Mateo 11 - O Debleskro Lab 2024 (Sinte-Manouche)

O Yohanneskre mala

¹ Oun har o Yezous peskre deesh-te-douy malenge penas, hoy hounte krenn le, djas lo doureder an i vavar biboldengre forya, te sikrell lo kote i menshende o Debleskro drom.

² Ap ko tsiro his o Yohanni an o stilepen. Kote shounas lo, hoy o Yezous Kristo lauter kras. Oun yob bičras peskre malen pash leste,

³ oun moukas lestar te poučell: “Hal tou kova, kay hounte vell? Hounte dikas mer ap i vavareste, te vell lo?”

⁴ Penas o Yezous ap lende: “Djan pash o Yohanneste, oun penenn leske, hoy t'mer shounan oun dikan:

⁵ I korele dikenna pale oun i bange nashenna pale. I nassele, kay lengro mass ap lende tele merell, kolla venna sasto. Kolla, kay nay shounan gar, shounenna kanna. I moule venna djido. I čorvele shounenn o Debleskro lačo lab.

⁶ Oun barhtelo hi kova, kay rhoyrell pes gar pral mande!”

O Yezous rakrell mishto pral o Yohanneste

⁷ Oun har o Yohanneskre mala penge djana, rakras o Yezous ap kol boud menshende pral o Yohanneste, oun penas: Hoske djan t'mer an o moulo them? Kaman t'mer i morshes te dikell, kay hi har i patri, hoy i zorelo dourho pral i phoub phourdella? Na-a, savo morsh hi lo gar!

⁸ Koon kaman t'mer te dikell? Kaman t'mer i morshes te dikell, kay an kouč koola rido hi? Na-a, savo morsh hi lo vitar gar! Kolla, kay rivenna kouč koola, djivenn an i rayengre khera.

⁹ Hoske djan t'mer an o moulo them? Kaman t'mer i Debleskro rakepaskro te dikell? Ava, kova hi o Yohanni. Oun me penau t'menge: Yob hi bareder har i Debleskro rakepaskro.

¹⁰ Lestar hi činlo an o Debleskro lab: O Devel penas ap peskro čaveste: Me bičrau i morshes glan toute ap o drom, te krell lo touke i drom, te nay vess pash i menshende.

¹¹ Čačepah, me penau t'menge: Kek vas boldo ap kay phoub, kay hi bareder har o Yohanni. Me penau t'menge ninna: O tikneder kolendar, kay moukenn man pengro ray te vell, kova hi bareder har o Yohanni.

¹² Har o Yohanni vas oun i menshen taufras, vas o Debleskro nevo tsiro. An kava tsiro dell o Devel i menshen pash peste gole, te djan le ap leskro drom. Oun bis kava dives kamenn čilače menshe i zoryah o Debleskri boudi paash te krell. Yon kamenn te vell len penepaske koy pral.

¹³ Oun i tsele Debleskre rakepangre oun o Mose rakran glan i rah tsiro pral kava nevo tsiro. Kanna hi o Yohanni koy, oun ko nevo tsiro vas.

¹⁴ Patsenn mange, o Yohanni hi o Eliya, kolestar penlo vas, te vell lo.

¹⁵ Moukenn kova an t'maro shero trouyel te djal!

Boud menshe kamenn o Yezouses gar

¹⁶ I menshe an kava tsiro hi har čave, kay khelenn an o foro. Oun yon denn gole yek ap o vavareste:

¹⁷ Mer bashram t'menge. T'mer khelan gar. Mer givam moulengre gilya. T'mer rovan gar.

¹⁸ O Yohanni rhas oun piyas gar. Oun yon penenna: “I beng hi an leste.”

¹⁹ Oun me, o Mensheskro Čavo, me vom, rhom oun piyom, oun mandar penenn le: “Kova hi i baro rhapaskro oun i pipaskro. Kova hi i maal kolendar, kay lenn i biboldendar love i Remaryenge dren. Oun kova hi i maal kolendar, kay čilačo koova kran oun doleske pale-čiddo hi.” Ninna te rakrenn le yaake, dikenn le ap o Debleskre menshende, kay kova čačo hi, hoy o Devel krella.

I forya Korazin, Betsayda oun Kapernaum

²⁰ Palle čingras lo pral kol forya, kay yob boud baro koova kras an o Debleskri zoor. I menshe kote moukan gar pengro čilačo drom, te djan le ap o Debleskro drom.

²¹ Oun yob penas: Bibarhtelo venna t'mer menshe an o foro Korazin! Bibarhtelo venna t'mer menshe an o foro Betsayda! Te krals yek an i forya Tirus oun Sidon savo baro koova an o Debleskri zoor, har me pash t'mende krom, rivans i menshe kote i gono troul pende, oun čivans yagakri čik ap pengre shere, te sikrenn le, kay lengro čilačepen khaytell len. Oun yon moukans pengro čilačo drom, oun djans ap o Debleskro drom.

²² Ap ko dives, kay rakrell o Devel o čačepen vin pral i tsele menshende ap i phoub, djal kol menshenge an i forya Sidon oun Tirus feteder har t'menge kate.

²³ Oun t'mer menshe an o foro Kapernaum, patsenn t'mer, kay venn t'mer an o bolepen hadedo? Na-a! T'mer djan an o moulengro them tele. O baro koova, hoy krom an o Debleskri zoor pash t'mende, te kroms kova an o foro Sodom, palle vals ko foro gomme kava dives.

²⁴ Me penau t'menge: Ap ko dives, kay rakrell o Devel o čačepen pral i tsele menshende vin, lenn t'mer i bareder phagi, har kol menshe an o foro Sodom.

O Yezous kokres prindjrell o Debles

²⁵ Oun ap kava tsiro penas o Yezous: Tata, tou hal o ray pral o bolepen oun i phoub. Me sharau tout. Kova, hoy tou kreh, sikral tou kolende, kay gar boud djinenna. Kolla, kay gosevo hi oun boud djinenna, kolla hayvenn kova gar.

²⁶ Ava tata, yaake kamal tou kova.

²⁷ Lauter das miro dad an mire vasta. Kek djinella, koon o čavo hi, har kokres o dad. Oun kokres o čavo djinella, koon o dad hi. Oun o čavo sikrell kolen, kay patsenn ap leste, koon o dad hi.

Avenn pash mande!

²⁸ T'mer marenna t'men tele, te krenn kova, hoy t'mare phoure ap t'mende penan. Avenn pash mande! Me lau ko pharo koova t'mendar, te lenn t'mer pale nevi zoor.

²⁹ Me hom t'menge i lačo ray, oun dikau ap kekeste tele. Shounenn ap mande oun krenn, hoy me t'menge penaua! Oun t'maro dji vell pale zorelo.

³⁰ Kova, hoy me t'menge penaua, hi t'menge lačo. Oun t'mer hounte marenn t'men gar tele.