Nehemia 10 - O Debleskro Lab 2024 (Sinte-Manouche)

I Israelitarya denn pengro lab, te kamenn le o Debleskro drom te djal

¹ Oun doleske rakrah men kanna tele oun činah kova pre, te rikrah men ap lauter, hoy mer kate penam. Oun mare pralstoune, mare Levitarya, oun mare rashaya čivenn pengre laba tel kava liil oun pandenn palle o liil khetne.

² Oun kalla hi i laba kolendar, kay čivan pengro lab tel kava liil: Nehemia, ko moskro, koleskro dad o Hakalya his, oun o Sedekya.

³ I rashaya: Seraya, Asarya, Yirmeya,

⁴ Pashour, Amarya, Malkiya,

⁵ Hattoush, Shebanya, Mallouk,

⁶ Harim, Meremot, Obadya,

⁷ Daniel, Ginneton, Barouk,

⁸ Meshoullam, Abiya, Miyamin,

⁹ Maasya, Bilga, Shemaya.

¹⁰ I Levitarya: o Yeshoua, koleskro dad o Asanya his, o Binnouy, koleskro dad o Henadad his, oun o Kadmiel;

¹¹ oun lengre phrala: Shekanya, Hodiya, Kelita, Pelaya, Hanan,

¹² Mika, Rehob, Hashabya

¹³ Zakour, Sherebya, Shebanya,

¹⁴ Hodiya, Bani, Beninu.

¹⁵ I pralstoune pral i Israelitarya: Parosh, Pahat-Moab, Elam, Zattou, Bani,

¹⁶ Bounni, Asgad, Bebay,

¹⁷ Adoniya, Bigvay, Adin,

¹⁸ Ater, Hiskiya, Asur,

¹⁹ Hodiya, Hashoum, Bezay,

²⁰ Harif, Anatot, Nebay,

²¹ Magpiash, Meshoullam, Hesir,

²² Meshesabel, Zadok, Yaddoua,

²³ Pelatya, Hanan, Anaya,

²⁴ Hoshea, Hananya, Hashoub,

²⁵ Lohesh, Pila, Shobek,

²⁶ Rehoum, Hashabna, Maasseya,

²⁷ Ahia, Hanan, Anan

²⁸ Mallouk, Harim, Baana.

²⁹ I tsele Israelitarya, i rashaya, oun i Levitarya, oun kolla, kay yak denn ap o foreskre voudya, oun i gipangre, oun i boudepangre an o Debleskro kheer, oun kolla i vavar menshendar, kay moukan pengre menshen oun djan kanna o Debleskro drom, ninna lengre romya, lengre čave oun ča, kay hayvenn kova,

³⁰ yon dan pen khetne pengre phralentsa, kol pralstunentsa mank lende, oun dan pen sovel, te djan le ap o Debleskro drom, yaake har sikras lende o Mose, koles o Debleskro vast his, te djivenn le pal hako lab oun pal o čačepen, hoy das len o baro Devel, lengro ray, oun te kamenn kova te krell, hoy yob lendar kamell.

Kolla hi i laba, hoy činan le an i liil

³¹ Mer kamah mare čen gar i morshentsa i vavar menshendar an kava them te romedinerell, oun ninna lengre čen gar mare čavenge te lell.

³² Mer kamah gar ap o Debleskro dives djob oun vavar koova te ginell kol menshendar, kay an kava them djivenn, te venn yon pengro koveha ginepaske ap o Debleskro dives oun ap vavar bare divessa. An hako eftato bersh boudrah gar ap mari harhetikri phoub. Oun mer moukah hakeneske peskri siyaan tele.

³³ Koy boudjake an o Debleskro kheer dell hakeno mendar star gramme roup.

³⁴ Ko roup hi i marenge, hoy o Debleske koy čiddo venn, oun ko rhapaske oun kol firhenge, hoy venn leske rhačedo hako dives; ninna kolenge, kay venn o Debleske anlo ap hako Debleskro dives, oun ap hako nevo čon oun ap i vavar bare divessa. Ko roupeha vell ninna o vavar koova playsedo, hoy denn le o Debleske, ninna kol firhe, hoy venn rhačedo, te vell i Israelengri doosh krik lino, oun i tseli boudjake an maro Debleskro kheer.

³⁵ Mer anah hako bersh o kasht rhačepaske an maro Debleskro kheer, te nay vell les rhačedo ap i rhačepaskri maro baro Deblestar, yaake har činlo hi an o Moseskro liil. Mer, i rashaya, i Levitarya oun i vavar Israelitarya, vitsrah tikne barra, te sikrenn le, koon mare familyendar an havo tsiro kava kasht anell.

³⁶ Ninna hako bersh dah o feteder halauterestar, hoy vas baro ap mari phoub oun ap mare rouka, oun anah kova an o baro Debleskro kheer.

³⁷ Mer anah hako phoureder morsh čaves oun hako firhes, hoy o phoureder peskri datar hi, an maro Debleskro kheer. Ninna i groumyendar oun i bakrendar anah ko phoureder pash kol rashayende, kay boudrenn an maro Debleskro kheer.

³⁸ Mer dah len ninna foun o nevo yarro oun kol neve roukengre, hoy ap mare rouka bares van, ninna foun i nevi mool oun o nevo djet oun čivenn kova lauter an i iseme pash maro Debleskro kheer. Ninna i Levitaryen te vell, hoy lenge hi: o deshto kotar lauterestar, hoy ap maro phoub baro vas. Kolla te venn oun lenn penge o deshto kotar an hako gab oun hako foro, kay mari harhetikri phoub hi.

³⁹ Oun yek rashay kol menshendar Aron hounte djal lentsa ap ko tsiro, kay lenn le ko deshto kotar dren. Oun i Levitarya hounte anenn o deshto kotar foun lengro deshto kotar an maro Debleskro kheer oun čivenn kova an ko kheer, kay savo koova pre garedo vell.

⁴⁰ An kava kheer anenn i Israelitarya oun i Levitarya ko djob, i mool oun o djet, hoy denn le o Debleske. Kote hi ninna kol koola, kolentsa boudrenn le an o Debleskro kheer, ninna i rashaya, kay kote boudrenn, oun kol morsha, kay ap i voudya yak denn, oun i gipangre. Yaake dah yak, te vell lauterestar doha an o kheer maro Deblestar.