Remarja 6 - O Debleskro Lab 2024 (Sinte-Manouche)

O nevo djipen

¹ Hoy te kras kanna? Djivas doureder an o čilačepen, te vell o Debleskro lačepen bareder? Na-a!

² Kova kras mer gar! Mer ham har moulo. Oun o čilačepen hi bouder gar o ray pral mende.

³ Djinenn t'mer gar, har vam ap o Yezous Kristeskro lab taufedo, meram leha?

⁴ Kote hi maro phouro djipen leha paskedo, te djivas mer kanna i nevo djipen, yaake har o Yezous Kristo i moulendar pre stas, har o Devel, maro dad, peskri bari zoryah les djido kras.

⁵ Mer te meram leha khetne, stah mer ninna i moulendar pre, yaake har yob i moulendar pre stas.

⁶ Mer djinah, maro phouro djipen vas leha ap o troushel dino oun meras, te vell o čilačepen bouder gar o ray pral mende.

⁷ Kova, kay meras, hi bouder gar pandlo ap o čilačepen.

⁸ Mer patsah: Te meram mer o Yezous Kristeha, palle djivah mer ninna leha.

⁹ Ninna djinah, yob vas i moulendar djido oun merell bouder gar. O merepen hi bouder kek zoor pral leste.

¹⁰ Yek kopo meras lo i čilačenge. Oun kanna djivell lo o Debleske.

¹¹ Doleske dikenn yaake ap t'mende, har te vans moulo, oun te nay krans bouder gar o čilačepen. Djivenn o Yezous Kristeha khetne o Debleske!

¹² Moukenn gar o čilačepen o ray pral t'mende te vell! T'mer djinenn, kay vell o dives, kay hounte merenn. Ma krenn ko djoungelo koova, hoy an t'maro dji hi!

¹³ Denn yak, te krenn či t'mare vastentsa, heryentsa, yakentsa oun mouyentsa, hoy krell o čilačepen ap kay phoub zorleder! Djivenn o tselo djiyeha o Debleske, har save, kay his moulo, oun van pale djido. Krenn kova lauter, hoy krell o lačepen zorleder!

¹⁴ T'mer hounte rikrenn t'men bouder gar ap o Moseskre laba. O Devel kras t'men čačo glan leste dran peskro lačepen. Doleske nay vell o čilačepen bouder gar o ray pral t'mende.

Mer ham bouder gar pandlo ap o čilačepen

¹⁵ Kanna djivah mer bouder gar pal o Moseskre laba. Kanna djivah dran o Debleskro lačepen. Kras mer kanna o čilačepen? Na-a, kova kras mer gar!

¹⁶ T'mer djinenna: Koon t'maro ray hi, ap koleste hounte shounenn. Koleskre boudepangre han t'mer. Te shounenn t'mer ap o čilačepen, palle hi o čilačepen o ray pral t'mende, oun t'mer merenna. Te shounenn t'mer ap o Debleste, palle krell lo t'men čačo.

¹⁷ Me sharau o Debles. T'mer hans pandlo ap o čilačepen, oun kanna shounenn t'mer o tselo djiyeha ap o lačo lab, hoy mer t'menge o Yezous Kristestar penam.

¹⁸ Kanna han bouder gar pandlo ap o čilačepen. Kanna han tardo an o čačepen, oun krenn kova, hoy o Devel kamella.

¹⁹ Me penom t'menge kova yaake, te hayvenn man nay. Har hans gomme gar patslo, kran t'mer djoungelo oun čilačo koova. Oun o čilačepen an t'mende vas baro oun bareder. Kanna hi kova vavarčandes. Doleske krenn kova, hoy lačo oun čačo hi! Yaake djivenn t'mer o Debleskro djipen.

²⁰ Ap ko tsiro, har his o čilačepen t'maro ray, hans gar tardo an o čačepen.

²¹ Kova, hoy kran, his či moldo. T'mer kran savo koova, koleske kay dives ladjenn t'men. Savo koova anell an o merepen dren.

²² Kanna han t'mer bouder gar pandlo ap o čilačepen. T'mer van o Debleskre boudepangre. Oun t'mer djivenn o Debleskro djipen. Oun kova anell t'men an o djipen, hoy gar pre-herella.

²³ Kova, kay krell o čilačepen, lell peskri phagi. Koy phagi hi o merepen. Kova, kay patsell ap o Yezous Kristeste, maro rayeste, koles dell o Devel čičeske o djipen, hoy gar pre-herella.