Sikepaskro 11 - O Debleskro Lab 2024 (Sinte-Manouche)Mer nay djinah gar halauter 1 Vitse tiro maro ap o pani; oun tou hatseh les pale pal boud divessa. 2 Phage tiro maro an kotya, oun de les efta, orhta menshenge; tou djineh gar, havi bibarht vell pral kay phoub. 3 Te hi i volke pherdo pani, palle denn le brishin ap i phoub. Oun te perell i rouk – nay vell ap i čači rig, nay vell ap i servi rig – kote kay lo perella, kote ačell lo čiddo. 4 Koon ap o phourdepen garda della, ko čivell kek djob an i phoub, te vell kova baro. Oun koon ap i volke garda della, ko anell gar o baro djob an peskro kheer dren. 5 Tou djineh gar havo drom o phourdepen djala, oun har i kokale kerdo venna an i dakro per. Yaake nay djineh tou vitar gar, hoy o Devel halauter krella, oun har yob halauter krella. 6 Doleske čip o djob taysarla an i phoub, oun mouk gar tele bis an i rati. Tou djineh gar, hoy bares vella, kava te kova, oder hake douy. Ma biste o Debles! 7 Shoukar hi menge, te dikas i momeli. Oun mare yakentsa hi mishto, te dikenn le o kham. 8 I mensho, te djivell lo boud bersha, mou vell lo barhtelo pral hako bersh, kay djivell lo. Mou bistrell lo gar, te venn kale divessa. Ninna kolla hi boud. Halauter, hoy vella, hi menge khatedo. Ab barhtelo yaake rah, har terno hal! 9 Terno morsh, mouk tiro dji te givell an tire terne bersha! Ab barhtelo yaake rah, har terno hal. Kre, hoy tiro dji touke penella oun tire yakentsa mishto hi; oun biste gar, te vell i dives, kay rakrell o Devel o čačepen vin pral toute oun halauter, hoy kral. 10 Dja koleske dran o drom, hoy anell touke rholi oun douka. Ko tsiro, kay hal i čavo oun i terno morsh, hi sik trouyel. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.