Mateo 6 - O Debleskro Lab 2024 (Sinte-Manouche)

Har t'mer lačes hounte venna

¹ Denn yak, har krenn t'mer lačo koova! Ma krenn les yaake, te dikenn i menshe kova oun sharenn t'men! Koon t'mendar kova krella, koles dell t'maro dad an o bolepen kek lačepen pale.

² Tou te deh i čorveles love, palle ma pen kova hakeneske! Ma kre har kolla, kay hi len douy djia, oun penenn an i biboldengre kangria oun ap o drom, havo lačepen yon kran, te venn le i menshendar sharedo. Čačepah, me penau t'menge: Kolla lenna bouder či o Deblestar. Yon anan pengro lačepen kokres dren.

^3-4 Tou te deh i čorveles love, palle kre les čorrhanes, te djinell les kek! Mouk tiro servo vast gar te djinell, hoy tiro čačo vast kras! O Devel, kay hi tiro dad an o bolepen, dikell ninna kova, hoy tou čorrhanes kral. Oun yob dell tout ko lačepen pale, hoy tou kral.

Har t'mer o Debleha hounte rakrenna

⁵ Tou te rakreh o Debleha, palle ma kre kova har kolla, kay hi len douy djia. Yon kamenn, te dikenn len i menshe, har yon an i biboldengre kangria oun ap o drom tardo hi, oun o Debleha rakrenna. Čačepah, me penau t'menge: Kolla lenna či o Deblestar. Yon anan pengro lačepen kokres dren.

⁶ Tou te rakreh o Debleha, palle dja an tiri isema, klide o voudar pal toute, oun kote rake o Debleha! Oun o baro Devel, kay hi tiro dad an o bolepen, dikell tout kote. Oun yob dell o lačepen pale, hoy tou kral.

⁷ T'mer te rakrenn o Debleha, palle penenn leske gar boud laba, yaake har kolla krenna, kay prindjrenn o čačo Debles gar. Yon patsenna, te rakrenn le boud, palle shounell len lengro devel.

⁸ Ma krenn kova yaake har yon! Oun o baro Devel, kay hi t'maro dad an o bolepen, djinella, hoy hounte vell t'men djipaske. Yob djinella kova glan ko tsiro, kay t'mer les mangenna.

Maro dad an o bolepen

⁹ T'mer te rakrenn o Debleha, penenn: Maro dad an o bolepen. Tiro lab vell sharedo!

¹⁰ Te vell ko tsiro sik, kay tou o ray hal pral i tseli phoub! Te krenn i menshe ap i phoub kova, hoy tou kameh, yaake har ninna kolla an o bolepen krenn, hoy tou kameh!

¹¹ De men maro maro hako dives!

¹² Oun biste mari doosh, hoy mer ap mende anam! Oun ninna mer bistrah o čilačepen, hoy i vavar ap mende kran.

¹³ Ma mouk men tiro dromestar tele te djal! Le men dran o bengeskro vast vin!

¹⁴ T'mer te bistrenn o čilačo koova, hoy i vavar ap t'mende kran, palle bistrell t'maro dad an o bolepen ninna o čilačepen, hoy t'mer kran.

¹⁵ T'mer te bistrenn gar o čilačo koova, hoy i vavar ap t'mende kran, palle bistrell t'maro dad an o bolepen vitar gar o čilačepen, hoy t'mer kran.

O Debleskro bravlepen

¹⁶ Te rhan t'mer i tikno tsiro či, te mangenn o Debles an, palle krenn kova gar yaake, te dikenn i menshe kova! Ma krenn har kolla, kay hi len douy djia! Yon sikrenn ap pengro mouy, te bokenn le pengro Debleske. Čačepah, me penau t'menge: Kolla lenna či o Deblestar. Yon anan pengro lačepen kokres dren.

¹⁷ Tou te rhah či an ko tsiro, kay tou o Debleha rakreh, palle thob tiro mouy, mak tire balla har hako dives,

¹⁸ te dikenn i menshe gar, kay tou bokeh o Debleske. Oun o baro Devel, kay hi tiro dad an o bolepen, djinella, hoy tou leske kreh. Yob dikell tout, oun dell tout o lačepen pale, hoy tou leske kral.

T'maro bravlepen

¹⁹ Anenn t'menge kek bravlepen ap i phoub khetne! Kote hi i kirme, hoy i ripya rhana. Koy krell o pani o saster paash. Kote hi i čorepangre, kay čorenn t'maro bravlepen.

²⁰ Anenn t'menge bravlepen an o bolepen khetne, kay kek čorepaskro t'maro koova hatsella! Oun kek kirme, vitar kek pani krell les paash.

²¹ Kote, kay tiro bravlepen hi, kote hi ninna tiro dji.

Tire yaka hi har i momeli

²² O mensheskro yak hi har i momeli an i kheer. Te dikeh kokres ap o Debleste, hi kova yaake, har te rhačell koy momeli mishto.

²³ Te dikeh ap o vavar koova, oun gar ap o Debleste, hi kova yaake, har te rhačell kek momeli an kava kheer. Te rhačell tiri momeli bouder gar, djiveh tou har an i kali rat.

Ma darenn!

²⁴ Kek boudrell nay douy rayenge. Te vals kova yaake, boudrals lo ko yekeske mishto, oun ko vavareske gar mishto. Ko yekes kamals yob gar, kol vavares kamals yob o djiyestar. Tou nay boudreh gar o Debleske oun rodeh tiro bravlepen.

²⁵ Doleske penau me t'menge: Ma darenn t'maro djipaske! Ma darenn, te vell t'men či te rhal oun či te piyell, vitar gar, te vell t'men či an-ripaske! O djipen hi boudeder moldo har o rhapen. Oun o mensho hi boudeder moldo har o ripen.

²⁶ Dikenn ap i čirkle! Yon vitsrenn kek djob an i phoub, te vell lo baro. Vitar gar anenn le o baro djob dren, te čivenn le les an o djobeskro kheer. T'maro dad an o bolepen dell len te rhal. T'mer han boudeder moldo har yon.

²⁷ Kek t'mendar nay čivell yek dives boudeder pash peskro djipen pashel!

²⁸ Hoske trashenn t'men, te vell t'men či an-ripaske? Dikenn, har ap o zenlepen shoukar bloume baro venna! Yon boudrenna gar oun krenn penge kek ripya.

²⁹ O baro ray Salomo an peskro tselo raylepen his gar yaake shoukar an-rido har yek lendar.

³⁰ O Devel kras o zenlepen yaake shoukar, hoy kava dives vin tardo hi, oun o vavar dives an o bob vitsedo vella. Kitse kope boudeder nay dell lo t'men an-ripaske! Hoske hi t'maro patsepen yaake tikno?

³¹ Ma darenn oun ma penenn: Hoy rhas? Hoy piyas? Hoy rivas?

³² Kova krenn kol menshe, kay prindjrenn o Debles gar. T'maro dad an o bolepen djinella, hoy t'men hounte vell djipaske.

³³ Moukenn o Debles o ray pral t'mende te vell, oun krenn lauter, hoy yob kamella! Oun o Devel dell t'men lauter, hoy t'men hounte vell djipaske.

³⁴ Doleske penau t'menge: Ma darenn glan kova, hoy taysar vella! Moukenn o vavar dives ap t'mende te vell, oun palle dikenna, hoy te krenn! Hako dives hi t'men doha, hoy krell t'maro djipen phares.