Nehemia 13 - O Debleskro Lab 2024 (Sinte-Manouche)

I menshe, kay kek Israelitarya his, nay ačenn bouder gar mank lende

¹ Ap ko dives draveran le dran o Moseskro liil glan i tsele menshende. Oun yon hatsan, te hi an ko liil činlo: Kek i menshendar Ammon, vitar kek i menshendar Moab nay djivenn o Debleskre menshentsa khetne, oun kova kek tsireske.

² Glan i rah tsiro dan i Ammonarya oun i Moabarya i Israelende kek maro oun kek pani, har kolla ap o drom his. Oun i Moabarya playsran o Bileames, te rakrell lo i bibarht pral i Israelitarya vin. Maro Devel kras dran i bibarht i barht.

³ Oun har shounan i Israelitarya kanna kava činlo lab, rodan le lauter kolen vin, kay vavar menshendar his oun mank lende djivan. Oun kolla nay ačan gar bouder pash lende.

O Debleskro kheer hounte ačell djoudjo

⁴ Glan yek tsiro vas o rashay Elyashib o pralstouno pral i rhapangre khera pash o Debleskro kheer. Oun yek leskre menshendar his o Tobiya.

⁵ Koles das lo ko baro kheer, kay glan kova o djob čiddo his, hoy o Debleske rhačedo vas, ninna o soungepaskro koova oun kol tsele koola, hoy i boudjake koy his, oun ninna o djob oun i mool, oun o djet, hoy o deshto kotar kolestar his, hoy ap i Israelengri phoub bares vas. Kova lauter his i Levitarenge oun i gipangrenge oun kolenge, kay ap o foreskre voudya yak dan oun ninna i rashayenge.

⁶ Har o Elyashib ko baro rhapaskro kheer o Tobiyaske das, te djivell lo koy, homs me gar an o foro Yerusalem. An ko bersh, har o Artaxerxes an o 32. (triyanda-te-douyto) bersh o baro ray pral Babilonia his, djom me pash leste pale. Pal i tsiro poučom lestar, te moukell lo man pale pale te djal an Yerusalem.

⁷ Oun har vom pale an o foro Yerusalem, dikom me kova, hoy kote glan djas, oun hoy gar pal o čačepen his, hoy o Elyashib koy o Tobiyaske kras, har lo leste ko rhapaskro kheer das ap platsa glan o Debleskro kheer.

⁸ Oun miri rholi pral kova his baro. Oun me djom koy oun vitsrom ko tselo koova, hoy o Tobiyas his, dran o kheer vin,

⁹ oun penom zoreles, te krenn le ko kheer djoudjo, oun ninna kol khera, kay pashel his. Oun pal kova anom pale ko tselo koova, hoy i boudjake an o Debleskro kheer hi, ninna o djob rhačepaske, oun o soungepaskro koova.

¹⁰ Oun kote dikom ninna, te anan i Israelitarya gar i Levitarenge ko koova, hoy len hounte dino vals. Doleske kran i Levitarya oun i gipangre bouder gar pengri boudi an o Debleskro kheer, oun nashan penge hakeno ap peskri kotar phoub.

¹¹ Kote čingrom ap i čačepangre morshende oun poučom: “Har nay vell yaake dour, te vell bouder kek boudi kerdo an o Debleskro kheer?” Oun me moukom i Levitaryen oun i gipangren pale pale te anell, oun dom hakenes peskri boudi!

¹² Oun i tsele menshe dran Youda anan pale o deshto kotar pengro djobestar oun djetestar oun pengri molyatar an kol rhapangre khera.

¹³ Oun me rodom morshen vin, te venn le i pralstoune pral i rhapangre khera. Kolla his o rashay, o Shelemya, oun o činepaskro, kay lila činell, o Zadok, oun o Levitari, o Pedaya. Kolenge ap i rig his tardo o Hanan, koleskro dad o Zakour his, koleskro dad o Mattanya his. Kolla star his morsha o labestar. Kolenge vas penlo, te denn le ko rhapen ap pengre phralende.

¹⁴ Dik, hoy kay krom, miro Devel! Ma biste ko lačepen, hoy krom ap tiro kheer, te vell koy boudi an leste mishto kerdo.

