Nehemia 6 - O Debleskro Lab 2024 (Sinte-Manouche)

Čilače menshe kamenn o Nehemeske barra an o drom te čivell

¹ O Sanballat oun o Tobiya oun o Geshem, ko Arabari, oun kol tsele vavar, kay menge čilačepen kaman, kolla shounan, kay his i massouri kerdo, oun kek kotar pral ačas, kay barra vi-phagedo his. An ko tsiro his kokres i voudya gomme gar dren.

² Kote bičras o Sanballat oun o Geshem morshen pash mande, oun moukan mange te penell: “Ab pash mende an o gab Kefirim an o telstouno them pash o foro Ono!” Len his glan, te krenn le mange čilačepen.

³ Oun me bičrom lenge bičepangre pale, oun moukom lenge te penell: “Me krau kate i bari boudi, oun me nay vau gar tele. Te moukoms kate lauter čiddo oun voms tele pash t'mende, nay vals yaake, te djals koy boudi gar doureder.”

⁴ Star kope bičran le morshen pash mande kol labentsa. Oun star kope penom lenge kal emlige laba pale.

⁵ Kote bičras o Sanballat o pančto kopo peskro bičepaskres pash mande oun das les i liil peha, hoy gar pandlo his.

⁶ An koleste his činlo: Mank i tsele menshende djal o rakepen trouyel, oun o Geshem penell les ninna: Tout hi glan, te hadess tout khetne i biboldentsa pral mende! Doleske čiveh tou i massouri pale pre. Oun pal kova, hoy rakedo vell, kameh tou lengro baro ray te vell,

⁷ oun moukal Debleskre rakepangre pash toute gole te dell, kay glan toute vin kharenn an o foro Yerusalem, te hal tou o baro ray pral o them Youda. Djiness, kova vell ninna o baro rayeske penlo. Yaake ab pash mande, te rakras mer khetne pral lauter, hoy hounte kras!

⁸ Kote moukom leske te penell: “Či kolestar, hoy tou kay rakreh, hi čačo. Dran tiro dji vell kava lauter!”

⁹ Yon lauter kaman menge daar te krell, te boudras gar doureder, te vell i massouri gar kerdo. Doleske krom mire vasta zorleder.

¹⁰ Oun me vom an o kheer, kay o Shemaya djivas, koleskro dad o Delaya his, oun koleskro dad o Mehetabel his. O Shemaya nay djas gar dran peskro kheer vin, oun penas mange: “Me oun tou hounte vas khetne an o Debleskro kheer oun hounte pandas men dren an i palstouni isema. Yon venna, te denn le tout temerl. Rati venn le, te denn le tout temerl.”

¹¹ Me penom: “I morsh, har me hom, nashell gar krik. Patseh, te djoms an o Debleskro kheer, te ačap djido? Me djau gar dren!”

¹² Me hayvom, koles bičras gar o Devel! His o Tobiya oun o Sanballat, kay dan les love, te penell yob sau koova mange,

¹³ te darap man oun krap kova oun anap yaake doosh ap mande. Palle vals len doha, hoy le pal mande nay rakrans, oun nay praasans man koleha!

¹⁴ Miro Devel, biste kova lenge gar, hoy o Tobiya oun o Sanballat kran, oun ninna hoy i Noadya an o Debleskro lab pral mande vin rakras, oun kol tsele vavar, kay kran, har te rakrans le Debleskre laba vin, oun kaman mange daar te krell.

I tseli boudi ap i massouri hi kerdo

¹⁵ Oun ap o biish-te-pančto dives an o čon Elul his lauter ap i massouri kerdo. Paash-sheel-te-douy divessa djas koy tseli boudi.

¹⁶ Har shounan kova kolla lauter, kay menge čilačepen kaman, trashan i menshe an i tsele themma, hoy troul mende hi. Oun lengro pre-phourdepen djas krik. Oun yon hayvan, te his maro Devel pal koy boudi tardo.

¹⁷ An kol divessa činan boud pralstoune dran Youda lila ap o Tobiya, oun lila lestar djan ap lende.

¹⁸ An o them Youda his boud, kay pen sovel dan, te rikrenn le pash leste. O dad leskri romyatar his o Shekanya, koleskro dad o Ara his. Oun leskro čavo, o Yohanan, romedineras i čat foun o Meshoullam, koleskro dad o Berekia his.

¹⁹ Oun yon rakran glan mande pral ko tselo lačepen, hoy yob lauter kras. Oun penan leske, hoy me penom. Oun o Tobiya bičras mange lila, kolentsa yob kamas mange daar te krell.