Sikepaskro 6 - O Debleskro Lab 2024 (Sinte-Manouche)

O bravlepen kokres hi gar doha

¹ Kote hi i bibarht, hoy me dikom ap kay phoub, koya vell pale te pale pral i menshende.

² Kote hi yek, koles kras o Devel baro oun an-diklo, das les bravlepen oun boud lačo koova. Yaake hi les halauter, hoy o dji kamella. Oun palle moukell les o Devel gar kolestar te rhal oun barhteles te vell. I vavar lell kova halauter oun rhal les pre. Savo koova hi ninna phares te hayvell oun krell man nasselo.

³ Nay vell i morsh, koleske venn sheel čave boldo, oun yob djivell boud bersha. Te vals lo yaake phouro oun vals gar barhtelo pral o lačepen an peskro djipen, oun leske vals vitar kek paskepen kerdo, kolestar penau me: I ternepen, kay moulo boldo vas, djal feteder har leske.

⁴ Ko ternepen vas boldo kek djipah, oun an i rati djal lo koy. Kek nay djinell, hoy lestar vals.

⁵ O kham dikas lo gar oun prindjras o djipen gar. Yob sovell i lačo sopen, feteder har ko bravelo.

⁶ Ninna te vals kova douy zerya bersha phouro, les vals či peskro djipastar – hake douy hounte meran.

⁷ O mensho marell pes tele peskro rhapaske. Oun pale te pale lell lo bok oun vell gar čalo hako tsireske.

⁸ Hoy hi o goseves o dineleske glan-vi an kava koova? Hoy molell kanna o čorveleske, te djinell lo, har te djal lo peskro drom mishto?

⁹ Vell penlo: Feteder hi te dikas ap kova, hoy men hi, har te nashas vavar koova palla. Kova hi ninna čičeske, oun yaake har te nashams pal o dourho, hoy djal pral i phoub.

O menshes hi peskro djipen gar an peskro vast

¹⁰ Halauter, hoy koy hi, las peskro lab. Mer djinah, har i menshe hi. Doleske nay čingrell i mensho gar koleha, kay zorleder hi har yob.

¹¹ Yaake boud rakrell lo, yaake boudeder hi leskro rakepen či-moldo. Hoy anell kova o mensheske?

¹² Kek djinella, hoy o mensheske mishto hi an peskro djipen, hoy yaake tikno hi. Kava dives hi lo koy oun o vavar dives bouder gar. Oun koon nay penell o mensheske, hoy pal leste vella ap kay phoub?