Remarja 8 - O Debleskro Lab 2024 (Sinte-Manouche)

O nevo djipen

¹ Yaake djal kek nashedo, kay djivell o Yezous Kristeha khetne.

² Oun o Debleskro Dourho, koles o Yezous Kristo men das, hi kanna o ray pral mende. Oun kova dell men o djipen oun lell men vin dran o čilačepen oun o merepen.

³ O Moseskre laba nay dan ko djipen gar. I menshe nay kran kova gar, hoy an o Moseskre lila činlo hi. Ko čilačepen, hoy an lende his, moukas len gar te krell, hoy o Devel lendar kamas. Doleske penas o Devel: “O čilačepen hounte merell.” Oun yob bičras peskro čaves, te vell lo i mensho har mer, kay čilačo ham. Yob las maro čilačepen ap peste oun meras. Oun yaake meras o čilačepen leha oun nashras peskri zoor pral mende.

⁴ Kova kras o Devel, te vas mer yaake čačo glan leste, har yob mendar kamella. Yob kras kova menge, kay djivah kanna o nevo djipen, hoy o Debleskro Dourho men das, oun bouder gar maro phouro djipen.

⁵ Kolla, kay djivenn pengro phouro djipen, djivenn yaake, har yon kamenna. Kolla, kay djivenn o nevo djipen, hoy o Debleskro Dourho len das, kolla kamenn kova te krell, hoy o Debleskro Dourho kamella.

⁶ Kolla, kay djivenn yaake, har yon kamenna, kolla merenna. Kolla, kay krenna, hoy o Debleskro Dourho lenge penella, kolla len o Debleskro djipen oun leskri barht.

⁷ Koon kamell yaake te djivell, har yob kamella, kova kamell gar o Debles. Yob shounell gar ap kova, hoy o Devel penella. Yob nay krell les vitar gar.

⁸ Kolla, kay pengro phouro djipen djivenna, pral kolende nay vell o Devel gar barhtelo.

⁹ T'mer djivenn bouder gar t'maro phouro djipen. Na-a. Te hi o Debleskro Dourho an t'mende, djivenn t'mer ko nevo djipen, hoy yob t'mende das. Kones hi gar o Yezous Kristeskro Dourho an leste, kova hi gar i Debleskro čavo.

¹⁰ Te djivell o Yezous Kristo an t'mende, han t'mer čačo glan o Debleste, oun o Debleskro Dourho dell t'men o djipen, ninna te vell ko dives, kay hounte merell t'maro mass. O čilačepen an i menshende kras, te hounte merell o mass.

¹¹ O Devel kras o Yezous Kristes i moulendar djido. Te djivell leskro Dourho an t'mende, palle krell lo t'men ninna djido. O Debleskro Dourho, kay an t'mende hi, krell kova.

¹² Mire phrala, kanna hounte djivas bouder gar maro phouro djipen.

¹³ Te djivenn t'mer t'maro phouro djipen, merenn t'mer. Te djivenn t'mer yaake, har o Debleskro Dourho kova kamella, oun penenn na-a ap o čilačepen, hoy an t'maro shero hi, palle djivenna.

¹⁴ Kolla, kay shounenn ap o Debleskro Dourho, kolla hi o Debleskre čave.

¹⁵ O Devel das t'men gar peskro Dourho, te darenn lestar, har i boudepangre darenna pengro rayestar. Na-a, t'mer han o Debleskre čave. Oun o Debleskro Dourho krell, te penah mer: “Tata” ap o Debleste.

¹⁶ Oun o Debleskro Dourho penell menge an o dji, te ham mer o Debleskre čave.

¹⁷ Gar kokres leskre čave ham mer. Mer lah ninna lestar ko tselo lačepen, hoy les menge hi an o bolepen. Kova lah khetne o Yezous Kristeha. Te venn douka ap mende, yaake har van douka ap o Yezous Kristo, palle krell men o Devel ninna baro oun raylo leha.

O Devel rodas men vin, te vas mer leskre čave

¹⁸ Me patsau zoreles, kol douka, hoy an kava tsiro ap mende venna, hi boud boud tikneder har ko baro raylepen, hoy o Devel men della an ko tsiro, hoy vella.

¹⁹ Halauter, hoy o Devel kras, dikell peskro tselo djiyeha ap ko tsiro, kay o Devel halauteren sikrella, koon leskre čave hi.

