Remarja 2 - O Debleskro Lab 2024 (Sinte-Manouche)

O Devel rakrell o čačepen vin pral lauterende

¹ Tou mensho, kay dikeh ap kolende oun peneh, har baro hi lengri doosh, tou nay peneh gar toutar: “Man hi kek doosh ap mande.” Ko čilačepen, hoy tou ap o vavareste dikeh, hi ninna ap toute. Tou te sikreh ap o vavareskri doosh, rakreh tou o čačepen pral toute vin.

² Mer djinah, o Devel djal pal o čačepen, te dell lo kolen i phagi, kay savo čilačo koova krenna.

³ Tou te sikreh ap i vavarende, kay savo koova krenna, oun tou kreh kova ninna, patseh tou čačepah, tou nay nasheh o Debleskri rholyatar krik?

⁴ Hi touke o Debleskro baro lačepen či moldo? Les hi i baro dji oun dell i menshen gar sik pre. Djineh tou gar o Debleskro lačepen, hoy kamell tout ap leskro drom te anell?

⁵ Oun tou kameh gar pash leste te vell. Tiro dji hi har bar. Doleske vell o Debleskri rholi baro oun bareder, hoy ap toute vella ap ko dives, kay hi o Devel o čačepaskro ray oun rakrell o čačepen vin pral i tsele menshende.

⁶ Ap ko dives dell lo hakenes pal kova, hoy yob kras.

⁷ Kolen, kay moukan gar tele, te krenn le o lačepen, dell lo o djipen, hoy gar pre-herella. Yon hi kolla, kay čivan pengro dji koy pre, te dikell o Devel kamles ap lende, oun te lell lo len pash peste an leskro raylepen, kay dell lo len o djipen, hoy gar pre-herella.

⁸ Ap kol vavarende vell leskri rholi. Lenge hi lo gar lačes. Yon hi kolla, kay djivan pal pengro shero oun shounan gar ap o Debleskro čačo lab, oun kran, hoy lengro čilačo dji lenge penas.

⁹ Bibarht oun daar vell ap i tsele menshende, kay o čilačepen kran, gar kokres ap i biboldende, na-a, ninna ap kolende, kay kek bibolde hi.

¹⁰ Raylepen, čačepen oun barht dell o Devel kolen, kay kran o lačepen, – gar kokres i bibolden, na-a, ninna kolen, kay kek bibolde hi.

¹¹ O Devel dikell gar ap yekeste, koon yob hi.

¹² Kolla, kay kran o čilačepen, djan nashedo, ninna te prindjran le gar o Moseskre laba, kay penenn, har yon hounte djivenn. Oun lauter, kay prindjran kol laba oun kran o čilačepen, lenn ninna pengri phagi.

¹³ Glan o Debleste hi kolla čačo, kay krenna, hoy yob kamella, oun gar kolla, kay shounenn kol laba oun krenn gar, hoy kol laba penenna.

¹⁴ Mank i menshende, kay prindjrenn gar o Moseskre laba, hi save, kay krenna, hoy o Devel kamella, ninna te vas kova lende gar siklo. Lenge penell lengro dji, hoy lačo oun čačo hi.

¹⁵ Yaake dikah, an lengre djia hi činlo, hoy o Devel kamella. Te kran le o čilačo koova, penell lenge lengro dji: Kova his gar mishto, hoy kral. Te kran le lačo koova, penell lenge lengro dji: Kova his mishto, hoy kral.

¹⁶ Lauter kova, hoy an o mensheskro dji hi, vell diklo ap ko dives, kay hi o Yezous Kristo o čačepaskro ray oun rakrell o čačepen vin pral i menshende. Yaake penell les o Debleskro lab, hoy me i menshenge penau.

I biboldengri doosh

¹⁷ Hoy krenn t'mer, i bibolde? T'mer sharenn t'men oun penenn: “Me hom i biboldo oun prindjrau o Moseskre laba. O baro Devel hi miro Devel.

¹⁸ Me djinau, hoy yob kamella, oun dikau an o Moseskre laba, hoy lačo oun čačo hi.

¹⁹ Me nay anau i korelen ap o Debleskro drom, ninna kolen, kay an i kali rat djana.

²⁰ Me hom i sikepaskro kolenge, kay či djinenna oun hayvenna. An o Moseskre laba hi man o tselo gosvepen oun čačepen.”

²¹ Hoy te penap t'menge? T'mer sikrenn i vavarende o Debleskro drom. Oun t'menge kokres penenn t'mer gar: Djas ap o Debleskro drom! T'mer penenn i vavarenge: Ma čorenn! Oun t'mer kokres čorenn.

²² T'mer penenn: Ma rhorhe tiri romyat i vavar djouvyah! Oun t'mer krenn kova. T'mer penenn: Kova hi gar mishto, te mangenn vavar koova an har o Debles. Oun t'mer čorenn ko koova.

²³ T'mer sharenn t'men oun penenn: Mer djinah, hoy o Moseskre laba penenna, oun t'mer krenn kova gar. Doleske anenn t'mer ladj ap o Debleste.

²⁴ Yaake hi kova činlo an o Debleskro lab: Dran t'mende rakrenn i vavar menshe djoungeles pral o Debleste.

²⁵ Ninna te han bibolde oun ap t'maro mass činlo, hounte rikrenn t'men ap kova, hoy o Devel an o Moseskre lila penas. Te krenn t'mer, hoy kote činlo hi, pale hi t'menge boud moldo, te han bibolde. Te krenn kova gar, han t'mer glan o Debleste har yek, kay hi kek biboldo.

²⁶ Yek, kay hi kek biboldo, te krell yob kova, hoy o Devel kamella, palle dikell o Devel yaake lačes ap leste, har te vals lo i biboldo.

²⁷ Oun yaake vell kova, kay kek biboldo hi, i čačepaskro ray pral t'mende, i biboldende. Yob kras, hoy o Devel kamella, oun t'mer kran gar, hoy o Devel kamella, ninna te hi t'men kol tsele činle laba, hoy penenn, har te djivenn, oun han činlo ap t'maro mass.

²⁸ I čačo biboldo hi gar kova, kay hi činlo ap peskro mass.

²⁹ Na-a! Kova hi i čačo biboldo, koleske o Debleskro Dourho i nevo dji das. Kova nay krenn i činle laba gar. Savo biboldo rodell gar, te vell lo i menshendar sharedo. Yob vell o Deblestar sharedo.