Nahum 2 - O Debleskro Lab 2024 (Sinte-Manouche)

O foro Ninive djal tele

¹ T'mer menshe an Youda, dikenn: Pral i berge vell i morsh, kay anell i lačo lab. Yob penell: O kourepaskro tsiro hi trouyel! Rikrenn pale t'mare bare divessa oun avenn barhtelo koy dren! Denn o Debleske kova, koleske t'men sovel dan. Ko čilačo, kay halauter paash das, vell bouder gar an t'maro them. Yob hi bouder gar koy.

² T'mer menshe an o foro Ninive, kourepangre venna, te krenn le t'maro foro paash. Denn garda ap o foreskri massouri! Rikrenn i dromma an i yak! Lenn i rhare an o vast! Anenn t'mare tsele lourden khetne!

³ O Israel his har i shoukar drakengro them, hoy i randepangre khetne stakran, oun lengre drakengre kashta tele dan. Kanna dell o baro Devel o Yakobeskre čavende pengro barepen pale pale.

⁴ Kol lourde venna, te kourenn le pen touha, Ninive! I kourepangre hidjrenn lole shilte oun lole gada. O saster ap i kourepangre vourdya dikell vin har yag. Oun i graya nashenn sik.

⁵ Har divyes oulerenn i vourdya ap i dromma! Yek hi sikeder har o vavar. Yon dikenn vin har yag, oun hi sik har koy yag, hoy har i karepen ap o bolepen pre oun tele djal.

⁶ I pralstoune lourde venn khetne gole dino. Yaake sik nashenn le, te perenn le pral pengre pire. Pash o foreskri massouri nashenn le, oun čivenn pengro zorelo khatepen pre.

⁷ Kol voudya pash i panya venn pre kerdo. Oun i daar taprell halauteren an o baro rayeskro kheer.

⁸ Koy rani vell pandles krik anlo. Lakre djouvyengre boudepangre rovenn har i taube, oun denn penge ap pengro beč.

⁹ Halauter nashenn dran o foro Ninive har pani, hoy dre-pandlo his, vin nashell, te vell o voudar pre kerdo. Ačenn tardo! Ačenn tardo! denn le gole pal lende. Kek rissrell pes!

¹⁰ T'mer lourde, randenn roup, randenn sonakay! O foro hi pherdo bravlepen, pherdo kouč koova!

¹¹ Khetne stakedo oun vi-čoredo vell o foro. Halauteren hi darene djia, lengre herya trissenn i daryatar. Yon djan bango i doukatar, lenge mouya hi parno.

¹² Hoy vas kanna dran o foro Ninive? O foro his har i khatepen, kay o levo oun i levetsa pengre ternentsa trouyel nashan, oun kek koy his, kay lenge kote nay daar krals.

¹³ O levo randas oun tapras yaake boud firhen, te van leskre čave oun leskre romya čalo. Leskro khatepen kras lo pherdo koleha, hoy lo randas oun maras.

¹⁴ Dik, penell o baro Devel, ko ray pral o bolepen oun i phoub, me djau ap toute, oun rhačrau tire kourepangre vourdya. Oun o rharo marell tire čaven. Tou aneh bouder gar randedo koova khere. An kek tsiro bičreh tou bouder bičepangren vin, kay penenn i menshende an vavar themma, hoy te krenn le.