Micha 4 - O Debleskro Lab 2024 (Sinte-Manouche)

I shoukar tsiro vell pral Yerusalem

¹ O tsiro vella, kay hi koy berga zoreles tardo, kay o baro Debleskro kheer tardo hi. Kay berga hi bareder har i tsele vavar berge. Oun pash late venn i menshe dran i tsele themma.

² Boud menshe dran vavar themma venn kay, oun penenn: “Avenn, djas pral ap i berga o baro Deblestar, pash ko kheer kolestar, kay o Yakobeskro Devel hi. Kote sikrell yob mende, har te djas ap leskro drom, te djivas mer yaake har yob kamell.” I berga Sion hi koy platsa, kay sikrell yob i menshende, hoy lo lendar kamell. Oun dran Yerusalem djan save menshe vin, kay penenn i vavarenge o baro Debleskro lab.

³ Yob krell o čingepen vin mank bare natsyone, oun rakrell o čačepen vin pral boudende an dour themma. Yon krenn dran lengre rhare harhetikre koola, kolentsa vitsrenn le i phoub trouyel. Oun dran lengre vitsepangre čourya krenn le čourya, kolentsa yon i drake tele činenn. An ko tsiro hi kek them o vavareha an o kourepen. Kek hounte sikrell len bouder, har te kourenn le pen i rhareha.

⁴ Hakeno nay beshell tel peskre drakengre rouka oun faygetikre rouka. Oun kek krell leske traash. Kava penell o baro Devel, ko ray pral o bolepen oun i phoub.

⁵ Ninna te mangell haki natsyona peskro debles an, mer djivah kokres maro Debleha – kova hi o baro Devel – kanna oun hako tsiro.

⁶ O baro Devel penell: O tsiro vell, kay anau mire menshen pale khetne, yaake har anell i bakrengro peskre bakren pale khere, hoy doukedo hi oun krik tradedo van. Me dom len pengri phagi.

⁷ Oun me krau, te venn lendar boud menshe. Ava, kolendar, kay krik tradedo his oun pale khere anlo van, vell i baro natsyona. Oun palle hom me, o baro Devel, o baro ray pral lende ap i berga Sion hako tsireske.

⁸ Oun tou Yerusalem hal har i turmo, kolestar me garda dau ap mire menshende. Tou veh pale ko zorelo raylo foro, hoy hals. An toute djivell o baro ray.

Kanna hi o foro Yerusalem gomme an i čilače vasta

⁹ Hoske deh kanna savi bari gole? Hi kek baro ray pash toute? Oun kol morsha, kay sikran tout, hoy te kress, nashan le penge? Hoske hi tout save douka har i djouvel, kay lell i ternepen?

¹⁰ Ava, t'mer an o foro Sion, save douka venn pral t'mende. Oun t'mer denn bari gole, har i romni, kay lell i ternepen. T'mer hounte djan dran o foro, oun hounte rikrenn t'men vin ap o them pre, oun venn bis pash o foro Babilon anlo. Kote lell t'men o baro Devel pale vin. Yob lell t'men vin dran i vasta kolendar, kay rikran t'men tele.

I tsiro vell, kay hi o foro Yerusalem zorleder har kolla, kay kourenn pen leha

¹¹ Kanna shoun Yerusalem, lourde dran boud themma krenn pen khetne, te djan le ap toute pre Yon penenn: Nashedo hi kava foro. Dikas, har lo tele djal!

¹² Yon djinenn gar, hoy o baro Debles lentsa glan hi. Yon hayvenn gar, te anas lo len kate khetne, har djob, hoy vin dino vell.

¹³ Yerusalem, ste pre oun de len khetne, penell o baro Devel. Me krau tout yaake zorelo har i gouroum, koles sasterne shinga oun sasterne pire hi. Mare len khetne, kol menshen dran boud themma! Oun an lengro bravlepen an miro kheer, oun halauter hoy len hi, an glan mande! Me hom o ray pral i tseli phoub.

¹⁴ Kanna, t'mer an o dre-pandlo foro, rovenn oun činenn t'men ratlo! I lourde van oun pandan t'maro foro dren. Oun o Israeleskro čačepaskro morshes denn le o kashteha an o mouy.