Ruth 1 - O Debleskro Lab 2024 (Sinte-Manouche)

O Elimelek oun leskri familya djan an o them Moab

¹ An ko tsiro, har i čačepangre morsha i raya pral o Israel his, vas i bari bok an o them. Oun i morsh dran o foro Betlehem an o them Youda djas an o them Moab, te djivell lo koy peskri romyah oun peskre douy morsh čaventsa.

² Leskro lab his Elimelek. Oun leskri romni kharas Naomi. Oun leskre douy čave kharan Malon oun Kilyon. Oun yon his dran i familya Efrat dran Betlehem an o them Youda. Oun yon van an o them Moab oun ačan koy.

I Naomi nashrell peskro romes oun peskre douy morsh čaven

³ Kote meras o Elimelek. Oun leskri romni Naomi ačas kokres pale peskre douy čaventsa.

⁴ Oun kolla lan penge romyen dran o them Moab; oun koy yek kharas Orpa oun koy vavar Ruth. Oun yon djivan kote yaake deesh bersha,

⁵ koy meran ninna o Malon oun o Kilyon. Oun koy djouvel ačas kokres pale, lat his bouder kek čaven oun bouder kek romes.

⁶ Oun yoy shounas, te kras o baro Devel peskro dji pre peskre menshenge an o them Youda, oun das len maro. Koy las li peskro koova khetne, te djal li peskre čavengre romyentsa dran o them Moab pale pale.

⁷ Oun yoy djas peske dran o gab, kay le yek tsiro djivan. Oun lakre douy čavengre romya djan lah. Oun ap o drom pale an o them Youda,

I Ruth moukell gar peskro romeskri dat

⁸ penas i Naomi ap lende: “Kanna djan pale pale, hakeni an lakri dakro kheer! O baro Devel mou dell t'men peskro lačepen, yaake har t'mer lačes hans ap t'mare romende oun ap mande.

⁹ O baro Devel mou dell t'men, te hatsenn t'mer pale i romes, pash koleste khere han.” Oun yoy čoumras len. Oun yon rovan zoreles

¹⁰ oun penan ap late: “Na-a, mer kamah touha pale te djal pash tire menshende.”

¹¹ I Naomi penas: “Djan khere, mire ča! Hoske kamenn t'mer mantsa te djal? Me hom bouder gar terni doha, te lap čave, te nay vans le t'mare romma.

¹² Djan khere, mire ča! Me hom phouri, te romedinerap bouder gar. Ninna te nay kroms kova oun loms kay rat i romes, oun anoms morsh čaven ap i phoub,

¹³ kamans t'mer ko tselo tsiro kek romeha te djivell, – yaake rah bis te yon bares doha vans? Ma krenn kova, mire ča! O baro Debleskro vast hi phares ap mande čiddo. Kamau gar te hidjrenn t'mer miro pharo djipen mantsa.”

¹⁴ Har le kova shounan, rovan le gomme boudeder. Oun i Orpa čoumras peskro romeskri dat oun djas peske. I Ruth kamas lat gar kokres te moukell.

¹⁵ Koy penas i Naomi ap i Ruth: “Dik, i Orpa djas pale pash peskre menshende oun pash peskro debleste. Dja tou ninna pale lake palla!”

¹⁶ I Ruth penas: “Rake gar ap mande dren, te moukap tout! Me moukau tout gar. Kay tou djah, djau me ninna. Kay tou ačeh, ačau ninna. Tire menshe hi mire menshe. Oun tiro Devel hi ninna miro Devel.

¹⁷ Kote kay tou mereh, kamau ninna te merell. Oun kote kamau me paskedo te vell. O baro Debleskri rholi vell pral mande, te rikrau gar, hoy touke penom. O merepen kokres nay činell men, – ko yekes o vavarestar.”

¹⁸ Oun har i Naomi dikas, te moukell pes i Ruth gar tele anell, te djal li lah, moukas li tele te rakrell li ap late dren.

I Naomi oun i Ruth venn an o foro Betlehem

¹⁹ Yaake djan kol douy khetne, bis te van le an o foro Betlehem. Oun har yon an Betlehem dren van, his o tselo foro ap i herya, oun i djouvya poučan: “Hi kaya čačepah i Naomi?”

²⁰ Yoy penas ap lende: “Penenn gar Naomi ap mande! Denn man Mara gole! O zorelo Devel kras miro djipen shoutlo.

²¹ I pherde vastentsa djom me vin, oun pale moukas man o baro Devel te vell i vastentsa, kay či dren hi. Denn man bouder gar Naomi gole! O baro Devel hi bouder gar ap miri rig. Ava, o zorelo Devel anas bibarht ap mande.”

²² Yaake vas i Naomi pale dran o them Moab. Oun lah vas lakro čaveskri romni, i Ruth. Kaya his i djouvel dran o them Moab. Kova his an ko tsiro, kay lan le o djob dren, har van le an o foro Betlehem.