Mateo 16 - O Debleskro Lab 2024 (Sinte-Manouche)

I Farisarya kamenn i baro Debleskro koova te dikell

¹ Oun i Farisarya oun i Sadducarya van pash o Yezouseste. Yon kaman te taprenn le les leskre labentsa oun penan ap leste: “Kre menge i baro koova, hoy sikrell mende, te vell tiri zoor o Deblestar!”

² Koy penas lo ap lende: Te djal o kham tele, oun o bolepen vell lolo, penenn t'mer: Taysar vell shoukar!

³ Oun te hi o bolepen taysarlake lolo, penenn t'mer: Vella brishin! Yaake dikenn t'mer ap o bolepen, oun djinenn, hoy vella. Kova, hoy kanna mashkral t'mende djala, kova hayvenn t'mer gar.

⁴ Har čilačo hi kol menshe, kay djivenn an kava tsiro! Yon moukan o Debles, oun kamenn i baro Debleskro koova te dikell. Oun o Devel sikrell len či vavar har kova, hoy i menshe ninna ap o Debleskro rakepaskro, o Yona, dikan. Oun o Yezous moukas len, oun djas peske.

I Farisarya oun i Sadducarya

⁵ Oun o Yezouseskre mala van ap i vavar panyeskri rig, oun hayvan, te bistran le o maro lentsa te lell.

⁶ Oun o Yezous penas ap lende: “Denn yak! O shoutlo yarro hi gar mishto, hoy vell i Farisarendar oun i Sadducarendar!”

⁷ Har yon kova shounan, rakran le pral leskre laba oun penan: “Mer lam kek maro mentsa. Doleske penas lo kova menge.”

⁸ O Yezous hayvas, hoy yon penan, oun yob penas ap lende: “Hoske rakrenn t'mer pral o maro, hoy t'mer bistran? Havo tikno patsepen hi t'men!

⁹ T'mer hayvan man gar. Bistran t'mer kol panč mare, hoy dom kol panč zerya menshende te rhal? Oun pal ko rhapen hadan t'mer deesh-te-douy marengre gone pherdo maro pre, hoy pral ačas.

¹⁰ Oun bistran t'mer ninna kol efta mare, hoy dom kol star zerya menshende te rhal? Oun pal ko rhapen hadan t'mer efta marengre gone pherdo maro pre, hoy pral ačas.

¹¹ Hayvenn t'mer kanna, kay me rakrom gar pral o maro, har penom: Denn yak! O shoutlo yarro hi gar mishto, hoy vell i Farisarendar oun i Sadducarendar!”

¹² Oun koy hayvan le, te rakras lo gar pral o shoutlo yarro, hoy lenn le, te pekenn le maro. Yob rakras pral kol laba, hoy i Farisarya oun i Sadducarya i menshenge penenna.

Koon hi o Yezous?

¹³ O Yezous djas pash o foro Cesarea Filipi. Oun kote poučas lo peskre malendar: “Hoy penenn i menshe pral o Menshengro Čaveste?”

¹⁴ Oun leskre mala penan ap leste: “Yon penenna, tou hal o Yohanni, kova, kay taufras i menshen. Vavar penenna, kay tou hal o Eliya. Oun vavar penenna, kay tou hal o Yeremia. Oun pale vavar penenna, kay tou hal i Debleskro rakepaskro, kay i moulendar pre stas.”

¹⁵ Penas lo: “Oun hoy penenn t'mer, koon me hom?”

¹⁶ Penas o Simon Petro: “Tou hal o baro ray, kolestar o Devel penas te vell yob. Tou hal o čavo o djido Deblestar.”

¹⁷ Penas o Yezous ap leste: “Barhtelo hal tou, Simon Bar-Yona. Kol laba, hoy tou pral mande penal, kolla van gar toutar, vitar gar vavar menshendar. Miro dad an o bolepen sikras tout kova.

¹⁸ Doleske penau touke: Tiro lab hi kanna Petro. Kova, hoy tou kate penal, hi har i zorelo bar, ap koleste čivau miro kheer. Oun miro kheer hi kolla, kay patsenn ap mande. Oun kek nashte lell len dran mire vasta vin, ninna kek merepen.

¹⁹ Me dau tout i klidepaskro, hoy krell o voudar pre, te venn i menshe ap miro drom. Ap koleste, kay tou peneh: O Devel las tiri doosh toutar, kolestar hi li krik lino. Ap koleste, kay tou peneh: Tiri doosh ačell ap toute, ap koleste ačell leskri doosh čiddo.”

²⁰ Pal kova penas lo peskre malenge, te penenn le kekeske, te hi lo ko baro ray, kolestar o Devel penas, te vell yob.

O Yezous rakrell pral peskro merepen

²¹ Oun ap ko tsiro penas o Yezous peskre malenge, te hounte djal lo an o foro Yerusalem. Oun yob penas lenge: “Me hounte lap boud douka ap mande. I bare rashaya, oun i biboldengre phoureder oun čačepangre, kolla marenn man. Oun pal triin divessa krell man o Devel djido.”

²² Koy las o Petro les ap i rig, oun čingras ap leste oun penas: “Mo ray, ko nashte vell gar. Ma mouk kova pral toute te vell!”

²³ O Yezous rissras pes trouyel, oun penas ap o Petreste: “Dja touke, tou beng! Tou kameh man o Debleskro dromestar tele te anell. Tou kameh gar, hoy o Devel kamella. Na-a, tou kameh, hoy i menshe kamenna.”

O Yezouseskro drom

²⁴ Palle penas o Yezous ap peskre malende: Koon ap miro drom mantsa djala, kova hounte bistrell, hoy leske kokres mishto hi, oun hounte lell peskro troushel ap peste, oun djal mantsa.

²⁵ Koon peskro djipen zoreles kamella, kova nashrell les. Koon peskro djipen mange nashrella, lell les mandar pale.

²⁶ I mensheske vals kova gar mishto, te lals lo o tselo bravlepen ap kay phoub, oun nashrals o djipen. I mensho nay dell či o Debleste, te lell lo ko djipen pale.

²⁷ Me hom o Mensheskro Čavo. Oun me vau pale ap i phoub an o raylepen, hoy das man miro dad an o bolepen. Oun mantsa venna mire bolepangre. Oun palle dikau ap hakeneste, hoy yob kras. Oun me dau lačo koova kolen, kay lačo koova kran. Oun me dau i phagi kolen, kay čilačo koova kran.

²⁸ Čačepah, me penau t'menge: Mashkral t'mende hi save menshe, kay merenn gar, bis te dikenn le o Menshengro Čaves, har yob o baro ray hi.