Mateo 27 - O Debleskro Lab 2024 (Sinte-Manouche)

O Yezous vell glan o Pilateste anlo

¹ Sik taysarlake van i tsele bare rashaya oun i biboldengre phoureder khetne. Oun khetne kran le vin, te marenn le o Yezouses.

² Oun yon pandan les, oun anan les pash o themeskro rayeste. Leskro lab his Pilato. Yob his i Remari. An leskre vasta dan le o Yezouses.

O Youdas marell pes

³ O Youdas, ko phoukepaskro, har hayvas lo, te kran le vin, te vell o Yezous maredo, khaytas kova les. Doleske anas yob kol triyanda roupene beme pale pash i bare rashayende oun pash i biboldengre phoureder.

⁴ Oun yob penas ap lende: “Me anom doosh ap mande. Me phoukrom ap koleste, kay kek doosh ap peste anas.” Penan le: “Kova hi gar maro koova. Kova hi tiro koova.”

⁵ Koy vitsras lo kol triyanda roupene beme an o Debleskro baro kheer, nashas lendar, čivas i dori troul peskri meen, oun tassras pes.

⁶ Kol bare rashaya lan kol roupene beme, oun penan: “Ap kal love hi o rat pre. Mer nay čivah kal love gar pash o bravlepen an o Debleskro baro kheer. Kova djal gar pal o biboldengro čačepen.”

⁷ Oun yon rakran khetne, hoy nay krans le kol loventsa. Oun yon penan: “Mer ginah i kotar them, te nay paskrah kote kolen, kay kek bibolde hi.” Oun yon ginan ko kotar them ko romestar, kay krell pirya dran lolo čik.

⁸ Doleske dan le ko kotar them o lab ratli phoub. Ninna kava dives kharell kova yaake.

^9-10 Oun yaake vas kova čačo, hoy o Debleskro rakepaskro Yeremia glan i rah tsiro penas: Yon lan i triyanda roupene beme. Kova his kol love, kay i Israeleskre menshe vin kran, te playsrenn le leske. Kol loventsa ginan le i kotar them kolestar, kay krell pirya dran lolo čik, yaake har o Devel mange kova penas.

O Yezous hi glan o Pilateste tardo

¹¹ Oun o Yezous his glan o themeskro rayeste, o Pilato tardo. Oun kova poučas lestar: “Hal tou o baro ray pral i biboldende?” Koy penas o Yezous: “Ava, hi yaake, har tou penal.”

¹² Oun i bare rashaya oun i biboldengre phoureder anan doosh ap leste pre. O Yezous penas či.

¹³ Koy penas o Pilato ap leste: “Shouneh tou gar, hoy yon lauter ap toute pre anenna?”

¹⁴ O Yezous penas či, kek lab. Oun o Pilato kras čačepah bare yaka.

¹⁵ Ap ko tsiro his yaake, te moukas o themeskro ray ap o Passa yekes dran o stilepen vin. Koles nay rodan i bibolde penge vin.

¹⁶ An ko bersh his i morsh kote stildo, leskro lab his Barabas. Hakeno djinas, te hi yob i čilačo morsh.

¹⁷ Oun har yon lauter khetne his, poučas o Pilato lendar: “Kones moukap dran o stilepen vin: O Barabes? O Yezouses, kay ninna o Kristo kharella?”

¹⁸ O Pilato djinas mishto, te zilverenn le ap o Yezouseste. Oun dran kova dan le les an leskre vasta.

¹⁹ Har o Pilato ap o čačepaskro beshepaskro beshdo his, te rakrell lo o čačepen pral leste vin, moukas leskri romni leske te penell: “Ko morsh anas kek doosh ap peste. Mouk les te djal! Taysar rati his man i čilači souni, oun man his bare douka dran leste.”

²⁰ I bare rashaya oun i biboldengre phoureder rakran boud ap kol tsele menshende kote dren, te penenn yon, te vell o Barabas dran o stilepen vin, oun te vell o Yezous maredo.

²¹ Oun o Pilato poučas lendar: “Kones kol douy morshendar moukap dran o stilepen vin?” “O Barabes!” penan le.

