Mateo 19 - O Debleskro Lab 2024 (Sinte-Manouche)

I morsh oun peskri romni

¹ Oun har o Yezous kova lauter peskre malenge penas, djas lo lentsa dran o them Galilea vin, oun vas an o them Youdea vergel o pani Yordan.

² Oun boud menshe djan leske palla. Oun yob kras i nasselen kote sasto.

³ Oun i Farisarya van pash leste, oun kaman les leskre labentsa te taprell. Oun yon poučan lestar: “Nay tradell i morsh peskri romyat pestar, ninna te kras li kek čilačepen?”

⁴ Penas lo: “T'mer djinenn, hoy hi an o Debleskro lab činlo: O Devel kras o morshes oun i djouvyat.

⁵ Oun yob penas: Doleske moukell i morsh peskro dades oun peskri dat, te djivell lo peskri romyah khetne. Oun kol douy venna har yek.

⁶ Yaake hi le har yek oun bouder gar douy. Oun kova, hoy o Devel khetne anas, kova hounte krell i mensho gar paash!”

⁷ Penan le ap leste: “Te hi kova yaake, hoske činas o Mose an peskro liil: Te kamell i morsh peskri romyat te moukell, palle hounte dell lo lat i liil, kay činlo hi, kay yob moukas lat?”

⁸ Penas lo ap lende: “T'maro dji hi dran bar, kay o Debleskro lab gar dren djal. Doleske činas o Mose, kay nay moukenn t'mer t'mari romyat. Ap ko tsiro, kay o Devel i morshes oun i djouvyat kras, his kova gar yaake.

⁹ Me penau t'menge: Te hi yekes i romni, kay rhorhras les gar i vavar morsheha, oun yob moukell lat, oun romedinerell i vavar djouvyat, kova anell doosh ap peste, te las lo i vavar romyat.”

¹⁰ Penan leskre mala ap leste: “Te hi kova yaake, palle hi i morsheske feteder, te romedinerell lo gar.”

¹¹ Penas lo: “Kava lab, hoy me penom, hayvell gar hakeno. Kolen, kay o Devel kava lab an o dji čivas, kolla hayvenn les.

¹² Della menshe, kay van yaake boldo, kay hi lenge kova gar mishto, te romedinerenn le. Oun vavar van yaake ap o mass činlo, te romedinerenn le nay gar. Vavar kamenn o tselo djiyestar o Debleske te boudrell. Doleske romedinerenn le gar. Koneske kava lab mishto hi, kova te krell yaake.”

O Yezous oun i tikne čave

¹³ Koy anan le čaven pash o Yezouseste, te čivell lo peskre vasta ap lende, te mangell lo o Debles, te dikell yob lačes ap lende. Har peskre mala kova dikan, čingran le ap kol menshende.

¹⁴ Koy penas o Yezous ap lende: “Moukenn kol čaven pash mande te vell! Ma rikrenn len pale! Save har yon, kolen das o Devel gole, te djivenn le khetne leha an o bolepen.”

¹⁵ Oun yob čivas peskre vasta ap lende, oun djas peske.

I bravelo terno morsh

¹⁶ Oun i morsh vas pash leste oun penas: “Sikepaskro, havo lačo koova hounte krap, te vell man o djipen, hoy gar pre-herella?”

¹⁷ Penas o Yezous: “Hoske poučeh tou mandar, hoy lačo hi? O Devel kokres hi lačo. Tou te kameh o Debleskro djipen, palle kre kova, hoy yob penas!”

¹⁸ Koy poučas lo lestar: “Hoy hounte krap?” Penas o Yezous: “Ma mare kekes! Ma rhorhe tiri romyat i vavar djouvyah! Ma čore! Ma pen rhorhepen pral yekeste!

¹⁹ Dik ap tiro dadeste oun ap tiri date, te djal lenge mishto! Oun ap koleste, kay pash toute hi hounte vess yaake lačes, har hal lačes ap toute kokres.”

²⁰ Koy penas ko terno morsh ap leste: “Kova lauter krom. Hoy hounte krap boudeder?”

²¹ Penas o Yezous ap leste: “Te kameh tou o tselo Debleskro kamlepen te krell, palle bike lauter, hoy tout hi! Oun de kol love i čorvelende! Palle hi tout i bravlepen an o bolepen. Oun am oun dja mantsa!”

²² Ko terno morshes his boud bravlepen. Har yob kal laba shounas, doukas kova les. Oun yob djas peske.

²³ Oun o Yezous penas ap peskre malende: “Čačepah, me penau t'menge: Pharo hi i braveleske, te vell lo ap o Debleskro drom.

²⁴ Me penau t'menge ninna: Hi gar yaake pharo, te djal i baro firho an i soubyakro kand dren har te vell i bravelo ap o Debleskro drom.”

²⁵ Har leskre mala kova shounan, tapras len i daar. Oun yon poučan lestar: “Te hi kova yaake, koon lell nay o Debleskro djipen?”

²⁶ Oun o Yezous dikas ap lende, oun penas: “Hoy i menshe nay gar krenna, nay krell o Devel halauter.”

O Debleskro bravlepen

²⁷ Koy penas o Petro ap leste: “Djineh, mer moukam lauter oun djam touha. Hoy lah mer?”

²⁸ Penas o Yezous ap lende: “Čačepah, me penau t'menge: Ko tsiro vella, kay o Devel lauter neves krella. Ap ko tsiro hi o Mensheskro Čavo o ray pral lauterende, oun yob hi beshdo ap peskro rayeskro beshepaskro. Oun t'mer, kay mantsa djana, t'mer venn ninna raya, oun han beshdo ap deesh-te-douy rayeskre beshepangre, oun rakrenn o čačepen vin pral i tsele menshende, kay venna i deesh-te-douy Israeleskre čavendar.

²⁹ Oun hakeno, kay moukas peskro kheer, peskre phralen, peskre phenyen, peskro dades, peskri dat, peskre čaven oun peskro kotar them, te djal lo mantsa, kova lell sheel kope pale, hoy yob moukas. Oun o Devel dell les o djipen, hoy gar pre-herella.

³⁰ Oun boud, kay kanna glan tardo hi, kolla hi ap ko dives palla tardo. Oun boud, kay kanna palla tardo hi, kolla hi ap ko dives glan tardo.”