeste!

² Te dan t'men sovel glan o baro Debleste, te shounenn ap kova, hoy o baro ray t'menge penell, palle rikrenn t'men ap kova!

³ Ma djan sik lestar krik! Ma krenn, hoy djoungeles hi glan leskre yaka! O baro ray nay krella, hoy yob kamella.

⁴ An o baro rayeskro lab hi zorlepen, oun kek nay penell ap leste: Hoske kreh tou kova?

⁵ Kova, kay rikrell pes ap o baro rayeskro lab, kova djal gar khetne kolentsa, kay hadenn pen pral o baro rayeste. O gosevo djinell, o tsiro vell, kay lenn le i phagi.

⁶ Lautereske, hoy i mensho krella, vell o tsiro, kay vell o čačepen pral leste vi-rakedo. Oun o mensheskro čilačepen hi phares ap leste čiddo.

⁷ Mer djinah gar, hoy vella. Koon nay penell menge, har halauter vella?

O menshes hi kek zoor

⁸ O menshes hi kek zoor, te nay rikrell lo o phourdepen pre. Oun les hi kek zoor pral ko dives, kay merell lo. Ninna glan o kourepen nay nashell peske kek. Oun peskro čilačo koova nay lell gar o čilačes vin dran i bibarht.

⁹ Kova halauter dikom, oun lom halauter an o yak, hoy vell kerdo ap kay phoub, kay hadell pes yek pral o vavareste oun krell les bibarhtelo.

Hoske djal i čilačenge yaake mishto?

¹⁰ Oun pale dikom, har čilače menshe shoukar paskedo van. Oun kolla, kay o čačo koova kran, hounte moukan o Debleskro kheer, oun van bistedo an o foro. Kova hi ninna phares te hayvell.

¹¹ Ko mensho, kay kras čilačo koova, lell gar sik pal kova peskri phagi. Doleske rikrenn pen i menshe gar pale, te krenn le pengro djoungelo koova doureder.

¹² Ninna te djivell kova i lengsto djipen, kay krell sheel kope foullo koova, djinau me, te djal kolenge kokres mishto, kay djivenn o Debleha oun moukenn les lengro ray te vell.

¹³ O čilačeske djal gar mishto. Oun yaake har i shatto gar rah koy hi, djivenn kolla gar rah, kay kamenn či o Deblestar te djinell.

¹⁴ Phares te hayvell hi kova, hoy hi kerdo ap kay phoub: Kote hi menshe kay djivenn an o čačepen, oun kolenge djal har i menshenge, kay djivenn i djoungelo djipen. Oun pale hi menshe koy, kay djivenn i foullo djipen, kolenge djal har te djivans le an o čačepen. Kote penom: Kova hi ninna phares te hayvell.

¹⁵ Doleske penau me: Men hounte vals i dji, hoy barhtelo hi. O mensheske dell či ap kay phoub, hoy feteder hi, har te rhal lo oun te piyell lo, oun te moukell lo les peske mishto te djal. Kova hi, hoy nay krah pash mari tseli boudi an maro djipen, hoy o Devel men das ap kay phoub.

O Debleskro gosvepen hi bareder har o mensheskro gosvepen

¹⁶ Me kamom vin te hatsell, har te nay vau gosevo, oun lom halauter an o yak, hoy i menshe ap kay phoub krenna. Dives oun rati nay sovom gar.

¹⁷ Oun me dikom halauter, hoy o Devel kras. Čačepah, i menshe nay hayvenn gar halauter, hoy yob kras ap kay phoub. Ninna te rodell o mensho phares, te hayvell lo ko koova, nay hatsell lo gar vin, hoske halauter yaake hi. Oun ninna o gosevo, te penell lo: “Me djinau les”, nay hatsell lo les gar vin.