²² Koy penas o Pilato ap lende: “Hoy krap o Yezouseha, kay kharella ninna o Kristo?” Penan le halauter: “De les ap o troushel!”

²³ Poučas lo lendar: “Havo čilačo koova kras yob?” Kote dan le bari gole: “De les ap o troushel!”

²⁴ Har o Pilato dikas, te nay krell lo či, oun te venn le divyeder, las lo pani, thovas peskre vasta glan i tsele menshende, oun penas: “Me anau kek doosh ap mande, te vell lo maredo. Koy doosh vell ap t'mende.”

²⁵ Oun kol tsele menshe penan: “Koy doosh vell ap mende oun ap mare čavende!”

²⁶ Palle moukas lo o Barabes dran o stilepen vin. Oun o Yezouses moukas lo i čoupniyah dava te dell, oun das les an i lourdengre vasta, te denn le les ap o troushel.

I lourde san pral o Yezouseste

²⁷ Palle anan o Pilateskre lourde o Yezouses an o baro kheer o themeskro rayestar. Oun yon dan i tsele lourden gole, te venn le kote khetne.

²⁸ Oun yon rivan leske leskre koola vin, oun čivan leske i loli rayeskri plaashka trouyel.

²⁹ Oun yon pandan soubyengre kashta khetne, oun čivan len leske ap o shero, yaake har i baro ray hidjrell shereskro sonakay ap peskro shero. Ninna čivan le leske i kasht an leskro čačo vast. Oun yon moukan pen glan leste ap i čanga te perell, oun kran yaake, har te mangans le i baro rayes an. Yon san pral leste, oun penan: “Sharedo vess tou, tou baro ray pral i bibolde!”

³⁰ Oun yon čoungran ap leste, lan leske o kasht dran o vast, oun dan les leske ap o shero.

³¹ Har yon san pral leste, rivan le leske koy loli plaashka pale vin, oun rivan leske leskre koola pale an. Oun yon anan les vin, te denn le les ap o troushel.

O Yezous vell ap o troushel dino

³² Har yon dran o foro vin djan, dikan le i morshes dran o foro Kirene. Leskro lab his Simon. Koles tapran le i zoryah, oun kran, te hidjrell lo o Yezouseskro troushel.

³³ Oun har yon ap ko kotar them van, hoy kharella Golgata, – kova kharella Mouleskro Shero,

³⁴ – dan le les mool te piyell, kay čomone dren hi, hoy kharella Galle. Har yob kova hayvas, kamas lo gar te piyell.

³⁵ Oun yon dan les ap o troushel. Oun palle khelan le pral leskre koola, te dikenn le, hoy hakeno lella.

³⁶ Oun yon beshan pen kote tele, oun dan ap leste yak.

³⁷ Ap o troushel pral leskro shero čivan le i kotar kasht, kay činlo hi, hoske yob hounte meras. Oun koy pre his činlo: Kava hi o Yezous, o baro ray pral i biboldende.

³⁸ Leha dan le douy marepangren ap o troushel. Ko yekeskro troushel his čačes lestar, ko vavareskro troushel his serves lestar.

³⁹ Oun kolla, kay kote pashel van, sikran i goushteha ap o Yezouseste, oun praasan les.

⁴⁰ Oun yon penan ap o Yezouseste: “Tou kamal o Debleskro baro kheer tele te phagell, oun an triin divessa pale pre te čivell. Tou te hal o Debleskro čavo, kre touke, hoy kral i vavarenge oun ab kava troushelestar tele!”

⁴¹ Oun ninna i bare rashaya, i biboldengre čačepangre oun phoureder san pral leste, oun penan:

⁴² “Vavaren las yob dran o merepen vin. Pes kokres nay lell lo gar dran o merepen vin. Te hi lo o baro ray pral o Israel, palle vell lo kanna o troushelestar tele. Palle patsah ap leste.

⁴³ Yob patsas o Debles, oun penas: Me hom o Debleskro čavo. Te kamell o Devel les o djiyestar, mou vell lo, oun lell les kanna kava troushelestar tele!”

⁴⁴ Ninna kol douy marepangre praasan les, kolla kay langs leste ap pengro troushel dino van.

