Markus 5 - O Debleskro Lab 2024 (Sinte-Manouche)

O Yezouses hi i zoor pral o bengeste

¹ Oun yon van ap o vavar panyeskri rig an o them Gerasa.

² Oun har o Yezous dran o bero djas, nashas i morsh pash leste. Kova vas dran i moulengre khera. Les his i beng an peste,

³ oun djivas an kol moulengre khera. Oun kek nashte pandas les, vitar gar i sasterne shellentsa.

⁴ Boud kope pandan le leskre vasta oun pire i sasterne shellentsa, oun yob kras len paash oun phagas len pestar tele. Oun kek nashte vas ray pral leste.

⁵ Hako tsiro ap o dives oun an i rati, his yob an i moulengre khera oun ap i berge, oun das bari gole, oun das pes i barrentsa.

⁶ Har yob o Yezouses dour glan peste dikas, nashas lo pash leste oun vitsras pes glan leste ap i phoub.

^7-8 Oun o Yezous penas ap o bengeste: “Tou beng, dja vin dran kava morsheste!” Koy das yob bari gole: “Yezous, tou čavo o baro Deblestar, hoy kameh tou mandar? Me mangau tout pash o Debleste: Ma douke man gar!”

⁹ Oun o Yezous poučas lestar: “Har khareh tou?” Koy penas lo: “Mer ham boud. Doleske kharau Legioni.”

¹⁰ Oun yob mangas o Yezousestar, te tradell lo len gar dran ko them vin.

¹¹ Koy his pash i berga boud bale, hoy kote rhan.

¹² Oun kol benga mangan lestar: “Mouk men an kol balende dren te djal!”

¹³ Oun yob moukas len an lende dren te djal. Koy van kol benga dran o morsheste vin, oun djan an kol balende. Oun kol tsele bale van divyo oun nashan i berga tele, oun stan an o baro pani, oun tassan. Kolla his nay douy zerya bale.

¹⁴ Oun kolla, kay dan garda ap i balende, nashan penge, oun penan kova i menshenge an i forya oun an i gaba. Oun kol menshe kaman te dikell, hoy kote djas, oun van pash o Yezouseste,

¹⁵ oun dikan koles kote beshdo, kolestar kol boud benga vin van. Yob his an-rido oun bouder gar divyo. Har yon kova dikan, vas i traash ap lende.

¹⁶ Oun kolla, kay lauter dikan, penan lenge, hoy koleha djas, oun hoy kol balentsa djas.

¹⁷ Oun yon mangan o Yezousestar, te djal lo dran lengro them vin.

¹⁸ Oun har yob an o bero djas, mangas lestar ko morsh, kay his i benga an leste, te ačell lo nay pash leste.

¹⁹ O Yezous kamas gar, te djas yob leha, oun penas ap leste: “Dja khere pash tire menshende! Pen lenge lauter, hoy o Devel touke kras oun har lačo yob ap toute his!”

²⁰ Oun kava morsh djas peske, oun djas an ko them trouyel, kay i deesh forya čiddo hi, oun penas i menshenge, havo baro koova o Yezous ap leste kras. Oun hakeno kras bare yaka.

O Yayreskri čay oun i nasseli djouvel

²¹ Har o Yezous an o bero pale vergel ouleras, van kote boud menshe pash leste khetne. Oun yob his gomme pash o baro pani,

²² koy vas i pralstouno pral i biboldengri kangri. Leskro lab his Yayro. Har dikas lo o Yezouses, peras lo glan leste tele,

²³ oun mangas les o tselo djiyeha oun penas: “Miri čay hi ap o merepen čiddo. Am oun čip tire vasta ap late, te vell li sasto, oun te djivell li!”

²⁴ Oun yob djas leha. Oun boud menshe djan leske palla oun his troul leste.

²⁵ Mank lende his i djouvel. Kolat his i ratlo nasslepen. Deesh-te-douy bersha his li nasseli,

²⁶ oun das lauter, hoy lat his, i dramangrende. Oun kek nashte kras lat sasto. Yoy vas gomme nassleder.

²⁷ Har yoy o Yezousestar shounas, vas li mashkral i menshende pal leste, oun tapras ap leskro ripen.

²⁸ Yoy penas peske: “Te taprau kokres ap leskro ripen, vau sasto.”

²⁹ Oun ap yek kopo djas kava nasslepen latar. Oun yoy hayvas, kay hi li sasto.

³⁰ Oun o Yezous hayvas pestar, kay djas i zoor lestar vin, oun rissras pes trouyel, oun penas ap i menshende: “Koon tapras ap miro ripen?”

³¹ Oun leskre mala penan ap leste: “Tou dikeh, har boud menshe troul toute hi, oun koy poučeh tou: Koon tapras ap miro ripen?”

³² Yob dikas pes trouyel pal kolate, kay kras kova.

³³ Koy djouvel kay djinas, hoy lake djas, trashas oun trissas. Oun yoy vas pash leste, oun peras glan leste tele ap i phoub, oun penas leske o tselo čačepen.

³⁴ Yob penas ap late: “Romniya, tiro patsepen kras tout sasto. Dja mo Debleha! Tiro nasslepen vell bouder gar pale.”

³⁵ Har yob yaake rakras, van morsha dran o kheer kolestar, kay o pralstouno pral i biboldengri kangri hi, oun penan leske: “Tiri čay meras. Tou hounte mangess o rayes bouder gar.”

³⁶ O Yezous shounas kal laba, oun penas ap kol pralstuneste: “Ma traash, pats!”

³⁷ Oun o Yezous moukas kokres o Petres, oun o Yakobes, oun koleskro phrales, o Yohanni, leha te djal.

³⁸ Oun yon van an o kheer kol pralstunestar. Oun yob dikas kote boud menshen, kay nashan kate oun kote oun rovan oun dan bari gole.

³⁹ Oun yob djas dren, oun penas ap lende: “Hoske denn t'mer gole oun rovenna? Koy čay meras gar, yoy sovella.”

⁴⁰ Oun yon san pral leste. O Yezous tradas len lauteren vin, oun las kol čakro dades oun lakri day peha, ninna kolen, kay pash leste his, oun djas dren, kay koy čay čiddo his.

⁴¹ Oun yob tapras kol čat pash o vast, oun penas ap late an peskro rakepen: “Talita kumi!” Kova kharella: Čay, me penau touke, ste pre!

⁴² Oun sik stas koy čay pre, oun djas trouyel. Yoy his deesh-te-douy bersha phouro. Oun lenge ačas o rakepen pral kova krik.

⁴³ Oun yob penas lenge zoreles: “Ma penenn kova kekeske!” Oun palle penas lo: “Denn lat te rhal!”