Remarja 14 - O Debleskro Lab 2024 (Sinte-Manouche)

Ma rake djoungeles pral o vavareskro patsepen!

¹ Lenn ninna koles lačes pre, kay hi gar zorelo an o patsepen. Ma čingrenn leha pral o patsepen!

² Ko yek patsell, kek rhapen hi pale-čiddo. Ko vavar, kay hi gar zorelo an o patsepen, kova patsell, te nay rhal lo kek mass.

³ Kova, kay rhal o mass, hounte rikrell pes gar feteder har ko vavar, kay rhal kek mass. Kova, kay rhal kek mass, hounte penell ko vavareske gar: “Kova, hoy tou kreh, hi pale-čiddo koova.” O Devel čivas hake douyen an o čačepen.

⁴ Kova hi gar tiro koova, te peneh pral i vavareskro boudepaskro: “Kova, hoy yob kras, hi gar mishto.” Leskro ray kokres nay penell: “Kova hi mishto, kova hi gar mishto.” Oun maro ray, o Yezous Kristo, les hi i zoor, te rikrell lo les pash peste, yaake te ačell lo tardo an o patsepen.

⁵ Yekeske hi yek dives i Debleskro dives, ko vavareske hi lo kova gar. Hakeno hounte djinella peske, kova, hoy yob krella, hi čačo oun lačo.

⁶ Koon rikrell o Debleskro dives bareder har i vavar divessa, krell kova o Debleske. Koon patsell, te nay rhal lo lauter, krell kova o Debleske oun parkrell pes pash leste. Koon patsell, te nay rhal lo gar lauter, kova krell les ninna o Debleske, oun sharell o Debles ninna.

⁷ Kek mendar djivell peske kokres, oun kek mendar merell peske kokres.

⁸ Te djivah, djivah o Debleske. Te merah, merah o Debleske. Hako tsiro ham mer leskro, – an o djipen har an o merepen.

⁹ O Yezous Kristo meras, oun vas pale djido, te vell lo o ray pral kolende, kay moulo hi, oun pral kolende, kay djido hi.

¹⁰ Kek t'mendar hounte penell pral i vavar patsleste: “Kova djal gar mishto ap o Debleskro drom.” Kek t'mendar hounte dikell tele ap i vavar patsleste. Ko dives vella, kay rakrell o Devel pral hakeneste mendar o čačepen vin.

¹¹ An o Debleskro lab hi činlo: O Devel penell: Yaake har čačo hi, te djivau, yaake perell hakeno glan mande tele, te sharell lo man. Oun hakeno penella: Tou hal o baro Devel.

¹² Ap ko dives vell hakeno mendar glan o Debleste oun hounte penell leske, hoy yob kras oun hoske yob kova kras.

O tikno oun o baro patsepen

¹³ Doleske hounte penell kek mendar ap o vavareste: “Tou djal gar mishto ap o Debleskro drom.” Denn yak, te čivenn t'mer i vavar patsleske či an o drom, yaake te djinell lo bouder gar, har te djal lo ap o Debleskro drom.

¹⁴ Me djinau zoreles, – maro ray Yezous sikras man kova: Dell či, hoy hi pale-čiddo an peste. Kova kokres, kay patsell, te krell čomone les pale-čiddo, koleske hi kova pale-čiddo.

¹⁵ Te dikell tiro phraal, te rhah tou halauter, oun kova doukell les an peskro dji, palle kameh tou les gar o djiyestar. O Yezous Kristo meras ninna koleske. Doleske de yak, te anell savo tikno koova les gar o Debleskro dromestar tele.

¹⁶ Krenn či, te rakrenn i vavar djoungeles pral kova, ninna te hi kova, hoy t'mer krenn, mishto an t'mare yaka!

¹⁷ Kolla, kay o Devel o ray pral lende hi, kolla čingrenn gar pral kova, hoy yon rhana oun hoy yon piyenna. Na-a. Yon djivenn pal o čačepen, hoy o Deblestar vella oun čingrenn gar, oun o Debleskro Dourho dell len barht an o dji.

¹⁸ Koon yaake djivella, kova sharell o Yezous Kristes. Ap leste dikell o Devel lačes. Oun pash i menshende hi lo an-diklo.

¹⁹ Kanna kras lauter, te vell kek čingepen mank mende. Kras kova, hoy krell men lauter zoreles an o patsepen.

²⁰ Ma krenn kova paash, hoy o Devel kras! Ninna te hi kek rhapen pale-čiddo an peste, nay vell yekes i pharo dji, te rhal lo čomone, hoy leske pale-čiddo hi. Oun kova hi gar mishto.

²¹ Hi feteder, te rhah tou kek mass oun te piyeh tou kek mool oun kreh či, hoy anell tiro phrales o Debleskro dromestar tele.

²² Kova, hoy tou patseh an kava koova, djineh tou oun o Devel kokres. Tou hounte sikress les lende gar. Barhtelo hal tou, te kreh lauter yaake, te hounte peness touke gar: Kova, hoy krom, his gar mishto.

²³ Koon rhal čomone, oun leskro dji vell pharo koy pashel, kova kras čomone, hoy vas gar dran o patsepen. Doleske anas lo doosh ap peste. Kova, hoy vell gar dran o patsepen, anell doosh ap mende.