O Yezous merella ap o troushel

⁴⁵ His deesh-te-douyenge, koy vas o dives kalo har i rat an o tselo them. Oun kova ačas yaake bis trinenge.

⁴⁶ Oun har trinenge his, das o Yezous bari gole: Eli, Eli, lema sabaktani? Kova kharella: Miro Devel, miro Devel, hoske moukal man tou?

⁴⁷ Oun kolendar, kay kote tardo his, oun kova shounan, penan: “Kava dell ap o Eliya gole.”

⁴⁸ Oun yek kol lourdendar anas sik čomone har i kotar than, kras les pherdo shoutli mool, čivas les ap i kasht, oun das les o Yezouses te piyell.

⁴⁹ Vavar penan: “Mouk les, dikas, te vell o Eliya, oun lell les tele.”

⁵⁰ O Yezous das pale bari gole, oun meras.

⁵¹ Oun ko voudar an o Debleskro baro kheer, hoy his kerdo dran kouč pesso than, kova djas paash an douy kotya foun pral bis tele. Oun i phoub vas trisslemen. Oun i bare barra phagan an kotya.

⁵² I moulengre khera phagan pre. Oun boud kolendar, kay ap o Debles patsan oun meran, van djido,

⁵³ oun djan dran pengre moulengre khera vin. Pal kova, har o Yezous ninna i moulendar djido vas, djan le an o Debleskro foro Yerusalem. Oun boud menshe dikan len kote.

⁵⁴ Ko pralstouno lourdo oun kol vavar, kay khetne leha ap o Yezouseste yak dan, kolla dikan, te vas i phoub trisslemen, oun hoy lauter koy djas. Koy tapras len i bari daar. Oun yon penan: “Kava morsh his čačepah o Debleskro čavo.”

⁵⁵ Boud djouvya his i kotar krik tardo oun dikan kova lauter. Kolla van o Yezouseha dran o them Galilea, te denn le les rhapen oun pipen.

⁵⁶ Mashkral lende his i Maria Magdalena, oun koy Maria, kay hi o Yakobeskri oun o Yosefeskri day. Oun o Zebedeskri romni, lakre čave his o Yakobo oun o Yohanni, yoy his ninna kote pash lende.

O Yezous vella paskedo

⁵⁷ Har i rat vas, vas i bravelo morsh dran o foro Arimatia. Leskro lab his Yosef. Kova patsas ninna ap o Yezouseste.

⁵⁸ Yob djas pash o Pilateste oun mangas les, te dell lo les o moulo Yezouses. Oun o Pilato penas i lourdenge, te denn le les leste.

⁵⁹ Oun o Yosef las o moulo Yezouses, čivas les an i djoudji plarhta,

⁶⁰ oun čivas les an peskro nevo moulengro kheer, hoy yob das peske an i baro bar. Palle čivas yob i baro bar glan o voudar an ko moulengro kheer, oun djas peske.

⁶¹ Kote his ninna i Maria Magdalena oun i vavar Maria. Kolla beshan vergel ko moulengro kheer.

I lourde denn yak ap o moulengro kheer

⁶² O vavar dives his o Debleskro dives. Oun i bare rashaya oun i Farisarya van pash o Pilateste khetne,

⁶³ oun penan ap leste: “Ray, menge djas an maro shero trouyel, te penas ko rhorheno, har yob djivas: Pal triin divessa krell o Devel man djido.

⁶⁴ Dran kova pen tire lourdenge, te denn le kol triin divessa ap ko moulengro kheer yak! Yaake te nay čorenn leskre mala les gar, oun te penenn le i menshenge gar: Yob stas i moulendar pre. Kova vals i bareder rhorhepen har lauter kova, hoy yob penas.”

⁶⁵ Koy penas o Pilato ap lende: “Ake, lenn lourden t'mentsa oun denn yak ap ko moulengro kheer, yaake har t'mer patsenn, te hounte vell kova!”

⁶⁶ Oun yon djan pash o moulengro kheer, oun kran i sikepen ap ko bar, te dikenn le, te las yek o bar krik. Oun kol lourde dan yak ap ko moulengro kheer.