Ruth 2 - O Debleskro Lab 2024 (Sinte-Manouche)

I Ruth boudrell ap i kotar phoub, hoy o morshes Boas hi

¹ Koy his i morsh, leskro lab his Boas. Kova his i menshendar i Naomyakro romestar Elimelek, oun his i an-diklo morsh.

² His i dives, koy penas i Ruth ap i Naomi: “Me kamau ap i harhetikri phoub te djal oun djob pre te hadell, hoy čiddo ačas. Djau pash yekeste, kay lačo hi ap mande oun moukell man kova te krell.” Oun i Naomi penas: “Dja miri čay!”

³ Koy djas li vin, kolenge palla, kay o djob činenn, oun hadas djob pre ap i harhetikri phoub. Oun kova vas yaake, kay kava kotar phoub o Boases his, ko morshes dran o Elimelekeskri familya.

⁴ Pal i tsiro vas o Boas dran o foro Betlehem oun penas ap peskre boudepangre, kay o djob činenn: “O baro Devel vell t'mentsa!” Oun yon penan ap leste: “O baro Devel dell tout peskri barht!”

⁵ Oun o Boas poučas o pralstunestar mank i boudepangre: “Have menshendar hi koy terni djouvel?”

⁶ Oun ko pralstouno boudepaskro penas: “Koya hi dran o them Moab, oun vas khetne i Naomi foun kotar pale.

⁷ Oun yoy mangas, te djal li pal i činepangre, te hadell li djob pre, hoy čiddo ačas. Oun taysarlake vas li oun ačas bis kanna, oun las pes gar boud tsiro, te beshell li pes.”

⁸ Koy penas o Boas ap i Ruth: “Miri čay, shoun ap mande! Dja ap kek vavar kotar phoub, te hadess djob pre! Ač kate, oun rike tout pash i djouvyende, kay kate boudrenna.

⁹ Dik, te ačess pash lende oun dja lenge palla! I morshenge, kay kate boudrenn, penom me, te taprell tout kek an. Te hi tout troush, dja pash i khore oun pi pani, hoy i boudepangre anan.”

¹⁰ Kote vitsras li pes glan leste tele ap i phoub oun penas ap leste: “Hoske hal tou yaake lačes ap mande, kay me dran o vi-them hom?”

¹¹ O Boas penas ap late: “Mange vas lauter penlo, hoy tou ap tiro romeskri dake lauter kral pal tiro romeskro merepen, te moukal tiro dades oun tiri dat oun tiro them oun djal pash menshende, kolen tou glan kova gar prindjral.

¹² O baro Devel mou dell tout ko lačepen pale, hoy tou lake kral! Yob, o baro Devel, ko Devel pral o Israel, pash koleste tou val, oun tel koleskro vast tout khatral, yob te dell tout i shoukar bravlepen halautereske, hoy kral.”

¹³ Yoy penas leske: “Tou hal yaake lačo ap mande, miro ray! Tou rakral lačes ap mande oun kral miro dji pale zoreles, ninna te hom me kek kol djouvyendar, kay touke boudrenna.”

¹⁴ Oun har vas o tsiro rhapaske, penas o Boas lake: “Ab kate kay, oun le touke maro oun čip les an o shout!” Koy beshas li pes pash kolende, kay činenn o djob tele. Oun yob das late peklo djob an o vast. Oun yoy rhas lentsa oun vas čalo, oun moukas čiddo, – yaake boud his lat.

¹⁵ Oun har li pre stas, te hadell li pale djob pal lende pre, penas o Boas ap peskre boudepangre: “Moukenn lat ninna mank ko khetne pandlo djob pre te hadell! Ma tradenn lat krik!

¹⁶ Tserdenn ninna dran o khetne pandlo djob čomone lake vin! Oun moukenn les lake čiddo, te nay lell li les peske khetne. Oun ma čingrenn doleske ap late!”

¹⁷ Oun yaake las li djob koy khetne bis ap i rat. Oun har li o djob vin das, hoy yoy khetne las, koy his kova yaake deesh-te-efta kilogramme djob.

¹⁸ Oun yoy hidjras lauter an o foro oun anas les peskro romeskri dake, oun das lat ninna ko peklo djob, hoy pral ačas lakro rhapastar.

¹⁹ Kote penas i Naomi ap late: “Kay hals tou kava dives? Oun kay lal tou kava khetne? O Debleskri barht vell ap koleste, kay yaake lačes his ap toute!” Oun i Ruth penas ap i Naomi, pash koneste yoy his oun djob khetne las, oun penas lake ninna: “Ko morsh, pash koleste me kava dives boudrom, kharell Boas.”

²⁰ Kote penas i Naomi ap i Ruth: “O baro Devel mou čivell peskri barht ap leste! O baro Devel tserdas peskro lačepen gar pale, – gar i djidendar, vitar gar i moulendar.” Oun pale penas i Naomi ap late: “Tou hounte djiness, ko morsh hi yek mare menshendar. Yob hi yek kolendar, kay pal maro čačepen menge ap i rig hounte venn.”

²¹ I Ruth penas: “Yob penas ninna ap mande: Rike tout pash mire boudepangre, bis te anan le o tselo djob dren.”

²² Oun i Naomi penas ap i Ruth: “Kova hi mishto, miri čay, te djah tou kol djouvyentsa vin, kay leske boudrenna. Te djals tou ap i vavareskro kotar phoub, nay vals, te taprell yek tout an.”

²³ Oun yaake rikras li pes pash kol djouvyende, kay o Boaseske boudran, oun las djob khetne an ko tselo tsiro, kay anan le o djob oun o gib dren. Oun pal kay tsiro ačas li khere pash peskro romeskri date.