Ropaskre gilja 5 - O Debleskro Lab 2024 (Sinte-Manouche)An men pale pash toute pale! 1 Baro Devel, ma biste, hoy mentsa djas! Dik ap mende oun dik mari ladj! 2 Ko them, hoy men dal, hi an i vavarengro vast. Oun an mare khera djivenn vi-themarya. 3 Mouklo ham, mare dada hi bouder gar koy. Mare daya hi har djouvya, kolengro rom meras. 4 Maro pani hounte playsras mare loventsa, oun maro kasht hounte playsras ninna. 5 Kolla, kay men palla lenna, beshenn menge ap i meen. Ninna te ham khino, moukenn le men gar tele te beshell. 6 Mer hounte rikras mare vasta i themma Egiptia oun Assour koy, te vell men i kotar maro, te bokas gar. 7 Mare phoure anan doosh ap pende, oun djivenn bouder gar. Mer kitse kay ham, hounte hidjras lengri tseli doosh. 8 Boudepangre hi i raya pral mende, oun kek hi koy, kay lell men vin dran lengre vasta. 9 Te djah vin, te las rhapen dren, hounte daras maro djipaske. Kourepangre dran o moulo them kamenn men o rhareha te marell. 10 Har te hams an i bob, rhačell mari hauta koy bari bokatar. 11 I djouvyen an o foro Sion tapran le zoryah an, ninna i terne čen an i forya o themestar Youda. 12 I pralstoune morsha van lendar i doryentsa pre pandlo, oun ap i phourende dikan le gar pre. 13 Terne morsha hounte hidjran yarrengre barra, oun čave peran tel o boud kasht, hoy hounte hidjran le. 14 I pralstoune hi bouder gar beshdo an o foreskro voudar. Oun i terne morsha bashrenn bouder gar ap i doryengre bashepangre. 15 Mare djia givenn bouder gar, maro khelepen hi kanna maro ropen. 16 Mer nashram maro raylepen. Mari doosh, hoy anam ap mende, anas men an i bibarht! 17 Doleske hi maro dji nasselo, oun mare yaka vi-rovedo, 18 te dikah mer ap i berga Sion, kay li yaake moulo koy čiddo hi, oun i divye djoukle pral late nashenna. 19 Tou, baro Devel, hal hako tsiro koy. Tou hal oun ačeh o ray hako tsireske. 20 Hoske kameh tou men te bistrell, oun maro tselo djipen či mendar te djinell? 21 An men, baro Devel, pale pash toute, te vas pale khere! Kre, te djal menge pale lačes har an o phouro tsiro! 22 Vitsral men toutar krik hako tsireske? Nay djal tiri rholi pral mende gar krik? |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.