Remarja 13 - O Debleskro Lab 2024 (Sinte-Manouche)

Shounenn ap o themeskre pralstunende!

¹ Hakeno hounte shounell ap i pralstunende, kay hi len penepaske pral o them. I tsele themengre pralstoune lan pengri zoor o Deblestar. O Devel čivas len an pengri boudi.

² Koon krell gar kova, hoy kol pralstoune penenn, kova krell gar, hoy o Devel lestar kamella, oun lell peskri phagi.

³ Kolla, kay krenn lačo koova, hounte darenn kol pralstunendar gar, na-a, kolla kay krenn čilačo koova, hounte darenn lendar. Te kameh tou gar te djivess an i daar kol pralstunendar, palle kre o lačepen! Palle sharenn le tout.

⁴ O Devel das len pengri boudi, te djal touke lačes. Tou te kre čilačo koova, palle hounte daress tou lendar. Hi gar čičeske, te vell len i zoor, te denn le i phagi. O Devel das len koy boudi, te denn le kolen i phagi, kay kran i čilačo koova.

⁵ Doleske hounte shouness ap lende, gar kokres dran i daar glan i phagi, na-a, ninna dran tiro dji, hoy touke penell, te kress tou o lačepen.

⁶ Dran kova denn t'mer ninna kol themeskre love, hoy o themeskre pralstoune t'mendar kamenna. Te mangenn le kol love t'mendar, krenn le koy boudi, hoy o Devel len das.

⁷ Denn hakeneste kova, hoy leske hi: themeskre love, ninna vavar love, hoy yon t'mendar mangenna. Shounenn ap kolende, kay hi len penepaske, oun dikenn pre ap lende!

Tou hounte kamess o vavares o tselo djiyestar

⁸ Te hi t'men i siyaan pash yekeste, ma ačenn an koy siyaan: Playssrenn lat pale! Yek koova nay krenn t'mer gar doha: Te kamell yek o vavares o tselo djiyestar! Koon kova kras, kras kova, hoy o Devel lestar kamella.

⁹ An o Debleskro lab hi činlo: Romeha, ma rhorhe tiri romyat i vavar djouvyah! Romniya, ma rhorhe tiro romes i vavar morsheha! Ma mare kekes! Ma čore! Ma dik čilače yakentsa ap kova, hoy o vavareskro hi! Lauter kova, hoy o Devel toutar kamella, hi an ko yek lab khetne lino: Ab yaake lačes ap o vavareste har hal lačo ap toute!

¹⁰ Koon kamell o vavares o tselo djiyestar, kova krell leske kek čilačo koova. Tou te kameh o vavares o djiyestar, yaake kreh tou kova lauter, hoy o Devel toutar kamella.

¹¹ Denn yak, te krenn kova! T'mer hayvan, havo tsiro kanna hi. O dives vell sik, kay vell o Yezous Kristo pale. Har van t'mer patslo, his ko tsiro dour t'mendar. Kanna hi ko dives bouder gar dour t'mendar. Doleske hounte vas gar har menshe, kay sovenna.

¹² Kava tsiro kanna hi har i rati. Sik hi i rati bouder gar kay. Oun o dives vella. Dran kova djivas gar har i menshe, kay djivenn an i rati. Te kras bouder gar čilačo koova! Kanna hounte kras mer kova, hoy mishto hi, te vell o čilačepen gar o ray pral mende.

¹³ Djivas yaake djoudjo, har djivenn i menshe ap o dives. Te djas gar kote, kay rhan le pen nasselo oun piyenn pen mato! Te kras gar vi-ladjedo koova! Te čingras gar, oun dikas gar čilače yakentsa ap kova, hoy o vavares hi!

¹⁴ Djivas yaake har maro ray, o Yezous Kristo, djivas! Te kamell o djoungelo koova an t'maro shero te vell, palle penenn: Na-a!