Sikepaskro 2 - O Debleskro Lab 2024 (Sinte-Manouche)

O bravlepen anell kek barht

¹ Me penom mange: Mishto palle, me kamau lačes te djivell oun moukau les mange mishto te djal! Kote hayvom, kay kova ninna čičeske hi.

² Me hatsom vin, kay ninna o sapen dinlepen hi! Oun o gipen an tiro dji anell touke či.

³ An miro rodepen pal o gosvepen rakrom miro djiyeha, oun penom mange: Pi touke i mool, te vess barhtelo. Oun yaake har i dinelo vom mato. Koy poučom mandar: Hi savo koova mishto o mensheske an peskro tikno djipen?

⁴ Me krom baro koova: Me krom mange khera oun drakengre themma,

⁵ oun vavar kotya them, kay čivom shoukar bourra oun rouka an i phoub, ninna save rouka, kay hidjrenn roukengre.

⁶ Me krom mange tikne panya, te vell man doha pani kol boud roukenge.

⁷ Me ginom mange boudepangren, morshen oun djouvyen. Oun man his ninna boudepangre, kay van boldo an miro kheer. Man his boudeder groumya oun bakre har halauter, kay glan mande i bare raya an o foro Yerusalem his.

⁸ Me lom mange ninna roup oun sonakay khetne, oun hoy vavar raya oun themma man dan. Me moukom gipangren pash mande khetne te vell, morshen oun djouvyen. Oun man his yaake boud djouvya har kamom, te krenn le man barhtelo.

⁹ Oun me vom baro oun bareder har hakeno, kay glan mande o ray an o foro Yerusalem his. Oun ko tselo koova, hoy kote krom, krom o gosvepah.

¹⁰ Halauter hoy mire yaka kaman, kova dom len. Oun miro djiyeske dom halauter, hoy moukas les te bashrell. Yaake vom barhtelo pral halauter hoy krom. Oun halauter, koleske man tele marom, anas mange čačepah barht an o dji.

¹¹ Oun har dikom ko tselo koova, hoy mire vasta kran, oun koy boudi, hoy man koy pashel his, kote hayvom, lauter hi čičeske, har te nashoms pal o dourho, hoy djal pral i phoub. Oun či vell vin dran halauter, hoy krom an miro djipen.

O goseveske oun o dineleske djal emligo

¹² Kote djom trouyel, te dikap, hoy vell dran o gosvepen vin? Hi kova vavarčandes har kova, hoy vell dran o narvlepen oun o dinlepen vin? Hoy krell ko morsh, kay pal mande o baro ray hi? Kova hoy glan leste kerdo vas, krell yob ninna!

¹³ Me dikom, o gosvepen hi feteder har o dinlepen, yaake har o dives feteder hi har i rati.

¹⁴ Kova, kay gosevo hi, dikell, kay lo djal. O dinelo nashell an i rati. Oun ninna hayvom, yekeske djal har o vavareske.

¹⁵ Kote penom mange: Te djal mange har o dineleske, hoske rodom palle pal o gosvepen? Ninna kova hi čičeske.

¹⁶ I goseve hounte merenn, oun i dinele ninna. Oun ko gosevo vell yaake sik bistedo har ko dinelo. An i tsirya kay venna, hi halauter bistedo.

¹⁷ Kote his mange miro djipen bouder gar shoukar. Kova, hoy i menshe krenna ap kay phoub, hi čičeske. Halauter hi čičeske, oun yaake har te nashals yek pal o dourho, hoy djal pral i phoub.

Dell i čači barht an o djipen?

¹⁸ Oun kova halauter, koleske man tele marom an miro djipen, hounte moukap yekeske, kay pal mande vell. Doleske his mange kova vitar gar shoukar.

¹⁹ Koon djinell, koon kova hi, kay pal mande vell, i gosevo morsh oder i dinelo morsh? Vell har vella! Yob vell o ray pral halauter, koleske man tele marom oun goseves pre čivom an miro djipen. Yaake hi kova ninna čičeske.

²⁰ Ava, miro dji peras an i rati pral koleste me man tele marom an miro djipen.

²¹ Kova, hoy i mensho gosvepah oun lače vastentsa kras, hounte moukell lo halauter i vavareske, kay kras či koleske. Kova hi ninna čičeske oun i bari bibarht.

Hoy o mensheske ačella

²² Hoy ačell o mensheske, kay pes tele boudras oun tele maras pash peskri boudi?

²³ Leskro tselo djipen hi pherde douka, oun leskro boudepen pherdo ropen. Ninna an i rati nay sovell lo gar. Kova hi ninna čičeske.

²⁴ Či hi feteder o mensheske, har te rhal lo oun piyell lo oun vell barhtelo pral kova, hoy lo krell. I barhtelo dji, kova dikom, vell dran o Debleskro vast.

²⁵ Kekes hi rhapen, oun kek nay moukell les peske mishto te djal, te dell les o Devel kova gar!

²⁶ Kol menshe, kay djivenn yaake har glan o Debleste mishto hi, kolla lenna lestar gosvepen oun barht an o dji. Kolla, kay djan o Debleskro dromestar tele, kolen moukell lo te boudrell oun bravlepen khetne anell, hoy pal i tsiro i vavareske vell, yekeske, kay djivell yaake har glan o Debleste mishto hi. Palle his leskri tseli boudi čičeske, oun yaake har te nashals lo pal o dourho, hoy djal pral i phoub.