Remarja 10 - O Debleskro Lab 2024 (Sinte-Manouche)

O Debleskro djipen hi halauterenge, kay ap o Yezouseste patsenna

¹ Mire phrala, miro tselo djiyeha kamoms, te venn i bibolde dran o Debleskri rholi vin. Oun kova mangau o Deblestar zoreles.

² Me djinau čačepah, yon krenn boud koova o tselo djiyeha o Debleske. Ninna te krenn le kova, djinenn le čačepah gar, hoy o Devel kamella.

³ Yon hayvenn gar, har o Devel i menshen an o čačepen čivella. Oun yon djan ap pengro drom, oun djivenn pal pengro čačepen. Yaake krenn le gar, hoy o Devel lendar kamella.

⁴ Yob bičras o Yezous Kristes. Koon ap leste patsella, kova hi čačo glan o Debleste. O Moseskre laba hi bouder gar o drom pash o Debleste.

⁵ Kova, kay rikrell pes ap o Moseskre laba, te vell lo čačo glan o Debleste, hounte krell kova, hoy kote činlo hi. O Mose činas an peskre lila: Ko mensho lell o djipen o Deblestar, kay krell, hoy kote činlo hi.

⁶ Hi vavarčandes kolenge, kay patsenn ap o Yezous Kristeste. Dran lengro patsepen van le čačo glan o Debleste. O Debleskro lab penell: Ma pen an tiro dji: Yek hounte djal an o bolepen, te anell lo o Yezous Kristes tele! Mer djinah: o Yezous Kristo vas ap i phoub.

⁷ Ninna hounte penell kek: “Yek hounte djal pash i moulende, te anell lo o Yezous Kristes i moulendar ap i phoub.” Mer djinah: Yob stas i moulendar pre.

⁸ Tou hounte rodess bouder gar, har te nay veh pash o Debleste. O Debleskro lab penell touke: Kova, hoy o Devel touke penas, hi pash toute: an tiro mouy oun an tiro dji. Kava lab rakrell pral o patsepen. Kova penah mer i menshenge.

⁹ Oun tou te peneh i menshenge: O Yezous hi o ray, oun te patseh tou an tiro dji, te kras les o Devel i moulendar djido, palle dell lo tout o djipen, hoy gar pre-herella.

¹⁰ Koon o tselo djiyestar ap leste patsella, koles čivell o Devel an o čačepen. Oun koon i menshenge penella: O Yezous hi o ray, koleste dell o Devel o djipen, hoy gar pre-herella.

¹¹ An o Debleskro lab hi činlo: Kova, kay ap leste patsella, kova hounte ladjell pes gar glan mande.

¹² Kava lab hi i tsele menshenge: i biboldenge, ninna kolenge, kay kek bibolde hi. Len halauteren hi yek ray. Oun yob dell o djipen lauterende, kay les mangenna.

¹³ Yaake hi činlo an o Debleskro lab: Halauter, kay o Yezous Kristes mangenna, kolen dell lo o djipen.

I Israelitarya shounan o Yezous Kristestar oun patsan gar ap leste

¹⁴ Te patsenn yon gar ap o Yezous Kristeste, nay denn le les vitar gar an-gole. Te shounan le lestar gar, nay patsenn le gar ap leste. Te penell kek lenge o Yezous Kristestar, nay shounenn le gar lestar.

¹⁵ Te vell kek bičedo pash lende, nay penell lenge kek o Yezous Kristestar. O Debleskro lab penella: Har barhtelo ham pral kolende, kay venn pash mende oun penenn menge o lačo lab!

¹⁶ Gar halauter shounenn ap ko lačo lab. O Debleskro rakepaskro, o Yesaya penas: Ray, koon patsas kova, hoy mer lenge penam?

¹⁷ Kolla, kay patsan ko lab, patsan les, har shounan le les. Oun ko lab rakras o Yezous Kristestar.

¹⁸ Kanna poučau t'mendar: Shounan i bibolde ko lab gar? Ava! Yon shounan kova lauter. Yaake hi činlo an o Debleskro lab: Ap i tseli phoub shounan le ko rakepen. An i tsele themma vas ko lab penlo.

¹⁹ Poučau t'mendar: I Israelitarya, hayvan le ko lab gar? Ava! Yon hayvan ko lab. O Mose penell menge, hoy o Devel penas: Me krau, te zilverenn t'mer ap kolende, kay hi gar mire menshe. Oun t'mer venn rhoyedo pral kolende, kay či mandar djinenna.

²⁰ O Yesaya trashas gar te penell, hoy o Devel pral lende penas: Me moukom man kolendar te hatsell, kay rodan man gar. Oun sikrom man kolende, kay gar pal mande poučan.

²¹ Pral i Israeleskre menshende penas o Devel: O tselo dives homs lačo ap lende, oun yon kamenn gar ap mande te shounell oun kamenn gar te krell, hoy me lenge penau.