Sikepaskro 1 - O Debleskro Lab 2024 (Sinte-Manouche)Halauter hi phares te hayvell 1 Kalla hi i laba, hoy o sikepaskro rakras. Yob hi i Davideskro čavo oun o baro ray an o foro Yerusalem. 2 Phares te hayvell hi halauter, penas o sikepaskro, halauter an o djipen hi phares te hayvell. 3 Hoy lell o mensho peske dran peskri tseli phari boudi, hoy les hi ap kay phoub? 4 Menshe venna oun djana. Kokres i phoub ačell, har li hi. 5 O kham djal pre oun djal pale tele, oun nashell kote, kay lo pale pre djal. 6 O dourho tel o bolepen phourdell an yek rig, oun palle rissrell lo oun phourdell an i vavar rig, kay his lo. 7 I tsele tikne panya nashenn an o baro pani. Oun o baro pani vell gar pherdo. Oun o pani vell pale kote, kay lo his, oun kotar nashell lo pale. 8 Khines krell man halauter, hoy i menshe rakrenna, oun kek nay hatsell i čače laba. O yak nay dikell pes gar čales, oun o kand nay shounell pes gar čales. 9 Hoy koy his, hi hoy vella, oun hoy kerdo vas, hi hoy kerdo vella. Kek nevo koova hi tel o kham! 10 Dik kova, penenn le, ko hi nevo! Ninna kova his glan maro tsiro koy, an kol tsirya kay glan mende his. 11 Mer bistrah kol menshen, kay glan mende djivan. Oun kolla, kay pal mende venn, venn bistedo kolendar, kay pal lende venn. O rodepen pal o gosvepen 12 Me, o sikepaskro, me homs o ray pral o them Israel oun djivom an o foro Yerusalem. 13 Miri tseli djiyeskri zoryah oun gosvepah rodom, te hayvap o tselo koova, hoy ap i phoub halauter kerdo vella. Havo pharepen das o Devel i menshende, te marenn le pen tele koleha. 14 Me dikom halauter, hoy kerdo vas ap kay phoub, oun nay penau t'menge, halauter hi čičeske, oun yaake har te nashals yek pal o dourho, hoy djal pral i phoub. 15 Tou nay kreh gar čačo, hoy bango hi. Oun hoy gar koy hi, nay vell gar ginlo. 16 Me penom mange: Me vom i baro morsh, gosveder har hakeno, kay glan mande o baro ray an Yerusalem his. Man hi i gosevo dji oun hayvau boud. 17 Miri tseli djiyeskri zoryah kamom te hatsap vin, hoy čačepah gosvepen hi, oun hoy dinelo oun narvelo hi. Oun kote hatsom vin, kay kova yaake hi, har te nashoms pal o dourho, hoy djal pral i phoub. 18 Kones boud gosvepen hi, koleske djal ninna boud an o shero trouyel. Koon boud djinell, koleske vell ropaske pral kova. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.