Sikepaskro 5 - O Debleskro Lab 2024 (Sinte-Manouche)De garda, hoy tou rakreh oun ma de tout gar sik sovel! 1 Ma kre tiro mouy sik pre, te rakreh glan o Debleste. O Devel hi an o bolepen, oun tou hal ap i phoub. Doleske kre gar boud laba, te rakreh. 2 Koneske boud an o shero trouyel djal, kova dell phare sounya. Oun koon boud laba krell, rakrell sik dinelo koova. 3 Te deh tou tout sovel glan o Debleste, palle mouk tout čičestar pale te rikrell, te kress kova, hoy glan leste penal! O Devel dikell gar lačes ap ko dineleste, kay nay rikrell gar, hoy lo sovel das. 4 Feteder hi, te deh tout gar sovel, har te deh tout sovel oun rikreh gar, hoy penal. 5 De garda te rakress gar savo koova, hoy nay rikreh gar dren! Ma pen glan i Debleskro morsheste: Kova kamom gar te penell. O Debles nay vell i rholi pral tire laba, oun yob nay moukals kova gar mishto te djal, hoy tire vastentsa kral. 6 Čačepah, boud sounya oun boud laba molenn či. Dran kova kre kova, hoy o Debles sharell! Kote, kay o čačepen tele stakedo vell 7 Te dikeh tou, har an o them o čorvelo tele rikedo vell, oun o čačepen tele stakedo vell, oun kek peskro čačepen lell, palle kre kek bare yaka: I pralstoune rikrenn khetne, oun pral lende hi vavar pralstoune, kay rikrenn i vasta pral kolende. 8 Hi feteder o themeske, te hi les i baro ray, kay dikell koy pre, te vell ap o harhetikro them boudedo, te vell i menshen doha djipaske. Čičeske hi o bravlepen 9 Kova, kay i love kamella, koles nay vell gar doha love. Oun kova, kay lell pes bravlepen khetne, koles nay vell vitar gar doha. Ninna kava koova hi čičeske. 10 Kote kay boud bravlepen hi, kote hi ninna boud, kay rhan o bravlepen pre; oun koles, kay kova lauter hi, leske ačell či, har te dikell lo les an! 11 Goudlo hi o sopen koleske, kay boudrella, te rhas lo boud oder gar boud; o bravlepen o bravelestar moukell les gar te sovell. 12 I djoungelo koova dikom ap i phoub: Hi menshe koy, kay garenn pengro bravlepen pash peste oun denn mishto yak ap kova. 13 Oun i bibarht vell oun yon nashrenn halauter. Oun te hi i čavo koy, ačell leske či an o vast. 14 Yaake har yek nanges boldo vas, yaake djal lo pale, har lo vas. Ninna te boudras lo boud, nay lell lo či pestar peha, te merell lo. 15 Yob hounte djal, har lo vas. Kova hi i bari bibarht leske. Leskri phari boudyatar ačell leske či. Kova hi, har te marals lo pes tele čičeske. 16 Peskro tselo djipen moukas lo pes gar mishto te djal. Boud pharo koova djas leske an o shero trouyel oun kras leske daar. Oun koy pashel vas nasslepen oun rholi an leskro djipen. Koy barht, hoy o Devel yekes della 17 Kova hi, hoy me dikom dren, oun hoy mishto hi, oun ko feteder, hoy nay krah an maro tikno djipen, hoy o Devel men das, te rhas mer oun piyas oun kras i barhtelo djiyeha mari boudi. Yaake kamell kova o Devel mendar. 18 Te dell o Devel i menshes bravlepen oun lačo kova, te nay rhal lo oun piyella, oun te nay moukell lo peske mishto te djal, oun leskro dji sal pral halauter, hoy leske dran peskri phari boudi vas, palle hi kova čomone, hoy o Deblestar vas. 19 O Devel das les barht an o dji. Doleske hounte krell lo peske kek shero pral o tikno tsiro, kay hi lo ap kay phoub. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.