Sikepaskro 12 - O Debleskro Lab 2024 (Sinte-Manouche)1 Yaake rah har terno hal, ma biste koles, kay tout kras! Oun djin, te venn kol čilače divessa oun kol bersha, kay tou peneh: “Yon hi mange gar mishto”! 2 Palle hi touke, har te vals o kham tamlo, ninna o čon oun o bolepangre momlia. Oun pal hako brishin, venn pale neve volke. 3 Palle trissenn tire moussya, hoy yaake zorelo his. Oun tire herya, hoy hidjran tout, len hi bouder kek zoor. I danda perenn touke vin, yek pal o vavar. Tire yaka dikenn bouder gar mishto, 4 oun tire kanda shounenn bouder gar mishto. Te deh tou gole, hi kaya har i čirklengro ropen. Oun tou hayveh bouder gar te givell. 5 Tout hi traash glan i treppa. Oun ap o drom nay pereh. Tire balla venn parno. Oun tou tserdeh tout yek rigyatar ap i vavar. Tout hi bouder gar boud bok. O mensho hounte djal peske kote, kay ačell lo hako tsiro. Oun i vavar paskrenn les oun rovenn ap o drom. 6 Maro djipen hi har i roupeni verkli, hoy perell an kotya, har i sonakaskro čaro, hoy phagell, har o khoro, hoy djal an kotya pash i brounna, oun har o shello, hoy djal paash, te tserdeh pani dran i brounna pre. 7 O mensho vell pale phoub, kolatar yob kerdo vas. Oun o dourho hounte djal pale pash o Debleste, kay das o dourhes o mensheste. 8 Halauter hi čičeske, penell o sikepaskro, čičeske hi halauter. Kal laba rakrell o sikepaskro pral peste 9 Kava koova ačell oun hounte vell penlo: O sikepaskro his i gosevo morsh oun penas i menshenge čače laba. Yob moukas peske boud goseve laba an o shero trouyel te djal. Yob rodas, hoy kaman le te penell oun činas len tele. 10 Yob rodas, te hatsell lo kamle laba. Oun yob činas pre, har čomone čačepah hi. 11 I laba, hoy i goseve rakrenna, hi har soubya. Oun kova, hoy le penenn, djal dour an o mensheskro dji. Kova, kay rakras len, hi har i bakrengro, kay dell garda ap peskre bakre. 12 Miro čavo, koy hi i vavar koova, hoy hounte djiness: Yek, kay kamell lila te činell, las pes boud phari boudi glan. Oun yek, kay kamell boud te hayvell oun te djinell, vell khino. 13 Kova lauter, hoy kate penlo vas, hi khetne lino kova: Shoun ap o Debleste oun rike leskre laba! Kova molell i tsele menshenge. 14 O Devel rakrell o čačepen vin pral halauter, hoy kram, ko lačo oun ko čilačo koova, ninna te hi kova kanna khatedo. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.