Sikepaskro 4 - O Debleskro Lab 2024 (Sinte-Manouche)

Laba pral i čorvelende

¹ Palle dikom halauter, hoy gar čačo hi ap i phoub. Me dikom i sva kolendar, kay dan le lenge gar lengro čačepen, oun kolenge kek ap i rig vas. Kolla, kay kran lenge čilačepen, his zorelo. Doleske vas kek ap lengri rig.

² Kote penom mange, barhteles hi kolla, kay meran oun paskedo hi, kolenge hi feteder har kolenge, kay kanna djivenna.

³ Oun feteder har kol douyenge hi koleske, kay vas gar boldo oun dikas gar ko tselo čilačepen, hoy vell kerdo ap i phoub.

Laba pral i boudi

⁴ Oun me dikom, har marenn pen i menshe tele oun krenn lači boudi, te venn le feteder har kol vavar, yaake te zilverenn kolla ap lende. Kova hi ninna či-moldo, oun yaake har te nashals yek pal o dourho, hoy djal pral i phoub.

⁵ Koon kamell gar te boudrell, čivell peskre vasta glan peskri beč khetne. Yob hi dinelo oun leske ačell či te rhal.

⁶ Feteder i vast pherdo djipaske oun tsirya, kay kreh či, har douy vasta pherdo djipaske oun boud boudi oun i naashepen pal o dourho, hoy djal pral i phoub.

⁷ Oun palle dikom i vavar koova ap i phoub, hoy hi phares te hayvell.

⁸ Kote hi yek kokres, oun kek hi pash leste. Kek čavo hi les oun kek phraal. Oun yob boudrell oun boudrella, te vell lo bravelo. Yob hounte poučals pestar: Koneske boudrau man tele, oun moukau les mange gar mishto te djal? Savo koova hi phares te hayvell oun i bibarht.

Douy hi feteder har yek

⁹ Douyenge djal feteder har yekeske. Te boudrenn douy khetne, vell yek o vavareske pash o vast.

¹⁰ Te perell yek, hadell les ko vavar pre. Har djoungeles djal koleske, kay kokres hi, oun perella! Palle hi kek vavar koy, kay hadell les pre.

¹¹ Ninna, douy te hi an o čiben čiddo, nay tatsrenn le pen khetne. Har nay tatsrell pes yek, te hi lo kokres?

¹² Yek te hi lo kokres, nay vell sik khetne dino. Douy te hi khetne, nay venn le zorleder har kova, kay djal ap lende pre. Triin pesse thaba krenn i dori, hoy djal gar sik paash.

Laba pral i dinelo phouro ray

¹³ I terno morsh, kay gosevo hi, ninna te hi lo gar bravelo, hi feteder har i phouro baro ray, kay dinelo hi, oun moukell peske či te penell.

¹⁴ Kova hi čačo, ninna te his ko terno morsh i pandlo boudepaskro oun vas vin ginlo, te vell lo baro ray, ninna te vas lo boldo an i čorveli familya an ko them, pral leste yob o ray vell.

¹⁵ Oun me dikom, har i tsele djide menshe ap kay phoub pengro djipen djivenn. Ninna dikom i vavar terno morshes, kay pal leste o baro ray vals.

¹⁶ Oun me dikom boud menshe, yaake boud te penau nay gar, kitse yon hi. Kolla kay his glan leste, oun kolla, kay van pal leste, kek lendar his barhtelo pral kova, hoy yob kras. Kova hi ninna či-moldo, oun yaake har te nashals yek pal o dourho, hoy djal pral i phoub.

De garda, te djah tou an o Debleskro kheer!

¹⁷ De garda, hoy kreh, te djah tou an o Debleskro kheer! Ab glan o Debleste oun shoun ap leskre laba! Kova hi feteder, har te aneh leske firhen kokres, har dinele menshe krenn. Kolla djinenn gar, kay krenn le dinelo koova.