²⁰ Halauter, hoy o Devel kras, hounte djal paash, ninna te kamenn le kova gar. O Devel kamas kova yaake. Yaake kras lo ninna, te dikenn le ap ko tsiro,

²¹ kay hounte merenn le bouder gar oun venn yaake nevo oun raylo har o Debleskre čave nevo oun raylo venna.

²² Mer djinah, halauter, hoy o Devel kras, rovell oun dell gole i doukatar bis kava dives.

²³ Oun gar kolla kokres, na-a, men ninna hi douka oun dikah o tselo djiyeha ap ko tsiro, kay vah čačepah Debleskre čave oun merah bouder gar. Ninna te hi men kanna o Debleskro Dourho an mende, dikah ap ko tsiro, kay merah bouder gar.

²⁴ Ninna te djinah, o Debleskro djipen hi maro, dikah mer ap ko tsiro, kay lah les čačepah. Men te vals ko djipen, palle hounte dikams bouder gar ap ko tsiro, kay mer lah les.

²⁵ Maro dji nashell pal kova, hoy glan mende hi, oun hoy dikah nay gomme gar. Doleske vah mer gar khino an mare djia bis te lah les.

²⁶ Ninna vell o Debleskro Dourho ap mari rig, kay ham gar zorelo. Te kamah mer te rakras o Debleha oun djinah gar, hoy te mangas lestar, palle rakrell o Debleskro Dourho menge i labentsa, hoy kek nay rakrell vin.

²⁷ Oun o Devel, kay djinell, hoy an o menshengro dji hi, djinell ninna, hoy o Debleskro Dourho lestar menge mangella.

²⁸ Mer djinah, halauter vell mishto kolenge, kay o Debles kamenna. Glan rah tsiro his o Debles an peskro dji, te dell lo menshen gole, te djivenn le leha khetne.

²⁹ Har rodas lo len vin, his an leskro dji, te venn le yaake har peskro čavo. Kova te vell o phoureder mank boud phralende oun phenyende.

³⁰ Kolen yob vin rodas, kolen das lo ninna gole, te djivenn le leha khetne. Oun kolen, kay yob gole das, kolen čivas lo an o čačepen. Oun kolen, kay yob an o čačepen čivas, kolen kras lo ninna erligo, te djivenn le leha khetne an leskro raylepen.

Či nay lell mendar o Yezouseskro kamlepen krik

³¹ Hoy te penas mer boudeder? O Devel hi ap mari rig! Koon nay krell menge i čilačepen? Kek!

³² O Devel rikras peskro čaves gar pash peste. Yob das les menge lauterenge an o merepen. Patsenn t'mer gar, te dell lo men khetne leha kova lauter, hoy yob menge penas?

³³ Kek nay anell i doosh ap kolende, kolen o Devel peske vin rodas. O Devel čivas len an o čačepen.

³⁴ Kek nay penell ap mende: Tou djal nashedo! O Yezous Kristo meras menge. Oun kova hi gar lauter. O Devel kras les ninna i moulendar djido. Oun yob hi ap leskri čači rig, oun rakrell menge mishto.

³⁵ Či nay lell mendar o Yezous Kristeskro kamlepen krik! Kek douka, kek daar. Ninna te lenn le men palla, ninna te hi men či te rhal oun či an-ripaske, ninna te kamenn le men čilačepen te krell, ninna te marenn le men, ko tselo koova nay lell gar o Yezous Kristeskro kamlepen mendar krik.

³⁶ An o Debleskro lab hi činlo: Mer ham tiro. Doleske kamenn le men hako tsiro te marell. Yon dikenn ap mende, har te vams bakre, hoy venn maredo.

³⁷ O Yezous Kristo, kay kamell men o tselo djiyestar, yob krell men zoreles an lauter kova hoy ap mende vella.

³⁸ Me djinau zoreles: Či nay lell o Debleskro kamlepen mendar krik: kek merepen, kek djipen, kek bolepangre, vitar kek čilače zorya. Či, hoy ap mende vella, kanna oun an ko tsiro, hoy vella,

³⁹ či, hoy pral an o bolepen hi oun či, hoy tele an i phoub hi, oun kek vavar, hoy djivella, nay krell, te kamell men o Devel bouder gar. Kova, hoy maro ray, o Yezous Kristo, menge kras, sikrell men, har baro o Debleskro kamlepen hi.