O Nehemia krell, te vell o Debleskro dives dren rikedo

¹⁵ An kol divessa dikom me an o them Youda menshen, kay ap o Debleskro dives molengre drake stakran, oun vavar, kay anan djob oun čivan les ap bourike, ninna mool, drake, fayge oun vavar koova, oun anan kova an o foro Yerusalem. Oun me rikrom len pre oun dom len trad, te bikrenn le kova gar ap ko dives.

¹⁶ An o foro Yerusalem djivan ninna menshe dran Tirus. Kolla anan mačen oun vavar koova oun bikran kova ap o Debleskro dives ap i menshende dran Youda.

¹⁷ Kote čingrom ap i pralstunende an Youda oun poučom lendar, hoy kova te vell. “T'mer lenn o Debleske leskro dives krik”, penom me. “Ko dives, kay leske kokres hi.

¹⁸ Kran kova t'mare phoure gar ninna yaake, te anas maro Devel koy bari bibarht pral mende oun pral kava foro? Oun t'mer krenn i rholi pral o Israel gomme bareder, doleske te boudrenn t'mer ap o Debleskro dives.”

¹⁹ Oun me penom, te venn o foreskre voudya pandlo glan te vas o Debleskro dives, an ko tsiro har o kham tele djas, oun te venn le gar pale pre kerdo glan ko tsiro, kay hi o Debleskro dives trouyel. Oun me bičrom morshen an o foreskre voudya, te denn le yak, te vell kek koova an o foro Yerusalem dren hadedo.

²⁰ Kote ačan kol parepangre oun bikepangre pengro koveha yek, douy kope vin glan o foro Yerusalem pral i rat.

²¹ Oun me dom len trad oun penom ap lende: “Hoske ačenn t'mer pral i rat vin glan i massouri? Te krenn kova gomme yek kopo, moukau t'men an o stilepen te vitsrell.” Foun ko tsiro van le gar bouder ap o Debleskro dives.

²² Oun me penom ap i Levitarya, te krenn le pen djoudjo o Debleske. Palle te venn le pash o foreskre voudya oun denn koy yak, te vell o Debleskro dives dren rikedo. Ninna kava biste mange gar, miro Devel. Oun dik lačes ap mande an tiro baro kamlepen.

I Israelitarya hounte romedinerenn kekes, kay gar lengre menshendar hi

²³ An ko tsiro dikom me bibolden, kay lan penge romyen dran o Filistarengro foro Ashdod, ninna dran i themma Ammon oun Moab.

²⁴ Oun o paash kolengre čavendar rakran ashdodikes oun hayvan gar o biboldengro rakepen. Yon rakran o rakepen kol vavar menshendar.

²⁵ Oun me čingrom kol morshentsa, praasom len, oun dom ninna morshen lendar, oun tserdom lengre balla vin. Oun krom, te denn le pen sovel pash o Debleste, te denn le kek pengre čendar kol vavarengre čavende, oun lenn kek kolengre čendar penge oun pengre čavenge.

²⁶ “Djinenn gar”, penom, “te kras o baro ray Salomo savo koova oun anas doosh ap peste? Oun an boud vavar themma, his kek baro ray har yob his. Oun o Devel kamas les yaake, te kras lo, te vell lo ray pral o tselo them Israel. Ninna les anan peskre romya dran kol vavar themma yaake dour, te anas lo doosh ap peste!

²⁷ Oun kanna hounte shounap t'mendar, te anenn savi bari doosh ap t'mende, oun rikrenn t'men gar ap ko lab, hoy o Devel das, oun lenn t'menge romyen dran vavar themma!”

²⁸ Oun o čavo o baro rashayestar Elyashib, o Yoyada, koles his morsh čave, kolendar yek i romyat las, kolakro dad o Sanballat hi dran o foro Bet-Horon. Oun koles tradom mandar krik!

²⁹ Miro Devel, ma biste, kay anan yon ladj ap o rashayeskri boudi, oun rikran pen gar ap ko lab, hoy tou i rashayentsa oun i Levitarentsa vin kral.

³⁰ Oun yaake krom me i Israelitaryen pale djoudjo oun erligo glan o Debleste, oun las dran lende lauter krik, hoy dran o vi-them an lende dren vas. Oun penom lenge, koon i rashayendar oun i Levitarendar havi boudi hounte krell, yaake te djinas hakeno, hoy te krell lo.

³¹ Oun penom ninna, koon ap havo tsiro o kasht hounte anell rhačepaske, oun krom, te vell o nevo djob oun i neve roukengre anlo. Biste kova mange gar, miro Devel, oun dik lačes ap mande!