Nehemia 8 - O Debleskro Lab 2024 (Sinte-Manouche)

O Esra draverell glan dran o Moseskro liil

¹ Oun har o eftato čon vas, oun i Israelitarya pale an pengre forya his, van i tsele menshe khetne har yek morsh ap i platsa glan o Panyeskro Voudar. Oun yon penan ap o Esra, te anell yob o Moseskro liil, kay dren tardo hi, hoy o baro Devel penas, hoy i Israelitarya hounte krenn oun rikrenn. O Esra his i sikepaskro, kay prindjras mishto o Debleskro lab.

² Yaake anas o rashay Esra ap o ersto dives an o eftato čon o Moseskro liil glan i tsele Israelitarya, kay khetne van, glan kol tsele morshende oun djouvyende, oun lauterende, kay nay hayvan les.

³ Oun sik taysarlakro bis mashkral o dives draveras yob dran ko liil glan, kote ap koy platsa glan ko Panyeskro Voudar. Oun hakeno das yak ap kova, hoy an ko liil dren tardo his.

⁴ Oun o sikepaskro, o Esra, his tardo pre ap i kashteno morhton, hoy koleske kerdo vas, te dikenn oun nay shounenn les lauter. Oun pash leste his tardo, ap i čači rig: O Mattitya, oun o Shema, oun o Anaya, oun o Ouriya, oun o Hilkiya, oun o Maasseya. Oun ap leskri servi rig: O Pedaya, oun o Mishael, oun o Malkiya, oun o Hashoum, oun o Hashbaddana, oun o Zakarie, oun o Meshoullam.

⁵ Oun o Esra his tardo pral ap o kashteno morhton. Oun i tsele menshe dikan, har kras lo o liil pre. Koy stan le lauter pre.

⁶ Oun o Esra sharas o baro Debles, kay bareder hi har lauter vavar. Oun i tsele menshe penan: “Amen, Amen!” Oun har le kova penan, hadan le pengre vasta pre. Oun palle vitsran le pen tele glan o baro Debleste lengre mouyentsa ap i phoub.

⁷ Palle stan le pale pre hakeno ap peskri platsa. Oun i Levitarya penan i menshenge, hoy kol laba an o Moseskro liil kamenn te penell. Kol Levitarya his o Yeshoua, oun o Bani, oun o Sherebya, oun o Yamin, oun o Akkoub, oun o Shabbetay, oun o Hodiya, oun o Maasseya, oun o Kelita, oun o Asarya, oun o Yosabad, oun o Hanan, oun o Pelaya.

⁸ Oun ko liil, kay o Debleskro lab dren činlo his, his an o hebretikro rakepen. Oun i Levitarya rakran kol laba an o aramtikro rakepen, hoy kal menshe kote rakran. Oun palle sikran le len, hoy kol laba kamenn te penell, yaake te hayvan le, hoy koy glan dravedo vas.

⁹ Oun i tsele menshe rovan, har shounan le kol laba, hoy an o Moseskro liil tardo his. Oun o Nehemia, kova his o moskro pral o foro Yerusalem, oun o rashay Esra, kova his o sikepaskro, oun kol Levitarya, kay i menshenge penan, hoy o Debleskro lab kamell te penell, kolla penan ap lauterende: “Kava dives hi i baro dives o baro Debleske, kay t'maro Devel hi. Doleske moukenn t'mare djia gar phares te vell! Oun ma rovenn!”

¹⁰ Oun yob penas pale ap lende: “Djan koy oun rhan thoullo rhapen oun piyenn goudlo pipen! Oun bičrenn kolestar ninna kolenge, kay kran pen kek rhapen! Kava dives hi i baro dives o Debleske, maro rayeske. Moukenn t'menge o dji gar phares te vell! Na-a, moukenn t'mare djia givenn o baro Debleske! Palle han zorelo.”

¹¹ Oun i Levitarya rakran lačes ap i menshende oun penan: “Ačenn kanna! Kava dives hi i Debleskro dives. Moukenn t'mare djia gar yaake phares te vell!”

¹² Kote djan i tsele menshe koy, te rhan le oun piyenn le. Oun yon bičran pengro rhapastar kolenge, kay len či his, oun givan oun khelan i barhtyatar. Yon hayvan kol laba, hoy lenge penlo van.

I bare divessa, hoy kharenn Patyengre Khera

¹³ Oun ap o douyto dives van i pralstoune kol Israelengre familyendar oun i rashaya oun i Levitarya khetne pash o Esra, ko sikepaskro, kay o Debleskro lab mishto djinas, te sikrell lo len, hoy an o Moseskro liil tardo hi, te hayvenn le o Debleskro drom feteder.

¹⁴ Oun an ko liil hatsan le kol laba, kay penas o baro Devel ap o Moseste, te hounte rikrenn i Israelitarya kol bare divessa, kay kharenn Patyengre Khera an o eftato čon. Oun an kol divessa hounte djivenn le an tikne khera, hoy yon penge dran patria krenn.

¹⁵ Yaake dan le vin gole an pengre tsele forya, ninna an Yerusalem, oun penan: “Djan vin ap i berge oun anenn kashta i djeteskre roukendar, ninna i divye djeteskre roukendar, oun i mirtetikre roukendar oun i palmtikre roukendar oun vavar roukendar, kolen boud patria hi. Oun krenn kolendar tikne khera dran patria, yaake har an o Moseskro liil činlo hi.”

¹⁶ Kote djan i menshe vin oun anan kashta i patyentsa oun kran penge patyengre khera. Oun hakeno kras peske sau kheer, kol yek pral ap pengre khera, kol vavar pal pengre khera, ninna ap koy platsa glan o Debleskro kheer oun ap i platse pash o Panyeskro Voudar oun pash o Efrayimeskro Voudar.

¹⁷ Oun i tsele menshe, kay khere van dran i themma, kay le pandle his, kolla kran penge khera dran patria oun djivan an lende. Kova kran i Israelitarya bouder gar yaake rah, har o Yosua moulo hi, koleskro dad o Noun his. Oun yon his boud boud barhtelo.

¹⁸ Hako dives draveras o Esra dran o liil glan, kay o Debleskro drom siklo vell, o tselo tsiro, kay yon kol bare divessa rikran. Oun kol bare divessa djan efta divessa. Oun ap o orhtato dives van le lauter yaake khetne, har činlo his an i čačepaskre laba.