Markus 3 - O Debleskro Lab 2024 (Sinte-Manouche)

O Yezous krell yekes sasto ap o Debleskro dives

¹ Oun o Yezous djas pale an i biboldengri kangri. Koy his i morsh, koles his i bango vast.

² Oun yon dikan ap leste, oun poučan pendar: “Krell lo kanna kava morshes ap o Debleskro dives sasto?” Yon rodan čomone, te nay anenn le les glan i čačepangre.

³ Oun yob penas ap kol morsheste, koles i bango vast hi: “Ste pre oun am kay!”

⁴ Palle penas lo ap lende: “Hoy kras mer pal maro čačepen ap o Debleskro dives? Hi gar feteder te kras mer lačo koova har čilačo koova? Hi gar feteder te kras mer i nasselen sasto, har te moukas mer len te merell?” Yon penan či.

⁵ Kova doukas les, kay lengro dji har i bar his. Oun yob dikas rhoyemen ap lende oun penas ap ko morsheste: “Sike tiro vast!” Oun yob sikras peskro vast. Oun ko vast vas sasto.

⁶ Oun kol Farisarya djan vin, oun djan pash kolende, kay shounenn ap o Herodeste, oun rakran lentsa, har yon nay marenn les.

Pash o baro pani Genezaret

^7-8 O Yezous oun leskre mala djan penge pash o baro pani. Oun boud menshe dran o them Galilea djan leske palla. Ninna boud vavar djan pash leste, kay shounan, hoy yob lauter kras. Kolla van dran o them Youdea, oun dran o foro Yerusalem, oun dran o them Idumea oun dran o them ap i vavar rig o panyestar Yordan, oun dran ko them, kay i forya Tirus oun Sidon čiddo hi.

^9-10 Oun o Yezous kras boud menshen sasto. Doleske van lauter, kay nasselo hi, pash leste. Oun hakeno kamas les an-taprell, te vell lo sasto. Koy penas o Yezous ap peskre malende, te anenn le leske i tikno bero, kay yob nay pre djala, te vell lo gar paash stakedo.

¹¹ Oun har kol menshe, kay benga an lende his, les dikan, peran yon glan leste tele, oun dan gole: “Tou hal o Debleskro čavo!”

¹² Oun yob penas zoreles ap lende, te penenn le kova kekeske.

O Yezouseskre mala

¹³ O Yezous djas ap i berga, oun das kolen pash peste gole, kay yob vin rodas. Oun kolla van pash leste.

¹⁴ Yob rodas deesh-te-douyen lendar vin, te venn le leskre bičepangre. “Me rodom t'men vin, te ačenn pash mande,” penas lo. “Me bičrau t'men pash i menshende, te penenn lenge o Debleskro lab.

¹⁵ Oun t'men vell i zoor, te tradenn i bengen vin.”

¹⁶ Oun kol deesh-te-douy his: o Simon, koles das yob ko lab Petro,

¹⁷ oun o Yakobo oun leskro phraal o Yohanni. Lengro dad hi o Zebedeo. Kolen das lo ko lab Boanerges. Kova kharella Morsha pherdo rholi.

¹⁸ Mank kol deesh-te-douyende his ninna o Andreas, oun o Filipo, oun o Bartolomeo, oun o Mateo, oun o Thomas, oun o Yakobo, koleskro dad hi o Alfeo, oun o Tadeo, oun o Simon, kay his kol menshendar, kay kharenna Zelotarya,

¹⁹ oun o Youdas Iskariot, ko phoukepaskro.

I čačepangre rakrenn djoungeles pral o Yezouseste

²⁰ O Yezous djas an i kheer. Koy van pale boud menshe khetne, yaake, kay his len kek tsiro, te rhan le.

²¹ Oun har leskre menshe kova shounan, penan le: “Yob hi dinelo!” Oun yon kaman les te taprell.

²² Oun i biboldengre čačepangre, kay van dran o foro Yerusalem tele, penan: “O pralstouno beng hi an leste!” Oun yon penan ninna: “O pralstouno beng das les i zoor, te nay tradell yob i bengen vin.”

²³ Oun o Yezous kharas len khetne, oun rakras ap lende laba, kay i khatedo čačepen dren hi. Oun yob penas: Har nay tradell o beng o benges vin?

²⁴ Te kourenn pen i bare raya an yek them, palle djal ko them paash.

²⁵ Oun an yek kheer nay vell gar douyen penepaske. Kova djal gar.

²⁶ Te čingrell yek beng i vavar bengeha, palle nashrell yob peskri zoor oun yob djal paash.

²⁷ Kek nay djal an i kheer, kay i zorelo morsh djivella, oun čorell leskro koova. Yob hounte pandell ko zorelo morshes. Palle nay randell lo leskro tselo bravlepen.

²⁸ Čačepah, me penau t'menge: Hako čilačo koova, hoy i menshe kran, nay bistrell o Devel. Ninna te penenn le djoungele laba pral leste, nay bistrell lo kova.

²⁹ Koon pral o Debleskro Dourho djoungele laba rakrella, kolestar vell koy doosh gar krik lino. Leskri doosh ačella hako tsiro.

³⁰ Kova penas lo lenge, har yon penan: “An leste hi i beng!”

Koon hi o Yezouseskre phrala oun phenya?

³¹ Koy vas o Yezouseskri day oun leskre phrala. Yon his vin tardo oun bičran yekes pash leste, te kharell lo les.

³² Boud menshe his troul leste beshdo. Oun leske vas penlo: “Dik, tiri day, tire phrala oun tire phenya hi vin tardo, oun kamenn touha te rakrell.”

³³ Koy penas yob: “Me kamau t'men te sikrell, koon miri day hi oun mire phrala.”

³⁴ Oun yob dikas trouyel ap kolende, kay his troul leste beshdo, oun penas: “Dikenn, koya hi miri day, oun kolla hi mire phrala.

³⁵ Kova, kay krell, hoy o Devel kamella, kova hi miro phraal, miri pheen, oun miri day.”