Ropaskre gilja 3 - O Debleskro Lab 2024 (Sinte-Manouche)

Nevi zoor an i bari bibarht

¹ Me hom ko morsh, koon djinell, har kova hi, te dell o baro Devel dava an peskri rholi.

² Man anas lo doureder oun doureder an i kali rati, oun kek momeli his koy.

³ Kokres ap mande hadas lo peskro vast o tselo dives.

⁴ Yob kras miro mass oun miri hauta phoures, oun mire kokale phagas lo an mande khetne.

⁵ Haki rigyatar pandas lo man dren, douka oun daar hi troul mande.

⁶ An kali rati moukell lo man te djivell, har kolla, kay meran glan i rah tsiro.

⁷ Yob čivas i massouri troul mande, te nay vau gar vin, oun čivas sasterne shelle troul mire pire.

⁸ Ninna te dau gole oun mangau les, kamell lo miro mangepen gar te shounell.

⁹ Ap miro drom čivas lo bare barra. Kay me ninna djau, vau gar doureder.

¹⁰ Yob louras mange pre, har te vals lo i čilačo divyo firho, oun har i levo an peskro khatepen.

¹¹ Yob tserdas man tele o dromestar, dandras man an kotya, oun moukas man čiddo.

¹² Yob tserdas peskro bogo pre, te dell lo karye ap mande.

¹³ Yob das peskre fayle an mire bouke karye.

¹⁴ I sapen hom mire tsele menshenge. I sapaskri gili hom lenge o tselo dives.

¹⁵ Shoutlo zenlepen das lo man rhapaske, oun shoutlo pipen te piyell.

¹⁶ Yob stakras man an i čik, te dandrap ap barra.

¹⁷ Me bistrom, hoy i lačo djipen hi. Oun djinau bouder gar, hoy barht hi.

¹⁸ Kote penom mange: Me nay djivau bouder gar, oun nay patsau bouder gar, te vell o baro Devel ap miri rig.

¹⁹ Te dikau, har djoungeles mange djal, oun har mouklo hom, hi kova mange har i shoutlo pipen, hoy nasselo krell.

²⁰ An miro shero djal kova halauter trouyel, oun miro dji hi tele rikedo.

²¹ Yek koova bistrau gar – ap kova rikrau zoreles:

²² O baro Debleskro lačepen herell gar pre, leskro kamlepen hi hako tsiro menge koy.

²³ Haki tsalla hi menge leskro kamlepen oun lačepen neves koy. Kova hi yaake čačo, har o kham pre djal!

²⁴ Me penau mange: O baro Devel hi halauter, hoy man hounte vell; doleske dikau ap leste.

²⁵ Lačes hi o baro Devel koleske, kay dikell ap leste, oun rodell les o tselo djiyestar.

²⁶ O feteder koova hi, te dikas mer pokones ap o baro Debleste, te vell yob menge ap i rig.

²⁷ Mishto hi i mensheske, te hidjrell lo, hoy o Devel leske bičras, yaake rah har lo terno hi.

²⁸ Te čivell o Devel i pharepen ap leste, mou beshell lo pes kokres oun rakrell gar.

²⁹ Peskro mouy mou čivell lo tele an i čik, Nay vell i tsiro, kay djal leske pale feteder.

³⁰ Te lell lo i čamedini, mou te rikrell lo peskri čam koleske koy, kay dell les. Mou rikrell lo o praasepen vin!

³¹ O baro Devel moukell men gar hako tsireske.

³² Ninna te doukell lo yekes, vell lo leske pale kamles. Yaake baro hi leskro lačepen.

³³ Yob hi gar barhtelo, te dell lo i menshes peskri phagi, oun anell o ropen pral leste.

^34-36 Čačepah, o baro Devel dikell, te venn i tsele pandle an i them khetne stakedo. Les, o Debles pral halauter, hi glan i yaka, te vell i mensheske peskro čačepen krik lino, oun pral i mensheskro koova rhorhepen pre anlo vell.

³⁷ Koon hi kova, kay penas Kova te vell oun yaake vas. Hi kova gar o Devel, kay penell, te vell čomone?

³⁸ Kova hi o Devel pral halauter, kay penell, te vell i bibarht oun ninna i barht.

³⁹ Har nay penell i mensho i ropah: “O Devel djal gar mishto mantsa trouyel.” Vals feteder te rovals lo pral peskri doosh!

⁴⁰ Dikas ap maro djipen, har mer djivah, oun rissras trouyel pash o baro Debleste.

⁴¹ Hadas mare djia, ninna mare vasta pre o Debleske an o bolepen!

⁴² Mer anam doosh pral mende kokres, oun shounam gar ap toute. Kova bistral tou menge gar.

⁴³ Tou čakral tout an tiri rholi, oun lal men palla, oun maral men. Oun tout khaytam mer gar.

⁴⁴ Tou khatral tout an i folka, te nay vell maro mangepen gar glan toute.

⁴⁵ Tou kral, te vam har čik oun foulepen i menshenge an i vavar themma.

⁴⁶ Halauter, kay rhoyedo ap mende hi, praasenn men.

⁴⁷ Traash oun daar vas ap mende. Troul mende phagell oun perell halauter khetne.

⁴⁸ I sva nashenn dran mire yaka tele, te dikau har djoungeles mire menshenge djal.

⁴⁹ Mire sva nashenn oun nashenna, oun me nay moukau gar tele miro ropah,

⁵⁰ bis te dikell o baro Devel dran o bolepen tele, oun lell men pale an o yak.

⁵¹ Mire yaka doukenna, te dikau, har i djouvyenge an miro foro djala.

⁵² Kolenge či krom, kolla lan man palla, har te voms i čirklo.

⁵³ Yon vitsran man djides an i brounna, oun vitsran barra ap mande.

⁵⁴ Pani djas pral miro shero; kote penom: Kanna hom nashedo.

⁵⁵ Baro Devel, tiro lab dom gole, dour tele dran i phoub shounal miri gole:

⁵⁶ “Ma khate tire kanda glan miro ropen oun glan mire golya!”

⁵⁷ Har kharom tout golyah, val tou pash mande, oun penal: “Ma traash bouder gar!”

⁵⁸ Miro ray, tou lal miro koova an tiro vast, oun lal miro djipen dran o merepen.

⁵⁹ Baro Devel, tou dikeh, har mange čilačepen kerdo vella! De tou mange miro čačepen!

⁶⁰ Tou dikeh, har yon kamenn man čilačepen pale te dell, oun tou prindjreh, hoy an lengro shero trouyel djala, oun hoy kamenn le mantsa te krell.

⁶¹ Baro Devel, tou shouneh lengro praasepen, oun halauter, hoy le khetne rakrenna, te krenn le mantsa.

⁶² Tou shounal o rakepen kolendar, kay hadenn pen ap mande, oun hoy le pal o vast pral mande rakrenna o tselo dives.

⁶³ Dik koy: Te hi le beshdo, oun te hi le tardo, givenn le sapaskre gilya pral mande.

⁶⁴ De lenge les pale, baro Devel, har yon mantsa kran!

⁶⁵ Kre lengre djia har i barra, oun čip tiro praasepen ap lende!

⁶⁶ Le len palla tiri tseli rholyah, te ačell kek lendar djido ap kay phoub!