Markus 8 - O Debleskro Lab 2024 (Sinte-Manouche)

O Yezous dell star zerya menshen te rhal

¹ An kol divessa his ninna pale boud menshe pash o Yezouseste. Har kolen bouder či te rhal his, das o Yezous peskre malen pash peste gole, oun penas ap lende:

² “Man khaytenn kal menshe. Triin divessa hi le kate pash mande, oun len hi či te rhal.

³ Me te bičrau len bokles khere, palle perenn le ap o drom khetne. Mank lende hi save, kolen hi i dour drom.”

⁴ Leskre mala penan ap leste: “Kay hatsas mer maro kate an kava moulo them, te kras len čalo?”

⁵ “Kitse mare hi t'men?” poučas lo. “Efta,” penan le.

⁶ Yob penas i menshenge, te beshenn pen le ap i phoub. Oun yob las kol efta mare, parkras pes pash o Debleste, oun phagas len an kotya. Oun yob das len peskre malende, te denn le len i menshende. Oun yon kran kova.

⁷ Oun len his ninna tikne mače. Oun o Yezous parkras pes pash o Debleste oun das len peskre malende, te denn le kolen ninna i menshende te rhal.

^8-9 Oun yon rhan oun van čalo. Koy his nay star zerya menshe. Oun pal o rhapen hadan le kol kotya maro pre, hoy pral ačan. Kolla his efta marengre gone pherdo. Palle moukas lo len khere te djal,

¹⁰ djas peskre malentsa an o bero oun vas an ko them, kay Dalmanuta čiddo hi.

I Farisarya kamenn o Yezouseskri zoor te dikell

¹¹ Oun i Farisarya van vin pash leste, te rakrenn le leha. Yon kaman te taprenn le les leskre labentsa oun penan ap leste: “Kre menge i baro koova, hoy sikrell men, te vell tiri zoor o Deblestar!”

¹² Yob las i baro dourho oun penas: “Hoske kamenn kol menshe, kay djivenna kava dives, i baro Debleskro koova te dikell? Me penau t'menge o čačepen: Yon dikenna kek savo koova.”

¹³ Oun yob moukas len, djas pale an o bero, oun ouleras vergel.

I Farisarya oun i Sadducarya

¹⁴ Oun o Yezouseskre mala bistran, te lenn le maro lentsa. Len his yek maro kokres an o bero.

¹⁵ Oun o Yezous penas zoreles ap lende: “Denn yak! O shoutlo yarro hi gar mishto, hoy vell i Farisarendar oun o Herodestar!”

¹⁶ Har yon kova shounan, penan le penge: “Mer lam kek maro. Doleske penas lo kova menge.”

¹⁷ Oun o Yezous hayvas kova, oun penas ap lende: “Hoske rakrenn t'mer pral kova, kay hi t'men kek maro? Dikenn oun hayvenn t'mer gomme gar? Hi t'men i dji har i bar an t'mende?

¹⁸ T'men hi yaka, oun dikenn či. Oun t'men hi kanna, oun shounenn či. Djinenn t'mer bouder gar,

¹⁹ har me kol panč mare phagom, oun kol panč zerya menshende dom? Kitse marengre gone pherdo kotya, hoy pral ačan, hadan t'mer pre?” Penan le: “Deesh-te-douy.”

²⁰ Penas lo: “Oun har me phagom kol efta mare kol star zerya menshenge? Kitse marengre gone pherdo kotya, hoy pral ačan, hadan t'mer kote pre?” Penan le: “Efta.”

²¹ Oun yob penas ap lende: “Hayvenn t'mer gomme gar?”

O Yezous krell yekes sasto, kay nashte dikas gar

²² O Yezous oun peskre mala van an o gab Betsayda. Koy anan le i morshes pash leste, kay dikas nay gar. Oun yon mangan o Yezousestar, te čivell lo peskro vast ap leste.

²³ Oun yob las koles, kay dikas nay gar, pash o vast, oun anas les vin glan o gab. Palle čivas lo čounger ap leskre yaka, čivas peskre vasta ap leste, oun poučas lestar: “Dikeh tou čomone?”

²⁴ Oun yob dikas pre oun penas: “Me dikau i menshen, har te venn le rouka, kay nashenn trouyel.”

²⁵ Pale čivas o Yezous peskre vasta ap leskre yaka. Oun kava kopo dikas ko morsh pre oun his sasto. Yob dikas lauter mishto.

²⁶ Oun o Yezous bičras les khere oun penas: “Ma dja dren an o gab!”

Koon hi o Yezous?

²⁷ Oun o Yezous djas peskre malentsa doureder oun vas an kol gaba pash o foro Cesarea Filipi. Ap o drom poučas lo peskre malendar: “Hoy penenn i menshe, koon me hom?”

²⁸ Oun yon penan ap leste: “Hi menshe koy, kay penenn, tou hal o Yohanni, kova, kay taufras i menshen. Vavar penenna, tou hal o Eliya. Oun pale vavar penenna, tou hal i Debleskro rakepaskro, kay glan i rah tsiro djivas.”

²⁹ Koy poučas lo lendar: “Oun t'mer, hoy penenn t'mer, koon me hom?” Koy penas o Petro ap leste: “Tou hal o Kristo, kolestar o Devel penas, te vell yob.”

³⁰ Oun yob das len trad, te penenn le kova kekeske.

O Yezous rakrell pral peskro merepen

³¹ Oun o Yezous penas peskre malenge: “O Mensheskro Čavo hounte lell boud douka ap peste. Oun i biboldengre phoureder oun čačepangre oun i bare rashaya čivenn les ap i rig. Oun yob hounte vell maredo. Oun pal triin divessa stell lo pale i moulendar pre.”

³² Oun kova lauter penas lo lenge, oun rikras či pale. Koy las les o Petro ap i rig, oun čingras ap leste.

³³ Oun o Yezous rissras pes trouyel, dikas ap peskre malende, oun das o Petres trad oun penas: “Dja touke, tou beng! Tou kameh gar, hoy o Devel kamella, na-a, tou kameh, hoy i menshe kamenna.”

O Yezouseskro drom

³⁴ Palle das o Yezous kol boud menshen pash peste gole, ninna peskre malen, oun penas ap lende: Koon ap miro drom mantsa djala, kova hounte bistrell, hoy leske kokres mishto hi, oun lell peskro troushel ap peste, oun djal mantsa.

³⁵ Koon kamell peskro djipen te rikrell, kova nashrell les. Koon ap miro drom mantsa djala oun i menshenge miro lab penella, oun vell doleske moulo dino, kova lell o djipen pale.

³⁶ I mensheske vals kova gar mishto, te lals lo o tselo bravlepen ap kay phoub, oun nashrals peskro djipen.

³⁷ I mensho nay dell či o Debleste, te lell lo ko djipen pale.

³⁸ I menshe an kava tsiro hi čilačo oun moukan o Debles. Kova, kay ladjell pes mange oun mire labenge glan kolende, koleske ladjau me ninna, te vau me, o Mensheskro Čavo, pale ap i phoub. Ap ko dives hi man o raylepen, hoy das man miro dad an o bolepen. Oun mantsa venna o Debleskre bolepangre.