Sikepaskro 7 - O Debleskro Lab 2024 (Sinte-Manouche)

I čačo gosvepen

¹ Vell penlo: Hi feteder, te vell yek lačes an-diklo mank i menshende, har te makell lo pes lačo djeteha. Me penau: O dives, kay i mensho merella, hi feteder har ko dives, kay i mensho ap kay phoub vella.

² O mensheske hi feteder te djal lo an i kheer, kay yek meras oun i menshe rovenna, har te djal lo an i kheer, kay krenn le i biyab. Kote, kay yek meras, vell diklo, kay hako mensho hounte merella. Oun koon gomme djido hi, moukell pes kova an o dji te djal.

³ Ropen hi feteder har sapen; pash o ropen nay vell yekeskro dji feteder.

⁴ O gosevo djal kote, kay yek meras oun i menshe rovenna. O dinelo djal kote, kay sapaske hi.

⁵ O mensheske hi feteder te shounell lo ap i goseveste, kay čingrell leha, har te shounell lo ap i gilya, kolentsa i dinele les sharenn.

⁶ O sapen i dinelendar hi menge gar boudeder moldo har i gole, hoy denn sane kashta tel i piri, te venn le rhačedo.

⁷ Ninna o gosevo vell har i dinelo, te moukell lo pes te ginell. Dell yek leste love, te krell lo, hoy gar čačo hi, oun yob lell kol love an, palle nay djal lo bouder gar pal o čačepen.

⁸ Feteder hi, te pandess tiro mouy, har te kress tiro mouy pre o rakepaske. Feteder hi, te dess gar sik pre, har te vess pre-phourdo.

⁹ De garda te vess gar sik rhoyedo! Koon rhoyrell pes pral halauter, hi dinelo.

¹⁰ Ma pen: An o phouro tsiro his halauter feteder har kanna! Te vals tou gosevo, penals tou kova gar!

¹¹ O gosvepen hi yaake mishto har i bravlepen, hoy o dad peskro čaveske moukas. Hakeneske ap kay phoub hi o gosvepen boud moldo.

¹² O gosvepen hi har love. Kones kolestar doha hi, kova hounte darell gar. Leskro gosvepen rikrell o goseves an o djipen.

¹³ Dik, hoy o Devel halauter kras! Kek nay krell vavarčandes, hoy yob bango kras!

¹⁴ Te hi tout i lačo tsiro, palle mouk les touke lačes te djal. Te hi tout i djoungelo tsiro, palle dikess dren: O Devel kras ko yek tsiro har ko vavar, te djinell o mensho gar, hoy vella an kol divessa, kay venna.

Boud koova hi phares te hayvell

¹⁵ Me dikom boud koova an miro djipen, hoy hayvom me gar: Koy hi i lačo morsh, kay djivas i čačo djipen, oun yob merella glan te vas lo phouro. Oun koy hi i rhorheno morsh, ko djivell an o čilačepen, oun yob djivell i rah djipen.

¹⁶ Ma rike o čačepen zorleder dren har činlo hi! Oun ma kre tout gosveder har hal! Hoske kameh tout paash te krell?

¹⁷ Rike tout pale o čilačepastar! Oun ma ab har i dinelo! Hoske kameh te merell glan tiro tsiro?

¹⁸ Mishto hi, te rikreh tout ap ko yek lab, oun bistreh vitar gar ko vavar lab. Koon djivell o Debleha, rikrell pes ap kova lauter.

¹⁹ Leskro gosvepen krell o goseves zorleder har deesh zorele pralstoune, kay an o foro garda denna.

²⁰ Kek mensho hi yaake an o čačepen tardo, te krell lo kokres lačo koova oun anell kek doosh ap peste.

²¹ De či ap ko tselo rakepen, hoy i menshe rakrenna! Nay vals te shouneh, har tiro boudepaskro pral toute čingrell.

²² Tou djineh, boud kope čingral pral vavarende.

²³ Kova halauter kamom te hayvell i gosevo djiyeha. Me penom mange me kamau gosevo te vell. Oun me nay hayvom les gar.

²⁴ Lauter, hoy koy hi, hi phares te hayvell. Oun hoske kova yaake hi, djinell kek.

²⁵ Palle penom mange, tou hounte rodess boudeder, te hatsess vin, hoske čomone yaake hi. Yaake lom boud koova an i yak, te hayvap len. Kamom te djinap, vell o čilačepen dran o dinlepen oun o pre-phourdepen dran narvlepen?

²⁶ Oun me hatsom čomone, hoy shoutleder hi har o merepen, – i djouvel, kay i morshen taprell; kolakro kamlepen hi har dorya, kolentsa len pandell li; lakre moussya, hoy le troul lende čivell hi har shelle. I morsh, kay mishto hi glan o Debleskre yaka, kova nay nashell peske latar; o dinelo vell latar tapedo.

²⁷ Dik, penell o sikepaskro, kova hi, hoy hatsom vin, har dikom ap yek koova pal o vavar, te hayvap kava tselo koova feteder.

²⁸ Har rodom kate te kote, hatsom vin: Me nay hayvau gar halauter. Yek koova dikom: Mank zerya menshe hatsom yek morsh, kay his, har hounte vals lo. Savi djouvel hatsom me gar mank kol boud djouvyende.

²⁹ Dik, kova kokres hatsom: O Devel kras o menshes yaake, te djivell lo an o čačepen; i menshe rodenn penge boud dromma, kay nay krenn le čilačepen.