Remarja 4 - O Debleskro Lab 2024 (Sinte-Manouche)

Har o Devel o Abrahames an o čačepen čivas

¹ Kova hi yaake har pash maro phouro dadeste, o Abrahameste, kolestar i bibolde venna. Har vas lo čačo glan o Debleskre yaka?

² Kras lo lauter, hoy mishto hi? Palle nay sharals pes lo glan i menshende, gar glan o Debleste.

³ Hoy hi činlo an o Debleskro lab? Kote hi tardo: O Abraham patsas o Debles, oun doleske čivas o Devel les an o čačepen.

⁴ I mensho, kay marell pes tele, te vell lo čačo, hi har i boudepaskro, kay hounte boudrella, te vell lo playsedo. Leskre love lell lo gar čičeske.

⁵ I mensho, kay patsell ap o Debleste, hounte marell pes gar tele, te vell lo čačo. Leskro patsepen čivell les an o čačepen. Yob patsell ap koleste, kay krell i čilačen čačo.

⁶ Yaake rakras o baro ray David i barht vin pral kolende, kolen o Devel čačo kras, ninna te kran le gar lauter, hoy mishto hi.

⁷ O David penas: Barhtelo hi kolla, kolenge i doosh krik lino vas, oun kolengro čilačepen o Devel bistras.

⁸ Barhtelo hi ko mensho, koleske o Devel leskro čilačepen gar glan i yaka rikrella.

⁹ Koy barht hi gar kolenge kokres, kay hi činlo ap pengro mass. Na-a. Koy barht hi ninna kolenge, kay hi gar ap o mass činlo. Kova hi yaake, har me t'menge penom: O Abraham patsas o Debles, oun doleske čivas o Devel les an o čačepen.

¹⁰ Poučau t'mendar: Havo tsiro čivas o Devel les an o čačepen? Čivas lo les an o čačepen ap ko tsiro, kay yob ap o mass činlo vas? Na-a. Yob čivas les an o čačepen, har yob gar ap o mass činlo his.

¹¹ Činlo vas o Abraham, te vell diklo: Yob hi čačo dran o patsepen, hoy glan kava tsiro an leste his. Doleske vas lo kharedo: O dad lauterendar, kay patsenn ap o Debleste, ninna te hi le gar ap o mass činlo. Lengro patsepen čivell len an o čačepen.

¹² Yob hi ninna o dad kolendar, kay hi činlo ap o mass, te djivenn le an o patsepen yaake, har o Abraham djivas glan ko tsiro, kay yob ap o mass činlo vas.

O Abrahameskro patsepen

¹³ Glan rah tsiro das o Devel o Abrahames peskro lab, te lenn leskre čave i tseli phoub. Ap ko tsiro penas o Devel leske gar: Tou te kreh lauter, hoy toutar kamau, palle leh tou kova halauter. Na-a. Yob penas leske: Tou patsal ap mande, doleske hal čačo glan mande.

¹⁴ Te lans kolla i tseli phoub, kay rikrenn pen ap o Moseskre laba, palle vals o patsepen či moldo. Oun ko lab, hoy o Devel o Abrahameske das, vals vitar či moldo.

¹⁵ Te djinell yek gar, hoy o Devel lestar kamella, oun krell i čilačo koova, nay djinell lo gar, kay kova čilačo hi. Kolla, kay djinenn, hoy o Devel lendar kamella oun krenn kova gar, pral kolende vell o Debleskri rholi. Yaake anenn o Moseskre laba, hoy menge penenna, hoy o Devel mendar kamella, čačepah o Debleskri rholi pral i menshende.

¹⁶ Doleske krell o Devel kolen čačo, kay ap leste patsenna. Leskro čačepen dell o Devel čičeske lauterenge, kay ap leste patsenna. Yaake ačell ko lab, hoy yob o Abrahameste das, lauterenge, kay venna pal o Abrahameste, i biboldenge har kolenge, kay djivenn dran o patsepen har o Abraham. Kova hi o dad mendar lauterendar.

¹⁷ Yaake hi činlo an o Debleskro lab: Me krom tout o dad boud menshendar an boud themma. O Abraham dikas ap o Debleste oun patsas, te nay krell o Devel i moulen djido, oun nay krell kova, hoy gomme gar koy his.

¹⁸ O Devel penas o Abrahameske: Tou leh i čaves. Kolestar venna boud boud menshe, yaake boud, te djivenn le an boud themma. Ninna te dikas o Abraham či kolestar, hoy o Devel leske penas, patsas lo o Debles.

¹⁹ Ap ko tsiro his o Abraham sheel bersha phouro. Leskri romni Sara his ninna boud phouro. Ninna te dikas o Abraham, har phouro yon his, ačas lo zorelo an o patsepen.

²⁰ Yob rikras pes ap kova, hoy o Devel leske penas, oun yob patsas gar i paash djiyestar. Yaake vas leskro patsepen gomme zorleder. Oun yob sharas o Debles.

²¹ Peskro tselo djiyeha djinas lo, o Devel nay krell kova, hoy yob penas.

²² Doleske čivas leskro patsepen les an o čačepen glan o Debleste.

²³ Kova vas gar leske kokres an i liil činlo.

²⁴ Kova vas ninna menge činlo, kay patsah ap o Debleste. Kova kras o Yezouses, maro rayes, i moulendar djido. Mer te djinas: Maro patsepen čivell men ninna an o čačepen.

²⁵ O Yezous Kristo hi kova, koles o Devel bičras, te merell lo menge, oun te lell lo mari doosh mendar krik. Oun o Devel kras les i moulendar djido, te nay krell lo men čačo glan leste.