Mateo 8 - O Debleskro Lab 2024 (Sinte-Manouche)

O Yezous krell yekes sasto, koleskro mass tele merella

¹ Oun o Yezous djas i berga tele, oun boud menshe djan leske palla.

² Kote vas i morsh pash leste. Koles his i djoungelo nasslepen ap peskro mass. Oun yob vitsras pes glan o Yezouseste tele ap i phoub, oun mangas lestar: “Ray, te kameh tou, nay kreh man sasto.”

³ Oun o Yezous čivas peskro vast ap leste, oun penas: “Me kamau, te vess sasto.” Oun ap yek kopo djas ko nasslepen lestar.

⁴ Oun o Yezous penas ap leste: “Shoun, pen kekeske, hoy me touke krom! Dja an o Debleskro baro kheer pash o rashayeste oun sike leste, kay tiro nasslepen toutar djas! Oun an kova glan o Debleste, hoy o Mose penas, te djinenn i menshe, kay tou sasto val.”

O pralstouno lourdo an o foro Kapernaum

⁵ Oun o Yezous djas doureder, oun vas an o foro Kapernaum. Kote vas i pralstouno lourdo pash leste, oun mangas les:

⁶ “Ray, miro boudepaskro hi khere čiddo, oun hi bango, yaake te nay djal lo bouder gar. Oun les hi bare douka.”

⁷ Penas o Yezous ap leste: “Me kamau touha te djal, oun kamau les sasto te krell.”

⁸ Koy penas o pralstouno lourdo: “Me hom gar moldo, te vess tou pash mande. Te peneh tou yek lab, yaake vell miro boudepaskro sasto.

⁹ Yaake har me ninna hounte shounap ap mire pralstunende, yaake hi man ninna lourde, kay hounte krenn, hoy me penau. Me te penau ap yekeste: Dja koy! palle djal lo. Me te penau ap i vavareste: Am kay! palle vell lo. Me te penau ap miro boudepaskro: Kre kova! palle krell yob kova.”

¹⁰ Har o Yezous kova shounas, kras lo bare yaka, oun penas ap kolende, kay leha djan: “Čačepah, me penau t'menge: Savo patsepen hatsom pash kekeste an o tselo them Israel.

¹¹ Boud menshe venna dran boud vavar themma pash o Debleste an o bolepen, oun beshenn pen tele, te rhan le o Abrahameha oun o Isaakeha, oun o Yakobeha khetne.

¹² Oun i biboldendar venna boud an i kali rat vin vitsedo. Oun yon rovenna, oun dandrenn i danda i doukatar khetne.”

¹³ Oun palle penas o Yezous ap o pralstouno lourdo: “Dja khere! yaake har tou patsal, yaake vell kova.” Oun ap kava tsiro vas leskro boudepaskro sasto.

O Yezous hi an o Petreskro kheer

¹⁴ Oun o Yezous djas an o Petreskro kheer. Kote dikas lo koleskri romyakri day. Yoy his ap o čiben čiddo oun lakro shero his tato.

¹⁵ Oun yob tapras lakro vast, oun ko nasslepen djas latar. Oun yoy stas pre, oun anas lenge i rhapen.

¹⁶ Oun har i rati vas, anan le boud menshen pash leste, kay hi benga an lende. Oun yob rakras zoreles ap i bengende, te djan le dran i menshende vin. Oun yon van vin. Ninna kras lo lauteren sasto, kay nasselo hi.

¹⁷ Yaake vas kova čačes, hoy o Debleskro rakepaskro, o Yesaya, glan i rah tsiro penas: Yob las mare douka, oun maro nasslepen mendar.

Koon o Yezouseha djal, hounte dikell gar ap vavar koova

¹⁸ Oun har o Yezous boud menshe troul peste dikas, penas lo peskre malenge: “Ouleras ap i vavar panyeskri rig!”

¹⁹ Koy vas i biboldengro čačepaskro pash leste oun penas: “Sikepaskro, me kamau touha te djal, kay tou ninna djah.”

²⁰ Penas o Yezous ap leste: “I divye djouklen hi i čiben an i phoub, kay sovenn le. Oun i čirklen hi tikne khera ap i rouka. Me, o Mensheskro Čavo, man hi či, kay nay čivap man tele, te sovap.”

²¹ Oun i vavar, yek leskre malendar, penas ap leste: “Ray, mouk man khere te djal, te paskrap miro dades! Pal kova vau touha.”

²² Penas o Yezous: “Mouk i moule pengre moulen te paskrell! Dja tou mantsa!”

Ap o divyo pani

²³ Oun o Yezous djas an o bero. Oun leskre mala djan leha.

²⁴ Har yon ap o pani his, phourdas ap yek kopo i baro zorelo dourho pral o baro pani. Oun o pani vas divyo, oun djas pre te tele, oun djas pral o bero vergel. Oun o Yezous sovas.

²⁵ Palle djan yon pash leste, djangran les pre, oun penan ap leste: “Ray! Le men kate vin! Mer tassah.”

²⁶ Koy penas lo: “Hoske trashenn t'mer? Kay hi t'maro patsepen?” Oun yob stas pre, oun penas ap ko zorelo dourho, hoy phourdas pral o pani: “Ač kanna!” Oun ap o baro pani penas lo: “Mouk tele!” Oun o zorelo dourho phourdas bouder gar, oun o pani his bouder gar divyo.

²⁷ Oun peskre mala kran bare yaka oun poučan pendar: “Havo morsh hi kova! Ninna o zorelo dourho oun o baro pani shounenn ap leste.”

O Yezous tradell i bengen dran douy morshende vin

²⁸ Oun yon van ap i vavar panyeskri rig, an o them Gadara. Oun douy morsha nashan dran i moulengre khera vin, oun van pash o Yezouseste. Kolen hi benga an lende. Oun yon hi yaake čilačo, te nay djas kek an lengro drom.

²⁹ Oun yon dan gole: “Hoy kameh tou mendar, Debleskro čavo? Val tou pash mende, te doukress men tou glan o tsiro, kay rakrell o Devel i phagi pral mende vin?”

³⁰ Dour lendar his boud bale ap i berga.

³¹ Oun kol benga mangan les: “Tou te tradeh men dran kol morshende vin, palle mouk men an kol balende dren te djal!”

³² Oun yob penas: “Djan t'menge!” Oun yon van dran i morshende vin, oun djan an kol balende dren. Oun kol tsele bale van divyo oun nashan i berga tele, oun stan an o pani, oun tassan.

³³ Oun kote his morsha, kay ap i balende yak denna. Kolla nashan an o foro, oun penan kote halauter, hoy yon dikan, ninna, kay van kol douy morsha sasto, kay benga an lende his.

³⁴ Oun i tsele menshe djan dran ko foro vin, oun van pash o Yezouseste. Oun har yon les dikan, mangan le les, te djal lo dran lengro them vin.