Micha 3 - O Debleskro Lab 2024 (Sinte-Manouche)

I pralstoune an o them Youda hounte shounenn i zorelo lab

¹ Oun o Mika penas: T'mer pralstoune an o kheer Yakob, t'mer raya an o kheer Israel! Shounenn, hoy t'menge penau! T'mer hounte vans kolla, kay djinenn, hoy o čačepen hi.

^2-3 O lačepen kamenn t'mer gar! O čilačepen, kova kamenn te krell. Mire menshentsa djan t'mer trouyel, har te vans le marede firhe, kolenge i hauta tele tserdedo vell, oun o mass tele činlo foun lengre kokale, oun i kokale phagedo, oun palle o mass an i piri činlo oun keredo. Yaake rhan t'mer mire menshen.

⁴ Doleske shounell o baro Devel gar ap t'mende ap ko dives, kay denn t'mer gole ap leste. Yob sikrell t'mende o doumo ko tselo čilačepaske, hoy kran.

⁵ Kava penell o baro Devel ap i rakepangre, kay penenn, te vell len i lab o baro Deblestar, oun kova hi gar yaake. Yon rhorhenn i menshen oun penenn kolenge, kay denn len rhapaske: Halauter vell mishto t'mentsa! Kolenge, kay denn len či te rhal, penenn le: I čilačo tsiro vell pral t'mende.

⁶ Doleske vell pral t'mende kali rati. T'mer dikenn bouder kek dikepen. Kek lab o Deblestar vell t'men. O kham djal tele t'menge, oun o dives hi t'menge har i rati.

⁷ Oun i dikepangre hounte ladjenn pen, oun i dourkepangre venn sapaske. Kek lab o Deblestar hi pash lende. I ladjatar hounte rikrenn le halauter i diklo glan pengro mouy.

⁸ Man hi i bari zoor. O baro Devel čivas peskro dourho an mande. oun kras miro dji pherdi zoor, te rakrap o čačepen vin, te penap o Yakobeskre čavenge pengri doosh, ava, te sikrap i Israelenge kay le o Debleskro dromestar tele djan.

⁹ Yaake shounenn kova, t'mer pralstoune an o kheer Yakob, oun t'mer raya an o kheer Israel! T'mer, kay stakrenn t'mare pirentsa ap o čačepen trouyel, oun penenn foun kova, hoy čačo hi: Kova hi rhorhepen.

¹⁰ T'mer krenn o Debleskro foro Yerusalem shoukar oun baro kol loventsa, hoy anan khetne marepah oun rhorhepah.

¹¹ T'mare čačepangre morsha moukenn pen te makell. T'mare rashaya lenn love koleske, hoy le i menshenge penenn. Oun i lovenge penenn o Debleskre rakepangre, glan-vi, hoy vella. Oun t'mer penenn: “O baro Devel hi ap mari rig. Kek bibarht nay vell pral mende.”

¹² Doleske vell o Debleskro foro trouyel vitsedo har i harhetikri phoub. Oun an o foro Yerusalem ačell kek bar ap o vavar. Ap i berga, kay o Debleskro kheer tardo hi, venn divye bourra baro. Kova lauter vell yaake dran t'mari doosh.