Sikepaskro 3 - O Debleskro Lab 2024 (Sinte-Manouche)

I čačo tsiro halautereske

¹ Halauter, hoy djal ap i phoub, koles hi peskro tsiro. Halauter, hoy krah, djal an o čačo tsiro:

² Yek tsiro hi koy, kay o mensho boldo vella, oun yek tsiro hi koy, kay o mensho merella; yek tsiro, kay čivah zenlepen an i phoub, oun yek tsiro, kay vell ko zenlepen pale vin tserdedo.

³ Dell yek tsiro, kay vell maredo, oun yek tsiro, kay vell o doukepen sasto; yek tsiro, kay vell o kheer tele phagedo, oun yek tsiro, kay vell o kheer pre-čiddo.

⁴ O ropaske hi yek tsiro, oun o sapaske hi yek tsiro. Dell tsirya, kay rovell maro dji, oun vavar tsirya, kay khelah i barhtyatar.

⁵ Yek tsiro hi koy, te vitsras barra, oun yek tsiro, te čivas barra khetne. Dell yek tsiro, kay taprah men trouyel, oun yek tsiro, kay taprah men bouder gar trouyel.

⁶ Yek tsiro hi koy, te rodas čomone, oun yek tsiro, kay rodah bouder gar. Yek tsiro hi koy, kay rikrah čomone, oun yek tsiro, kay vitsrah les krik.

⁷ Koy hi yek tsiro, kay krenn i menshe pengre koola paash, oun yek vavar tsiro, kay sivenn le penge neve koola. Koy hi yek tsiro, kay rakrah gar, oun i vavar tsiro, kay rakrah.

⁸ Koy hi tsirya, kay i menshe kamenn pen, oun tsirya, kay čingrenn le ap i vavarende. Dell tsirya, kay djivah an o kourepen, oun vavar tsirya, kay dell kek kourepen.

⁹ Hoy vell koleske vin, kay krell peskri boudi oun marell pes tele?

¹⁰ Me lom koy boudi an o yak, hoy das o Devel i menshende, kolah marenn le pen tele.

¹¹ Hako koova, hoy o Devel krell, krell lo ap o čačo tsiro. Oun yob čivas o mensheske an o dji, te hayvell lo, kay hi čomone koy, hoy ačell hako tsiro. Ninna te hi kova yaake, nay hayvell o mensho gar ko tselo koova, hoy o Devel krell, kokres tikne kotya kolestar.

¹² Doleske penom mange: Či hi feteder o mensheske, har te djivals lo i shoukar djipen oun hi barhtelo koy pashel.

¹³ Yaake nay penah: Mer te rhas, piyas oun boudras i barhtelo djiyeha. Kova lauter vell men o Deblestar.

¹⁴ Me hayvom, kay halauter, hoy o Devel krella, hako tsireske ačella. Kek mendar nay krell čomone pashel, oun kek mendar nay lell čomone krik. Kova halauter krell o Devel, te sharas mer les.

¹⁵ Hoy kanna koy hi, his glan mende koy. Oun hoy pal mende vella, his ninna koy. Oun o Devel anell pale, hoy yek kopo koy his.

O mensho ačell gar

¹⁶ Ninna dikom ap i phoub, kote kay hounte rakrans i čačepangre o čačepen, his o čilačepen o ray. Oun kote, kay hounte djans le pal o čačepen, rakran le rhorhepah.

¹⁷ Kote penom mange: O Devel rakrell o čačepen vin pral koleste, kay djivell an o čačepen, oun pral koleste, kay djivell an o čilačepen. Hako koova, oun halauter, hoy yek krell, koleske dell i čačo tsiro.

¹⁸ Me penom mange: Halauter djal yaake, te dikell o Devel, har hako mensho pes rikrella. Oun yob kamell les te sikrell, te hi lo gar feteder har i firho.

¹⁹ O mensheske djal har o firheske: I firhe merenna, yaake merenn ninna i menshe. Oun len halauter hi i dourho. Oun o menshes hi či glan-vi glan o firho. Čačepah, kova hi phares te hayvell.

²⁰ Halauter hounte merell, hako djipen vas dran i čik, oun hako djipen vell pale čik.

²¹ Kek nay djinell, te djal o mensheskro dourho pral an o bolepen oun o firheskro dourho tele an i phoub.

²² Yaake dikom dren, či hi feteder, har te krell i mensho barhteles peskri boudi; i barhtelo dji hi leskro bravlepen. Kek nay penell o mensheske, hoy ap i phoub djala, te hi lo bouder gar koy.