Nahum 3 - O Debleskro Lab 2024 (Sinte-Manouche)

I phagi o foreske Ninive

¹ Har djoungeles djal touke, tou foro, kay yaake boud rat nashas! Tou hal pherdo rhorhepen oun čoredo bravlepen, oun nay moukeh tiro randepen gar.

^2-3 I klissepangre venna! Shounenn, har denn le pengre čoupyentsa! Yaake sik har djala nashenn i graya. I vourdya oulerenn, te krenn i rade bari gole. I klissepangre hadenn pengre sasterne rhare oun vitsepaskre čourya. Koy hi le čiddo – boud boud marede menshe, yaake boud, te perenn i djide pral lende. Yaake boud moule, te nay djinell kek, har boud yon hi.

⁴ Kova hi i phagi o foreske Ninive. O foro his har i shoukar djouvel, kolat boud morsha hi, oun o bengeskro koveha trouyel djal, oun yaake i menshen an vavar themma ap peste pandas.

⁵ Dik, penell o baro Devel, ko ray pral o bolepen oun i phoub, kanna dau tout tiri phagi. Me čakrau tiro ripen pre, hadau les pral tiro shero, te hal vin rido tardo glan i menshende an i vavar themma, oun hounte ladjess tout glan lende.

⁶ Me vitsrau čik ap toute oun praasau tout, oun sikrau halauterenge tiri ladj.

⁷ Hakeno, kay tout palle dikell, nashell toutar oun penell: Ninive hi paash dino! Kekes khaytell ko foro. Kekes hi lače laba ko foreske.

⁸ Hal tou feteder har ko foro Theben, hoy pash o pani Nil čiddo his? Ko pani troul ko foro his har i massouri troul leste.

⁹ Boud boud Egiptarya oun lourde dran Etiopia kouran pen kava foreske. Koy pashel van lourde dran i themma Pout oun Libia ap lengri rig.

¹⁰ Ninna kava foro vas dren lino, oun leskre menshe pandles anlo an i vavar them. Lengre čave van moulo dino ap hako drom. Pral lengre pralstunende vitsran le kashta, koon kones lella. I tsele pralstunen pandan le sasterne shellentsa.

¹¹ Ninna tou, Ninive, veh mato i doukatar oun dinelo an o shero. Ninna tou rodeh, kay tout nay khatress kolendar, kay kamenn tout te marell.

¹² Tire zorele barrengre khera hi har fayge ap i rouk. Vell ko rouk trisslemen, perenn kol fayge koleske an o mouy, kay les trisslell. Yaake sik perell ninna tiro foro an i vasta kolendar, kay kourenn pen leha.

¹³ Tire kourepangre – har djouvya van le! I voudya glan tiro them hi dour pre, te nay djan kolla dren, kay kamenn tout te marell. I yag rhačrell kol zorele kashta, kolentsa i bare voudya pandle hi.

¹⁴ Hidjenn t'menge pani khetne ko tsireske, kay čivenn pen i lourde troul t'maro foro tardo, oun t'mer yaake dren pandlo han. Dikenn pal t'mare massurya, krenn len zorleder! Stakrenn koy čik, kolatar t'mer barra rhačenn! Krenn zorele barra!

¹⁵ Ninna te krenn kova lauter, vell i yag oun rhal t'men, oun i lourde pengre rharentsa marenn t'men. Ninna te han t'mer yaake boud har stepangre, t'mendar ačell gar boudeder pral har i harhetikri phoubyatar, kay rhan i stepangre o djob pre.

¹⁶ T'men hi boudeder parepangre har momlia ap o bolepen! Sik hi le krik – har i stepaskro vin vell dran peskro yaro – oun sik hi lo krik!

¹⁷ T'mare raya hi har save stepangre, t'mare pralstoune har boud save stepangre, kay beshenn pen khetne ap i massouri ap i shila dives. Oun har o kham palle pre djal, hi le pale krik, Kek djinell, kay le hi.

¹⁸ Tou, o baro ray pral o them Assour, djiness, i pralstoune pral tiro them sovenn hako tsireske, oun tire zorele morsha stenn bouder gar pre. I menshe an tiro them hi kate te kote tradedo ap i berge. Oun kek dell len khetne gole.

¹⁹ Či hi, hoy tiro doukepen sasto nay krell! Ko doukepen, hoy tou lal, ap koleste hounte meress. Lauter kolla, kay toutar shounenn, denn i vasta pral o shero khetne. Kek hi koy, ap koleste gar pale te pale čilačo hals.