Remarja 3 - O Debleskro Lab 2024 (Sinte-Manouche)

O Devel krella, hoy yob penas

¹ Kanna poučau t'mendar: Hi kova i biboldenge boud moldo, te hi le vin rodedo mank i vavar menshende oun činlo ap pengro mass?

² Ava, kova hi lenge boud moldo. Yon lan o Debleskre laba an lengre vasta.

³ Ninna te djan le gar lauter ap o Debleskro drom, rikras o Devel peskro lab, oun čivas len gar ap i rig.

⁴ Na-a, kova kras lo gar. O Devel hi čačo. Hako mensho hi i rhorheno. An i Debleskri gili hi činlo: Tou, mo Devel, lauter, hoy rakreh, hi čačo. Kek nay vell oun penella, kay tire laba gar čačo hi.

⁵ Kanna poučau t'mendar: Hi i menshen gar čačo, te penenn le: “Hi maro čilačepen baro, vell o Debleskro lačepen bareder. Doleske hi o Debles gar čačo, te dell lo men i phagi.”

⁶ Na-a, len hi gar čačo! O Devel djal pal o čačepen. Te djals o Devel gar pal o čačepen, nay rakrals lo gar o čačepen vin pral i tsele menshende.

⁷ I menshe nay penans ninna: “Mer te rhorhah, palle vell diklo, har baro o Debleskro čačepen hi. Oun yob vell sharedo. Hoske dell lo men i phagi?

⁸ Kras čilačo koova, te vell lačo koova dran koleste!” Hi menshe koy, kay rakrenn djoungeles pral mende oun penenn, mer penams i menshenge: “Kras čilačo koova, te vell lačo koova dran koleste!” Kova penah mer gar! Čačepah, kolla, kay penenn kova, lenn pengri phagi.

Lauter anan doosh ap pende

⁹ Hoy hi kanna? Hi i bibolde feteder glan o Debleste tardo har kolla, kay kek bibolde hi? Na-a, yaake har penom: I bibolde, har kolla, kay kek bibolde hi, halauter kran čilačo koova.

¹⁰ An o Debleskro lab hi činlo: Kek mensho hi čačo glan o Debleste, kek.

¹¹ Kek mensho hi gosevo. Kek rodell o Debles.

¹² Halauter moukan o čačo drom oun molenn či. Kek krell, hoy mishto oun lačo hi, kek.

¹³ Dran lengro mouy vell merepen. Ap lengri čip hi rhorhepen. Lengro rakepen anell o merepen har i sapa, hoy dandrenna.

¹⁴ Yon hi pherdo koshepen oun praasepen.

¹⁵ Yon hi sik, te marenn le.

¹⁶ Kote, kay yon djana, moukenn le bibarht oun ropen pal pende.

¹⁷ Ko drom, kay i menshe pen gar čingrenna, prindjrenn le gar.

¹⁸ O Deblestar darenn le gar. Lestar kamenn le či te djinell.

¹⁹ Mer djinah: Kova, hoy an o Moseskre laba penlo hi, hi kolenge penlo, kay lan kol laba. Kolla hi i bibolde. Yaake nay penell kek mensho, vitar kek biboldo: Man hi kek doosh. Kek mensho krell o čačepen. Doleske hi kek mensho čačo glan o Debleste.

²⁰ Te kamell lo te krell, hoy o Devel an o Moseskre laba penell, hayvell lo ninna, te nay krell lo kova gar. Kol laba sikrenn les, te hi lo čilačo glan o Debleste.

^21-22 Oun kanna, ap kava tsiro, sikras men o Devel, har krell lo i menshen čačo glan peste. Yon venn gar čačo, te rikrenn le pen ap o Moseskre laba, kay penenna, har te djivenn le. Na-a, o Devel krell hakenes čačo glan peste, kay patsell ap o Yezous Kristeste. Yaake hi kova an o Moseskre lila činlo. Ninna o Debleskre rakepangre penan kova i menshenge glan i rah tsiro. Doleske hi i bibolde gar feteder har kolla, kay kek bibolde hi.

Maro patsepen ap o Yezouseste čivell men an o čačepen glan o Debleste

²³ Lauter kran o čilačepen oun van pale-čiddo glan o Debleste.

²⁴ Oun o Devel krell len čičeske čačo oun erligo dran leskro baro lačepen. O Yezous Kristo playsras lenge peskro rateha.

²⁵ O Devel bičras les, te merell lo ap o troushel kolenge, kay ap leste patsenna. Leskro rateha, hoy yob ap o troushel ratas, thovas o Devel mari doosh mendar krik. Yaake dikah, o Devel hi lačo oun čačo oun lell i menshendar lengri doosh krik.

²⁶ I rah tsiro rikras o Devel peskri rholi pale, oun das len kek phagi. Kanna, ap kava tsiro meras o Yezous lenge, oun las lengri phagi ap peste. Yaake sikrell o Devel peskro čačepen. Yob hi čačo. Ninna krell lo koles čačo, kay ap o Yezous Kristeste patsella.

²⁷ Koon nay sharell pes kanna? Kova, kay rikras pes ap kol laba, hoy penenna, har te djivas mer? Na-a, les hi či, te sharell lo pes. Kova hi čačo glan o Debleste, kay ap o Yezous Kristeste patsella.

²⁸ Yaake djinah, o mensho vell čačo glan o Debleste, te patsell lo ap o Yezous Kristeste, oun gar, te djivell lo pal kol laba, hoy penenn, har te djivas mer.

²⁹ O Devel hi gar kokres i biboldengro Devel. Na-a, yob hi ninna o Devel kolenge, kay kek bibolde hi.

³⁰ Yob hi ko yek Devel. Kova krell kolen čačo, kay ap o Yezous Kristeste patsenna: i bibolden har kolen, kay kek bibolde hi.

³¹ Vitsrah mer kanna kol laba ap i rig, kay o Devel penella, har te djivas? Na-a, kanna, kay patsah, nay krah čačepah, hoy o Devel kamella.