Mateo 28 - O Debleskro Lab 2024 (Sinte-Manouche)

O Devel krell o Yezouses i moulendar djides

¹ O Debleskro dives djas trouyel. O vavar dives, taysarlake, har o kham pre djala, djas i Maria Magdalena, oun koy vavar Maria pash o moulengro kheer.

² Ap yek kopo vas i phoub zoreles trisslemen. Oun o Debleskro bolepaskro vas dran o bolepen, čivas ko baro bar glan o moulengro kheer ap i rig, oun beshas pes koy pre.

³ Leskro mouy rhačas har i zoreli momeli. Oun leskro ripen his parno har i gib.

⁴ Kol lourde, kay kote yak dan, tapran savi daar, te peran le ap i phoub, oun ačan kote čiddo, har te vans le moulo.

⁵ Oun o bolepaskro penas ap kol djouvyende: “Ma darenn! Me djinau, te rodenn t'mer o Yezouses, kay ap o troushel dino vas.

⁶ Yob hi gar kate. O Devel kras les i moulendar djido, yaake har yob penas. Avenn oun dikenn, kay yob čiddo his!

⁷ Djan sik pash leskre malende oun penenn lenge: O Devel kras les djido! Shounenn, yob djal glan t'mende an o them Galilea. Oun kote dikenn t'mer les pale. Ma bistrenn, hoy me t'menge penom!”

⁸ Oun yon djan sik krik. Lengro dji his pherdo daar oun barht. Oun yon nashan, te penenn le o Yezouseskre malenge kova lauter.

⁹ Ap o drom vas o Yezous pash lende oun penas: “Lačo dives!” Oun yon djan pash leste, peran glan leste tele, oun tapran leskre pire.

¹⁰ Koy penas o Yezous ap lende: “Ma darenn! Djan pash mire phralende oun penenn lenge, te djan le an o them Galilea! Oun kote dikenn le man pale.”

I lourdengro rhorhepen

¹¹ Har i djouvya ap o drom his, djan ninna kol lourdendar, kay ap o moulengro kheer yak dan, an o foro. Oun kolla penan i bare rashayenge lauter, hoy koy djas.

¹² Oun i bare rashaya dan i biboldengre phoureden khetne gole, oun kran lentsa vin, te denn le kol lourden boud love.

¹³ Oun yon penan ap kol lourdende: “Penenn i menshenge: Leskre mala čoran les an i rat, har mer sovam.

¹⁴ O themeskro ray, te shounell lo kova, palle penah mer leske, te anan t'mer an ko koova kek doosh ap t'mende. Yaake hounte trashenn t'mer gar lestar.”

¹⁵ Oun kol lourde lan kol love, oun kran kova yaake, har i pralstoune lenge penan. Oun ko rakepen djal gomme kava dives mashkral i biboldende trouyel.

Penenn i menshenge mire laba!

¹⁶ O Yezouseskre deesh-te-yek mala djan an o them Galilea, ap koy berga, kay o Yezous penas, te venn le kote.

¹⁷ Oun har yon les dikan kote tardo, peran le glan leste tele, ninna te patsan gar lauter, te hi yob čačepah o Yezous.

¹⁸ Oun o Yezous djas pash lende oun penas ap lende: “O baro Devel das man i zoor pral o bolepen oun pral i phoub.

¹⁹ Doleske djan pash i menshende an hake themma, oun penenn lenge mire laba, te patsenn le ap mande! Taufrenn len ap o lab o dadestar, o čavestar oun o Debleskro Dourho!

²⁰ Penenn lenge, te rikrenn le ap lauter, hoy me t'menge penom! Čačepah, me hom pash t'mende hako dives yaake rah, har i phoub koy hi.”