Mateo 5 - O Debleskro Lab 2024 (Sinte-Manouche)

O Yezouseskro baro rakepen

¹ Oun har yob kol tsele menshen dikas, djas lo ap i berga pre, oun beshas pes tele. Oun leskre mala van pash leste, te shounenn les le.

Koon hi barhtelo?

² Oun yob penas ap lende:

³ Barhtele hi kolla, kay djinenna, kay hi le čorvelo glan o Debleste. Yon djivenna o Debleha khetne an o bolepen oun lenn leskro bravlepen.

⁴ Barhtele hi kolla, kay kanna rovenna. O Devel lell lengri douk dran lengro dji.

⁵ Barhtele hi kolla, kay kek čingepen krenna. O Devel dell len i tseli phoub.

⁶ Barhtele hi kolla, kay kanna pal o čačepen bokenna oun troushenna. O Devel krell len čalo.

⁷ Barhtele hi kolla, kay hi len i baro dji i vavar menshenge. O Debles hi i baro dji lenge.

⁸ Barhtele hi kolla, kay hi len i djoudjo dji. Yon dikenn o Debles pengre yakentsa.

⁹ Barhtele hi kolla, kay krenna, te vell kek čingepen mank i menshende. O Devel kharell len peskre čave.

¹⁰ Kolla, kay krenn, hoy o Devel kamella, oun doleske lenn len i menshe palla, kolla hi barhtelo! Yon djivenna o Debleha khetne an o bolepen.

¹¹ T'mer patsenn ap mande. Doleske praasenn le t'men, lenn t'men palla, oun rakrenn rhorhene čilače laba pral t'mende. Te krenn le kova, avenn barhtele!

¹² Givenn oun denn gole i barhtyatar ap ko dives! O Devel dell t'men i baro bravlepen an o bolepen. Yaake har yon t'men palla lenna, yaake lan le o Debleskre rakepangren an o phouro tsiro ninna palla.

O loon oun i momeli

¹³ T'mer han o loon ap kay phoub. Te nashras o loon peskri zoor, hi lo bouder gar mishto. Oun tou nay kreh bouder či, te vell lo pale londo. Ko loon molell či bouder. Tou nay vitsreh les toutar. Oun i menshe stakrenn les khetne.

¹⁴ T'mer han i momeli ap kay phoub. Oun i foro, hoy pral ap i berga hi, nay ačell gar khatedo.

¹⁵ Kek rhačell i momeli an oun čivell lat tel i piri. Na-a, yob čivell lat ap i momelengri, te vell koy momeli diklo hakenestar, kay an o kheer hi.

¹⁶ Yaake hounte venn t'mer har i momeli, hoy rhačell glan i menshende, te dikenn le, havo lačo koova t'mer lauter krenna, oun te sharenn le o Debles, kay hi t'maro dad an o bolepen.

O Moseskre laba

¹⁷ Hayvenn man mishto: Me vom gar, te čivap kol laba ap i rig, hoy o Mose oun o Debleskre rakepangre penan. Na-a! Ko krau me gar. Me vom, te krap kova, hoy yon penan.

¹⁸ Čačepah, me penau t'menge: Yaake rah har o bolepen oun i phoub ačenna, yaake rah vell či krik lino kol labendar, hoy o Mose oun kol Debleskre rakepangre penan. Vitar gar o tikneder lab vell krik lino yaake rah, bis te vell lauter čačo, hoy glan i rah tsiro penlo vas.

¹⁹ Koon yek kol tikneder labendar ap i rig čivella, oun i menshenge kova yaake penella, kova hi o tikneder mashkral kolende, kay djivenn khetne o Debleha an o bolepen. Koon krella, hoy o Devel penas, oun sikrell kova i menshende, kova vella bares mashkral kolende, kay djivenn khetne o Debleha an o bolepen.

²⁰ Oun me penau t'menge: T'mer nay djivenn gar o Debleha khetne an o bolepen, te krenn t'mer gar, hoy o Devel kamella. Oun t'mer hounte krenn kova feteder, har i biboldengre čačepangre oun i Farisarya kova krenna.

Praase kekes!

²¹ T'mer djinenna, te vas ap i phourende penlo: Ma mare kekes! Koon yekes marella, kova hounte vell glan o čačepaskro anlo, oun lell peskri phagi.

²² Me penau t'menge: Koon ap peskro phraleste rhoyedo hi, kova hounte vell glan o čačepaskro anlo. Oun koon peskro phrales praasella, kova hounte vell glan i pralstoune čačepangre anlo. Oun koon penella: Dja touke pash o bengeste! kova vella an o bengeskri yag vitsedo.

²³ Te djah tou an o Debleskro baro kheer, te dess o Debles čomone, oun kote djal touke an o shero trouyel, te hi tiro phraal rhoyedo ap toute,

²⁴ palle mouk kova čiddo, hoy tou kamal o Debles te dell! Dja pash tiro phraleste, oun dik, te venn t'mer pale mishto khetne! Oun palle de kova, hoy tou anal, o Debleste!

