Markus 2 - O Debleskro Lab 2024 (Sinte-Manouche)

O Yezous krell i banges sasto

¹ Pal i tikno tsiro djas o Yezous pale an o foro Kapernaum. Oun boud shounan, kay yob an o kheer his.

² Koy van yaake boud menshe an o kheer oun glan o voudar khetne, te nay djas bouder kek an o kheer dren. Oun o Yezous penas lenge o Debleskro lab.

³ Koy anan le yekes ap o čiben, kay nay nashell gar. Star morsha hidjran les.

⁴ Kolla anan les nashte gar pash o Yezouseste, yaake boud menshe his troul leste. Koy djan yon ap o kheer pral pre, lan barra vin, oun moukan ko čiben o nassleha glan o Yezouseste tele.

⁵ Har o Yezous lengro patsepen dikas, penas lo ap koleste, kay nay nashell gar: “Miro čavo, me lau tiri doosh toutar.”

⁶ Koy his ninna biboldengre čačepangre beshdo. Kolla penan an pengre djia:

⁷ “Har nay penell yob kova? Yob krell pes har o Devel! O Devel kokres nay lell i doosh i menshendar!”

⁸ O Yezous hayvas, hoy an lengro shero trouyel djas oun penas ap lende: “Hoske djal kova an t'maro shero trouyel?

⁹ Hi kova phareder, te penap ap leste: Me lau tiri doosh toutar, har te penap: Ste pre, le tiro čiben oun dja khere?

¹⁰ Me kamau, te djinenn t'mer: O Menshengro Čaves hi i zoor ap kay phoub, te nay lell lo i doosh i menshendar krik.” Palle penas lo ap koleste, kay nasselo hi:

¹¹ “Ste pre, le tiro čiben oun dja khere!”

¹² Oun yob stas pre, las peskro čiben oun djas vin. Oun lauter dikan les, oun kran bare yaka. Yon sharan o Debles, oun penan: “An maro tselo djipen dikam savo koova gar.”

O Yezous oun i pale-čidde

¹³ O Yezous djas pale vin pash o baro pani. Oun boud menshe van pash leste. Oun yob sikras len o Debleskro drom.

¹⁴ Oun har yob yaake kote djas, dikas lo i morshes, kova kharas Levi. Leskro dad hi o Alfeo. O Levi his pash ko kheer beshdo, kay las yob love i Remaryenge dren. Penell o Yezous ap leste: “Am, dja mantsa!” Oun yob stas pre, oun djas leha.

¹⁵ Oun o Yezous djas an leskro kheer oun beshas pes tele. Oun boud menshe djan leha. Boud his kolendar, kay lenn i biboldendar love i Remaryenge dren, oun kolendar, kay čilačo koova kran oun doleske pale-čiddo his. Oun yon beshan pen tele o Yezouseha oun leskre malentsa, te rhan le.

¹⁶ Mank i Farisarya his save, kay čačepangre hi. Har yon dikan, kay yob kolentsa rhal, penan le ap leskre malende: “Hoske rhal yob kolentsa, kay lenn i biboldendar love i Remaryenge dren, oun kol vavarentsa, kay hi ninna pale-čiddo?”

¹⁷ Har o Yezous kova shounas, penas yob ap lende: “Kolla, kay sasto hi, djan gar pash o dramaskro. Kolla, kay nasselo hi, djan pash leste. Me vom gar, te dap kolen pash mande gole, kay ap o čačo drom hi. Na-a! Me vom, te dap kolen pash mande gole, kay djan ap o čilačo drom.”

O Yezous krell halauter neves

¹⁸ His i dives, kay rhan o Yohanneskre mala oun i Farisarya či, te mangenn le o Debles an. Koy van morsha pash o Yezouseste, oun penan ap leste: “Kolla, kay shounenn ap o Yohanneste, ninna kolla, kay shounenn ap i Farisarya, rhan i tsiro či, te mangenn le o Debles an. Hoske krenn tire mala kova gar?”

¹⁹ Penell o Yezous ap lende: “Yaake rah, har o biyabeskro ap i biyab hi, rhan oun piyenn leskre mala, kay leha ap i biyab hi.

²⁰ Ko tsiro vella, kay o biyabeskro lendar krik lino vella. Ap ko tsiro rhan le oun piyenn le či, te mangenn le o Debles an.

²¹ Kek sivell i nevo kotar than ap i phouro ripen. Pash o thopen vell o nevo kotar tikneder oun tserdell pes pale tele, oun o phouro ripen djal boudeder paash.

²² Oun kek čorell nevi mool an i phoure molyakre gone. I nevi mool krell i phoure molyakre gone paash. Oun koy mool nashell vin, oun kol molyakre gone djan paash. I nevi mool vell čoredo an neve molyakre gone!”

O Yezous hi o ray pral o Debleskro dives

²³ Ap yek Debleskro dives djas o Yezous ap i kotar them, kay djob baro vas. Oun leskre mala lan o djob an i vasta, te rhan le.

²⁴ Oun kol Farisarya penan ap leste: “Hoske krenn tire mala ap o Debleskro dives savo koova, hoy hi gar pal maro čačepen?”

²⁵ Penas lo ap lende: “Hoy kras o baro ray David peskre malentsa, har yon bokan? Djinenn t'mer gar, hoy an o Debleskro lab činlo hi?

²⁶ An ko tsiro, kay o Abyatar o baro rashay his, djas o David an o Debleskro kheer oun rhas o Debleskre mare, hoy kote čiddo his. Pal i biboldengro čačepen his kol mare i rashayenge kokres koy. O David rhas len, oun das ninna kolen, kay pash leste his.”

²⁷ Oun o Yezous penas ap lende: “O Debleskro dives hi i menshenge koy. O mensho vas gar kerdo, te hi lo o Debleskro diveske koy.

²⁸ Yaake hom me, o Mensheskro Čavo, ninna o ray pral o Debleskro dives.”