Sikepaskro 10 - O Debleskro Lab 2024 (Sinte-Manouche)Gosvepen oun dinlepen 1 Moule matsille an o soungepaskro djet krenn o lačo djet foulles. I tikno dinlepen nay krell o tselo gosvepen oun an-dikepen i menshestar paash. 2 O goseveske penell leskro dji, te krell lo, hoy čačo hi. O dineleske penell leskro dji, te krell lo, hoy gar čačo hi. 3 I narveleskro drom sikrell, har dinelo yob hi. Lauter penenn lestar: Havo narvelo hi lo! 4 Te vell o rayeskri rholi pral toute, palle ma dja toutar; yek kay hayvell te rikrell lo pes pale, rakrell yaake, te djal i rholi krik. 5 I djoungelo koova dikom ap kay phoub, kova anenn i zorele pale te pale ap pende: 6 I dineleske denn le peskri beshepaskri kote, kay i pralstoune beshenna, oun i bravele hounte beshenn pen ap i telstoune beshepangre. 7 Boudepangren dikom, kay ap graya beshde hi, oun pralstoune hounte nashan har boudepangre. 8 Koon i rheb vin hadella, nay perell koy dren. Oun koon i massouri khetne phagella, koles nay dandrell i sap. 9 Koon barra khetne phagella, kova nay doukrell pes koy pashel. Oun kova, kay kasht tiknes krella, nay doukrell pes, te dell lo gar garda. 10 Te hi yekes i tover, hoy činell bouder gar, hounte boudrell yob peskri tseli zoryah. Te hi lo gosevo, dikell lo palla, te činell o tover mishto. 11 I morshes, kay hayvell mishto o sapeha te rakrell, hi či kolestar, te vell yob dandedo, glan te dourkras lo o sap. 12 O rakepen hoy dran o goseveskro mouy vin vella, anell leske an-dikepen, o dineleskro rakepen rhal les pre. 13 Hako lab, hoy penell lo, hi foun glanstounes bis palstounes dinelo rakepen. 14 Ko dinelo krell boud laba oun hayvas gar, kay kek mensho djinella, har halauter vella. Oun kek nay penell leske, hoy pal leste vella. 15 I boudi krell o dineles khino, oun yob djinell gar, har te hatsell lo o drom an o foro. 16 Djungeles djal i menshenge an i them, koleskro baro ray i čavo hi, oun kay i pralstoune taysarlakro rhapangre hi! 17 Barhtelo hi ko them, kay o baro ray i an-diklo morsh hi, oun i pralstoune an o čačo tsiro lačes rhana, har an-dikle morsha oun gar har mate. 18 Te kamell yek gar te boudrell, perell leskro kheer khetne, oun o brishin vell dren. 19 Kones rhapen hi, nay sal. Koon mool piyell, nay givell. I loventsa nay vell tout kova halauter. 20 Ma praase o baro rayes, vitar gar an tiro dji! Oun ma praase i braveles, vitar gar an tiro čiben, kay tou tout pasheh. I tikno čirklo nay shounals tout, oun penals doureder, hoy penal. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.