²⁵ Te hi tout siyaan pash yekeste, oun hal leha ap o drom pash o čačepaskro, palle playse tiri siyaan yaake rah, har hal tou leha ap o drom, te nay dell yob tout gar an o čačepaskro vast! Oun kova dell tout an o klisteskro vast. Oun kova vitsrell tout an o stilepen!

²⁶ Čačepah, me penau touke: Tou veh gar dran o stilepen vin yaake rah, har tou playsral gar tiri tseli siyaan.

Ma rhorhe tiri romyat i vavar djouvyah!

²⁷ “T'mer djinenna, kay vas glan i rah tsiro ap i phourende penlo: Romeha, ma rhorhe tiri romyat i vavar djouvyah! Romniya, ma rhorhe tiro romes i vavar morsheha!

²⁸ Me penau t'menge: Koon ap i vavareskri romyate dikella, te sovell lo lah, kova rhorhras peskri romyat an peskro dji.

²⁹ Te kamell tiro yak čomone te dikell, hoy anell tout ap i čilačo drom, palle čin les vin, oun vitse les toutar! Hi touke feteder, te nashress yek yak, har te vess an o bengeskri yag vitsedo.

³⁰ Oun te kamell tiro čačo vast, te kress i čilačo koova, palle de les tele, oun vitse les toutar! Hi touke feteder, te nashress tou yek vast, har te djas an o bengeskri yag.

Ma mouk tiri romyat!

³¹ Glan i rah tsiro vas ap i phourende penlo: Kova, kay peskri romyat moukella, kova dell lat i liil, te nay djal li peske.

³² Me penau t'menge: Kones hi i romni, kay rhorhras les gar i vavar morsheha, oun yob moukell lat, kova krell, te lell li i vavares. Oun yaake anell li doosh ap peste. Oun kova, kay romedinerell i moukli djouvyat, kova anell doosh ap peste, te las lo i vavareskri romyat.

Ma denn t'men sovel!

³³ T'mer djinenn ninna, kay vas glan i rah tsiro ap i phourende penlo: De kek rhorheni sovel tele! Oun kova, hoy tou o Debleske sovel dal, te kress ninna!

³⁴ Me penau t'menge: Ma denn t'men sovel! Ma denn gole ap o bolepen, te shounell lo t'mari sovel! O Devel hi kote o ray.

³⁵ Ma denn gole ap i phoub, te shounell li t'mari sovel! O Devel hi ninna kote o ray. Ma denn gole ap o foro Yerusalem, te shounell lo t'mari sovel! Kova hi o Debleskro foro.

³⁶ Ma denn vitar kek sovel ap t'maro shero! T'mer nay krenn kek bal ap t'maro shero kalo oun kek bal parno.

³⁷ Te penenn t'mer: Ava! yaake hounte vell kova ninna: Ava! Oun te penenn t'mer: Na-a! yaake hounte vell kova ninna: Na-a! Hako lab, hoy pral vergel hi, vell o bengestar.

O Debleskro kamlepen

³⁸ T'mer djinenna, kay vas glan i rah tsiro ap i phourende penlo: Koon doukrell i vavares, koleske kress, har yob kras oun gar boudeder: Te doukras lo i vavareskro yak, palle douke leskro yek yak kokres. Te doukras lo i vavareskro dand, palle douke leskro yek dand kokres.

³⁹ Me penau t'menge: Ma hadenn t'maro vast ap koleste, kay kras t'men čilačo koova! Te das touke yek ap i čači čam, koleske rike ninna i servi koy, te dell lo tout!

⁴⁰ Oun kova, kay anell tout glan i čačepangre, te lell lo tiro gad, koles de ninna tiri plaashka!

⁴¹ Oun te kamell yek toutar, te djas tou yek kotar drom leha, yaake dja leha douy kope yaake dour ap o drom!

⁴² Te mangell yek toutar čomone, palle de les kova! Ma biče koles toutar, kay kamell toutar love te patsell!

⁴³ T'mer djinenna, kay glan i rah tsiro i phourenge penlo vas: Ab lačes ap tire menshende! Ma ab lačes ap koleste, kay kras čilačo koova ap toute.

⁴⁴ Me penau t'menge: Avenn lačes kolenge, kay hi čilačo ap t'mende! Mangenn o Debles kolenge, kay lenn t'men palla!

⁴⁵ Yaake han t'mer čačepah čave o baro Deblestar, kay hi t'maro dad an o bolepen. Yob moukella o kham pre te djal kol čilačenge oun kol lačenge. Oun yob dell brishin ap kolende, kay pal o čačepen djivenna, ninna ap kolende, kay čilačo koova krenna.

⁴⁶ T'mer te venn lačes kolenge, kay kran lačo koova ap t'mende, patsenn t'mer, kay o Devel sharell t'men? Na-a! Ninna i rhorhene hi lačes kolenge, kay ap lende lačes hi.

⁴⁷ T'mer te han lačes ap t'mare phralende kokres, palle krenn t'mer, hoy lauter krenna. Ninna kolla, kay prindjrenn o Debles gar, krenn kova, hoy t'mer krenna.

⁴⁸ T'mer hounte venn yaake lačes ap i menshende, har t'maro dad an o bolepen hi lačes ap i menshende.