Remarja 15 - O Debleskro Lab 2024 (Sinte-Manouche)

Djib tiro djipen i vavarenge oun gar touke kokres

¹ Mer, kay ham zorelo an o patsepen, hounte dikas ap kolende, kay hi gar zorelo an o patsepen, te hidjras mer lentsa, hoy lenge pharo hi. Mer hounte dikas gar ap mende kokres, te djal menge mishto.

² Hakeno mendar hounte djivell yaake, te dikell o vavar lačes ap leste oun vell zorleder an o patsepen.

³ Ninna o Yezous Kristo dikas gar ap peste, te djal leske mishto. An o Debleskro lab hi činlo pral leste: O praasepen kol menshendar, kay o Debles praasan, peras ap leste.

⁴ Lauter kova, hoy an o phouro tsiro an o Debleskro lab činlo vas, vas činlo, te las mer nevi zoor dran o Debleskro lab, oun das maro patsepen gar pre, oun dikas ap ko lačepen, hoy o Devel men della, an ko tsiro hoy vella.

⁵ Oun o Devel, koon dell i nevi zoor oun krell t'men zoreles, te denn t'maro patsepen gar pre, lestar mangau me, te vell t'men yek dji oun yek djipen, yaake har o Yezous Kristo kova t'mendar kamella.

⁶ Palle nay sharenn t'mer o baro Debles halauter khetne. Yob hi o dad maro rayestar, o Yezous Kristestar.

Boud menshe ap i tseli phoub sharenn o Debles

⁷ Yaake har hi o Yezous Kristes i dji t'menge, yaake hounte vell t'men i dji yek o vavareske! Palle vell o Devel sharedo.

⁸ Oun me penau t'menge: O Yezous Kristo vas i biboldenge, te dikenn le, o Devel rikrell ap peskro lab, hoy das yob lengre phourende.

⁹ Oun yob vas t'menge, kay han kek bibolde, te sikrell lo t'mende o Debleskro baro lačepen, yaake te sharenn t'mer o Debles. An o Debleskro lab hi činlo, har penell o Yezous Kristo ap o Debleste: Doleske sharau tout mank kolende, kay hi kek bibolde, oun givau gilya touke.

¹⁰ Kote hi ninna činlo: T'mer, kay han kek bibolde, avenn barhteles khetne i biboldentsa. Yon hi kol menshe, kolen yob peske vin rodas!

¹¹ Oun ninna hi činlo: T'mer lauter, kay han kek bibolde, sharenn o Debles! T'mer, kay venna dran i tsele themma, givenn leske gilya!

¹² Oun o Debleskro rakepaskro, o Yesaya, penas glan i rah tsiro: Koy vell i morsh i menshendar, kolengro dad hi o Isay, kova vell o ray pral i menshende an i tsele themma. Ap koleste dikenn le, te vell lo lenge lačes.

¹³ Oun o Devel, kolestar o tselo lačepen vella, ap koleste dikah, lestar mangah, te venn t'mer čalo i barhtyatar an o dji dran t'maro patsepen, yaake te djinenn t'mer: Ko lačepen, hoy dell men o Devel an o tsiro, hoy vella, kova vell čačepah. Oun o Debleskro Dourho dell t'men i zoor, te dikenn boud oun boudeder ap o Debleste.

O Pauleskri boudi

¹⁴ Mire phrala, me djinau čačepah, t'maro dji hi pherdo lačepen. Oun t'mer djinenn lauter, hoy o Devel t'mendar kamella. Yaake nay sikrell ko yek o vavareste o čačo drom.

¹⁵ Ninna te djinau kova, činom t'menge pral boud koova an kava liil. Me činom zorele labentsa, te bistrenn kova gar. Koy boudi das man o Devel an peskro lačepen.

¹⁶ Yob bičras man, te boudrap o Yezous Kristeske oun te djap pash kolende, kay kek bibolde hi, te sikrap len o Debleskro drom. Yaake hom har i rashay, kay anell kol menshen, kay kek bibolde hi, pash o Debleste. Oun o Devel dell len peskro Dourho, te venn le leskro. Oun yob dikell lačes ap lende.

¹⁷ O Yezous Kristo das man kay boudi. Doleske ladjap gar, te rakrap pral kova, hoy krau o Debleske.

¹⁸ Me kamau gar te rakrap pral vavar koova har pral kova, hoy kras o Yezous Kristo mank kolende, kay kek bibolde hi. Dran maro rakepen oun mari boudi anas o Yezous Kristo len pash peste, te shounenn le ap leste.

¹⁹ Oun yob sikras peskri zoor, har kras o Debleskro Dourho baro koova, hoy kek vavar nay krella. Yaake penom o lačo lab o Yezous Kristestar an o tselo them troul o foro Yerusalem bis an o them Illirikum.

²⁰ Ap o tselo drom penom ko lab kokres kote, kay o Yezous Kristo gar prindjedo his, yaake te penell kek ap mande: “Tou boudreh kote, kay i vavar glan toute boudras.”

²¹ Yaake krom kova, hoy an o Debleskro lab činlo hi: Kolenge či lestar penlo vas, kolla prindjrenn les kanna. Kolla, kay lestar či shounan, kolla hayvenn kanna.

O Paulo kamell an o foro Rom te vell

²² Doleske his man kek tsiro te vap pash t'mende.

²³ Kanna hi miri boudi an kol themma kerdo. Oun me nay vau pash t'mende. Yaake kamom me kova glan boud bersha te krap.

²⁴ Ap miro drom an o them Spania, kamoms te dikap t'men, oun te ačap i tikno tsiro pash t'mende. Te hom t'mentsa khetne, lau nevi zoor. Palle djau doureder, oun t'mer nay denn man lauter, hoy man hounte vell ap o drom.

^25-26 Glan kova, kay vau pash t'mende hounte djap an o foro Yerusalem, te anap kote i čorvele patslenge kol love, hoy i patsle an i themma Macedonia oun Akaya kolenge khetne čivan.

²⁷ Kol love dan le pengro tselo djiyestar. I patsle an o foro Yerusalem penan o Debleskro lačo lab kolenge, kay kek bibolde hi. Yaake hounte denn i patsle, kay kek bibolde hi, i biboldende lauter kova, hoy hounte vell len djipaske. Koya hi lengri siyaan.

²⁸ Te dom i patslen an o foro Yerusalem kol tsele love, palle kamau ap o drom an o them Spania pash t'mende te vell.

²⁹ Oun me djinau, te vau pash t'mende, anau t'menge i tseli barht, hoy vella o Yezous Kristestar.

³⁰ Mire phrala, mangau t'mendar an o lab maro rayestar o Yezous Kristestar, oun an o kamlepen, hoy o Debleskro Dourho men das: Mangenn mantsa khetne o Debles o tselo djiyeha,

³¹ te vap me gar dino an i vasta kolendar, kay patsenn gar ap o Debleste an o them Youdea. Mangenn les ninna, te lenn kol patsle an o foro Yerusalem kol love lačes pre, hoy anau lenge.

³² Palle nay vau barhteles pash t'mende, yaake har kamell o Devel, te lap nevi zoor pash t'mende.

³³ O Devel djal t'mentsa lauterentsa oun dell t'men peskri barht an o dji! Amen.