Mateo 7 - O Debleskro Lab 2024 (Sinte-Manouche)

O vavareskri doosh

¹ Ma sikrenn ap i vavarengri doosh! Oun o Devel dikell gar ap t'mari doosh.

² Te hi t'men i baro dji i vavarenge, hi o Debles ninna i baro dji t'menge. Hi t'men kek baro dji lenge, hi o Debles vitar gar i baro dji t'menge.

³ Hoske kameh tou i tikno kasht dran tiro phraleskro yak vin te tserdell, oun tou dikeh gar o baro kasht an tiro yak?

⁴ Har nay peneh tou ap leste: Miro phraal, am kay! Me kamau ko tikno kasht dran tiro yak vin tserdell. Oun tou dikeh gar o baro kasht an tiro yak.

⁵ Tou rhorheno! Tou kreh, har te vals tou lačeder har yob. Le ko baro kasht dran tiro yak vin, palle nay leh tou o tikno kasht dran tiro phraleskro yak vin!

⁶ Ma vitsrenn gar o Debleskro bravlepen glan i djouklende, te djan yon gar ap t'mende pre! Ma vitsrenn gar i kouč barra glan i balende, te stakrenn le len gar i pirentsa khetne.

O Devel shounell t'men

⁷ Mangenn o Debles! Oun o Devel dell t'men! Rodenn les! Oun t'mer hatsenn les. Denn ap o voudar, oun kova vell t'menge pre kerdo!

⁸ Koon mangella, kova lella. Koon rodella, kova hatsella. Oun koon ap o voudar della, koleske vell pre kerdo.

⁹ Mashkral t'mende hi kek morsh, kay dell peskro čaves i bar, te mangas yob lestar i kotar maro.

¹⁰ Vitar gar dell kek dad peskro čaves i sap an o vast, te mangas yob lestar i mačo.

¹¹ Ninna te han t'mer čilače menshe, denn t'mer t'mare čaven lačo koova. Har boud boudeder dell t'maro dad an o bolepen lačo koova kolen, kay les mangenna.

¹² Lauter, hoy t'mer kamenna, te krenn i menshe t'menge, kova krenn t'mer lenge ninna! Te krenn t'mer kova, yaake krenn t'mer lauter kova, hoy o Mose oun i Debleskre rakepangre penan.

Douy dromma

¹³ Djan an o tikno voudar dren! Nashedo hi kolla, kay djan an o baro voudar ap o bourhlo drom. Oun boud djan koy.

¹⁴ Tikno hi ko voudar oun gar bourhlo hi ko drom, kay i menshe hatsenn o djipen. Oun gar boud hi kolla, kay ap ko drom djana.

I rhorhene rakepangre

¹⁵ Denn yak, te patsenn gar kol rhorhene rakepangren, kay penenn, te vans le o Deblestar bičedo! Yon krenn, har te vans le t'mare phrala. An lengro dji hi le divye djoukle, kay marenna.

¹⁶ Ap kova, hoy yon krenna, dikenn t'mer, har yon hi. Ap i soubyengro rouk venna kek drake baro. Vitar gar venna fayge baro ap soubyengre bourra.

¹⁷ Yaake vell lačo koova dran i lačo rouk, oun djoungelo koova dran i nasselo rouk.

¹⁸ Dran i lačo rouk vell kek djoungelo koova. Oun dran i nasselo rouk vell kek lačo koova.

¹⁹ Hako rouk, kay vell kek lačo koova dran leste, vell tele dino, oun an i yag vitsedo.

²⁰ Ap kova, hoy dran lende vella, dikenna, har yon hi.

O Debleskro tsiro vella

²¹ Kolen, kay penenn ap mande Ray, ray lell o Devel gar lauter pash peste an o bolepen. Na-a! Kolla kokres, kay krenna, hoy miro dad an o bolepen kamella, kolen lell lo an o bolepen.

²² Vell ko dives, kay o Devel o čačepen pral i tsele menshende vi-rakrella. Ap ko dives penenna boud ap mande: Ray, ray, an tiri zoor penam mer i menshenge, hoy o Devel menge penas. An tiri zoor tradam i bengen vin, oun kram boud baro zorelo koova.

²³ Palle penau lenge: Me prindjrau t'men gar. Djan mandar, t'mer čilače!

O gosevo oun o dinelo

²⁴ Hakeno, kay mire laba shounella oun kova krella, hoy me penau, kova hi yaake har i gosevo morsh, kay peskro kheer ap i zorelo baro bar kras.

²⁵ Har das zorelo brishin, oun boud pani vas, oun i zorelo dourho phourdas ap ko kheer, koy peras o kheer gar khetne. Kova his ap i zorelo baro bar tardo.

²⁶ Hakeno, kay mire laba shounella oun kova gar krella, hoy me penau, kova hi har i dinelo, kay peskro kheer ap i čik kras.

²⁷ Har das zorelo brishin, oun boud pani vas, oun i zorelo dourho phourdas ap ko kheer, koy peras ko tselo kheer khetne.”

²⁸ Oun har o Yezous kova lauter penas, kran kol boud menshe, kay troul leste his, bare yaka.

²⁹ Yob rakras bari zoryah, oun gar yaake har lengre čačepangre rakran.